Qasym-Jomart Toqaev pen Aleksandr Výchıch eki eldiń resmı delegasııalarynyń qatysýymen keńeıtilgen quramda kelissóz ótkizdi, dep jazady Egemen.kz Aqordanyń baspasóz qyzmetine silteme jasap.
Memleket basshysy meımandarǵa iltıpat bildire otyryp, bul sapar Qazaqstan men Serbııa arasynda dıplomatııalyq qatynas ornaǵanyna 30 jyl tolý qarsańynda ótip jatqanyna nazar aýdardy.
«Serbııa Eýropadaǵy mańyzdy strategııalyq seriktesimiz sanalady. Kóptegen saladaǵy ózara tıimdi baılanystarymyzdy odan ári nyǵaıtýǵa nıettimiz. Búgin ekijaqty yntymaqtastyqty damytýǵa tyń serpin berý tásilderin talqyladyq. О́z tarapymyzdan eki el arasyndaǵy yqpaldastyqty keńeıtýge barlyq jaǵdaıdy jasaıtynymyzdy jetkizgim keledi», dedi Qasym-Jomart Toqaev.
Qasym-Jomart Toqaev Astana men Belgrad arasynda konstrýktıvti saıası dıalog jolǵa qoıylyp, parlamentaralyq baılanys nyǵaıyp kele jatqanyn atap ótti. Sonymen qatar memlekettik organdar men iskerlik toptardyń yqpaldastyǵy dáıekti túrde damýda.
Qazaqstanda 60-tan astam serbııalyq kompanııa qyzmet etedi. Prezıdent Saýda-ekonomıkalyq yntymaqtastyq jónindegi úkimetaralyq komıssııanyń tıimdi jumys atqaryp jatqanyn aıtty.
Aqordada Serbııa Prezıdentin saltanatty qarsy alý rásimi ótti
Memleket basshysy sapar aıasynda Serbııadan iskerlik top ókilderi kelgenin quptady. Keshe ótken Qazaqstan-Serbııa Iskerlik keńesiniń nátıjesi saýda jáne ınvestısııalyq baılanystardy keńeıte túsetinine senim bildirdi. Prezıdent elimizdiń birqatar halyqaralyq bastamalaryna qoldaý bildirgeni úshin Serbııa tarapyna rızashylyǵyn jetkizdi.
Aleksandr Výchıch qonaqjaılyq tanytqany úshin Prezıdent Qasym-Jomart Toqaevqa alǵys aıtyp, Belgrad Astanamen san qyrly yntymaqtastyqty odan ári keńeıtýge daıyn ekenin rastady.
Serbııa Prezıdenti qazaqstandyq kompanııalardyń ortaq jobalarǵa, ásirese, qurylys salasyna qosar úlesin arttyrýǵa múddeli ekenin jetkizdi.
«Biz Qazaqstan usynǵan birqatar bastamalardy júzege asyrýǵa ázirmiz. Bul Serbııada ǵana emes, Eýropanyń atalǵan aımaǵyndaǵy mańdaıaldy jobalar bolmaq. Sondaı-aq qazaqstandyq SCAT kompanııasyna áýe keńistiginde besinshi deńgeıli erkindik berý máselesi áli sheshimin tapqan joq. Ortaq is-qımyl arqyly atalǵan máseleni sheshe alatynymyzǵa senimdimin. Serbııaǵa Qazaqstannyń senimdi qurylys kompanııalary men ınvestorlary kelgenin qalaımyz. Bul elimizdiń ınvestısııalyq tartymdylyǵyn jaqsartyp qana qoımaı, ózara mádenı, týrıstik baılanystardy jandandyrýǵa da septigin tıgizedi. О́z tarapymyzdan Sizdiń elińizdiń ekonomıkasyna ınvestısııa salǵysy keletin serbııalyq kásipkerlerdi yntalandyrýǵa barynsha kúsh-jiger jumyldyramyz», dedi Aleksandr Výchıch.
Serbııa Prezıdenti qorǵanys ónerkásibi, jasandy ıntellekt, derekterdi óńdeý ortalyǵy sekildi baǵyttarda ózara yqpaldastyqty arttyrýǵa zor áleýet bar ekenine nazar aýdardy.
Sonymen qatar ol Qazaqstannyń áleýmettik-ekonomıkalyq damýyndaǵy jetistikterdi joǵary baǵalap, muny álemdegi ósip-órkendeýdiń úlgisi dep atady.
Kelissóz barysynda ekijaqty kún tártibindegi ózekti taqyryptar, atap aıtqanda, saýda-ınvestısııa, kólik-logıstıka, aýyl sharýashylyǵy, asa mańyzdy mıneraldar, sıfrlandyrý, jasandy ıntellekt, qurylys jáne týrızm salalaryndaǵy yqpaldastyq máseleleri qarastyryldy.
Buǵan deıin eki el prezıdentteri shaǵyn quramda kelissóz ótkizgenin habarlaǵanbyz.