Kenshiler qalasynda «Unico Play» onlaın-kınoteatrynyń alǵashqy sporttyq dramasy – «Trener aǵa» serıalynyń jabyq kórsetilimi ótti. Bul – kásipqoı boks taqyrybyn arqaý etken otandyq tuńǵysh telehıkaıa.
Serıal segiz bólimnen turady. Qazaq tilinde túsirilgen, oryssha sýbtıtrmen usynylady. Alǵashqy serııalary kórermenge jol tartty. Sıýjet jelisi boksshy Darhannyń taǵdyryna qurylǵan. Ákesiniń qazasynan keıin týǵan qalasyna oralǵan ol muraǵa qalǵan eski boks zalyn qabyldap alady. Kásipkerdiń qomaqty qarjy usynyp, zaldy satyp alýǵa tabandy túrde kirisýi bastapqyda ońaı sheshimdeı kórinedi. Alaıda ákesiniń ólimi kezdeısoq bolmaǵanyn sezgen sátten bastap, Darhan úshin bári ózgeredi. Shyndyqty izdeý ony astyrtyn jekpe-jek álemine jeteleıdi. Sol jerde ol ákesiniń burynǵy shákirti bolǵan órimdeı jasty qutqaryp qalady. Osy sátten bastap Darhan kóshe balalaryna tirek bolar «trener aǵaǵa» aınalady. Serıaldyń ózeginde kúsh qoldaný men qylmystyq qysymǵa qarsy shynaıy kúsh – ózin-ózi baqylaý men jaýapkershilik ıdeıasy jatyr.
Jobanyń rejısseri – kórermenge «Qarga» serıaly arqyly tanys Beıbit О́ner. Buǵan deıin de áleýmettik reńki basym týyndylarymen kózge túsken rejısser bul joly sport arqyly qoǵamdy sóıletýdi sheshipti. «Serıaldyń basty keıipkeri Darhan tek boksqa baýlıtyn jattyqtyrýshy emes, ol jasóspirimderdi qıyndyqpen kúresýge, sheshim qabyldaýǵa jáne kúrdeli jaǵdaılarda óz bolmysyn saqtaýǵa úıretedi. Biz sport pen tálimgerliktiń ómirdi qalaı ózgertip, jas býynǵa jańa múmkindikter ashatynyn kórsetkimiz keldi», deıdi ol. Túsirilim Qaraǵandy men Prıshahtınskide ótti. Jasandy dekorasııadan góri ómirdiń óz tynysy tańdalǵan. Jekpe-jek kórinisterin halyqaralyq «Nomad Stunts» tobynyń múshesi Qanat Qudııarov sahnalaǵan. Al basty róldi somdaǵan akter úsh aı boıy arnaıy boks jáne fızıkalyq daıyndyqtan ótken. Darhan beınesin jas akter Qýanysh Qudaıbergen somdady. «Búginde kıno tek oıyn-saýyq emes, mádenı jáne ıdeologııalyq ortanyń mańyzdy bóligine aınaldy. Jastar ekran arqyly sportqa degen súıispenshilikti sezinip, shabyt alsa, eńbegimizdiń aqtalǵany», deıdi ol.
Serıalǵa jas akterlermen qatar bokstan Olımpıada jeńimpazdary da tartylǵan. Jobanyń premeralyq kórsetilimin uıymdastyrýǵa «Startkino» qoǵamdyq birlestigi men «Ortau» kreatıvti ortalyǵy atsalysty. Olar Qaraǵandy óńirinde jastar shyǵarmashylyǵyn qoldaýǵa baǵyttalǵan bastamalardy júıeli túrde júzege asyryp keledi.
Qaraǵandy oblysy