L.N. Gýmılev atyndaǵy Eýrazııa ulttyq ýnıversıtetinde Lý Ban sheberhanasy bazasynda jasandy ıntellekt boıynsha qanatqaqty kýrsty sátti aıaqtaǵan joǵary oqý oryndarynyń oqytýshylary men mamandaryna sertıfıkat tabystaý rásimi ótti.
Oqý baǵdarlamasyna elimizdiń 10 jetekshi joǵary oqý ornynan 30-ǵa jýyq oqytýshy qatysty. Kýrs jasandy ıntellektini oqytýǵa arnalǵan onlaın-modýldi jáne úsh kúndik tájirıbelik semınardy qamtydy. Qatysýshylar zamanaýı qural-jabdyqtarmen jumys isteýdi meńgerip, óz ýnıversıtetteriniń bilim baǵdarlamalaryna JI tehnologııalaryn engizýge arnalǵan praktıkalyq sheshimder ázirledi.
Sıfrlandyrý jónindegi prorektor Gúlmıra Bekmanovanyń aıtýynsha, bul sheberhana eki el arasyndaǵy seriktestiktiń jemisi. Byltyr Memleket basshysy Qasym-Jomart Toqaev pen Qytaı Prezıdenti Sı Szınpınniń qatysýymen ashylǵan bul baza jasandy ıntellekt salasyndaǵy bilimdi tereńdetýge arnalǵan.
«Qytaıda bir aılyq oqý barysynda biz tórt negizgi modýldi meńgerdik. Atap aıtsaq, robottehnıka jáne avtomattandyrý, LLM, dron tehnologııalary, sondaı-aq qaýipsizdik júıeleri. LLM-di qarapaıym tilmen túsindirsek, ol mátindi uǵynyp, soǵan sáıkes jaýap qurastyra alatyn tildik model. Kýrstan keıin fakýltetimizde áriptesterimiz ben stýdentterge tájirıbemizdi bólistik. Qazir olar alǵan bilimin tájirıbede qoldanyp, naqty nátıje kórsetip júr. Búgin elimizdiń ár óńirinen kelgen 28 professorǵa osy baǵyttar boıynsha sertıfıkat tabystaldy», deıdi aqparattyq júıeler kafedrasynyń PhD Mansııa Hantóreeva.
Al E.A.Bóketov atyndaǵy Qaraǵandy Ulttyq zertteý ýnıversıtetiniń qaýymdastyrylǵan professory Raıhan Murathanuly kýrs aıasynda ekologııaǵa baǵyttalǵan JI-qosymshalardyń áleýeti aıqyn kóringenin jetkizdi.
–Teorııalyq bilimdi Eýrazııa ulttyq ýnıversıtetiniń jappaı onlaın-platformasynda aldyq. Bul bizge jasandy ıntellekt negizderine tereń boılap, zamanaýı algorıtmderdiń jumys qaǵıdalaryn túsinýge kómektesti. Ásirese robottehnıkalyq sheshimderdi paıdalana otyryp, qaldyqtardy suryptaý baǵytyndaǵy zertteýler qyzyqtyrdy. Bul – JI tehnologııalarynyń naqty ekologııalyq máselelerdi sheshýdegi jarqyn mysaly. Jobaǵa tek oqytýshylar ǵana emes, stýdentterdiń de tartylǵany qýantady, dedi ol.
Uıymdastyrýshylardyń aıtýynsha, osyndaı kýrstar aldaǵy ýaqytta jalǵasyn taýyp, qatysýshylar sany arta túspek.