Elordadaǵy Kongress-ortalyǵynda Jasandy ıntellekt jáne sıfrlyq damý mınıstrliginiń uıymdastyrýymen jańa Konstıtýsııa jobasyn talqylaýǵa arnalǵan is-shara ótti. Talqylaýǵa Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev, Májilis depýtattary Aıdos Sarym, Ekaterına Smyshlıaeva jáne Snejanna Imasheva, sondaı-aq Zańnama jáne quqyqtyq aqparat ınstıtýtynyń sarapshylary men Mınıstrlikke qarasty uıymdardyń qyzmetkerleri qatysty, dep habarlaıdy Egemen.kz.
Kirispe sózde bul jıynnyń mańyzy óte zor ekenin aıtqan, vıse-premer J.Mádıev aldaǵy konstıtýsııalyq reformaǵa arnalǵan referendým – elimizdiń saıası damýy úshin mańyzdy saıası oqıǵa bolatyny sózsiz ekenin atap ótti.
– Bul bastama eń aldymen memleket pen qoǵamnyń uzaq merzimdi strategııalyq damýyna baǵyttalǵan. Onyń negizgi maqsaty – azamattardyń quqyqtary men bostandyqtaryn qorǵaýdy kúsheıtý, memlekettik basqarýdy jetildirý jáne ulttyq birlikti nyǵaıtý. Adamnyń ar-namysy onyń qadir-qasıetimen qatar qol suǵylmaıtyn qundylyq retinde qorǵalady. Bul norma azamattardyń memleketke degen senimin arttyryp, qoǵamdyq ınstıtýttardyń turaqtylyǵyn nyǵaıtady, – dedi J.Mádıev.
Premer-mınıstrdiń orynbasary óz sózinde jasandy ıntellekt dáýirinde azamattardyń sıfrlyq quqyqtaryn qorǵaý – bul sıfrlyq memleketke degen senimniń negizgi sharty ekenine toqtaldy. Bul normalardy konstıtýsııalyq deńgeıde bekitý otandastarymyzdyń quqyqtaryn qorǵaýdy sapaly jańa deńgeıge kóteretinine jáne qaýipsiz ári ádil qoǵam qurýǵa jol ashatynyna basa mán berip, ózgeristerdiń strategııalyq mańyzdylyǵyn atap ótti.
Onyń aıtýynsha, jańartylǵan Konstıtýsııa tehnologııalardyń adam ıgiligine qyzmet etýiniń jáne zańnyń sıfrlyq álemde árbir azamattyń múddesin senimdi qorǵaýynyń kepili bolmaq.
Halyqtyń 89,2%-y jańa Konstıtýsııa jobasyn qoldaıdy
Sondaı-aq mınıstr J.Mádıev jańa Konstıtýsııada azamattardyń jeke málimetteriniń qaýipsizdigine quqyqtyq kepildikter beriletinin aıtty.
– Qazirgi ýaqytta álem qarqyndy sıfrlyq ózgerister kezeńine qadam basty. Memlekettik qyzmetter, qarjy operasııalary, bilim berý, medısına jáne áleýmettik qatynastardyń basym bóligi elektrondy formatqa kóshti. Osyǵan baılanysty sıfrlyq dáýirde derbes derekterdi qorǵaý máselesi erekshe mańyzǵa ıe bolyp otyr, – degen Premer-mınıstrdiń orynbasary Konstıtýsııalyq deńgeıde derbes derekterdiń qorǵalýyna erekshe mán berý – sıfrlyq keńistikte qaýipsiz quqyqtyq orta qalyptastyratynyn aıtty.
Abzal Quspan: Jańa Konstıtýsııa adamǵa baǵyttalǵan memlekettik basqarýdyń jańa fılosofııasyn qalyptastyrady
Jaslan Mádıev sıfrlandyrý úderisin quqyqtyq turǵydan bekitý – bolashaqqa jasalǵan mańyzdy qadam dep biletinin jetkizdi. Ol eldiń qaýipsiz damýyn qamtamasyz etip, azamattardyń quqyqtaryn qorǵaýdy jańa deńgeıge kóteretinin atap ótti. Iаǵnı bul baǵyttaǵy ózgerister Qazaqstan qoǵamynyń zamanaýı, qaýipsiz ári ádiletti bolashaǵyna jol ashpaq.
– Sonymen qatar jańa Konstıtýsııada usynylyp otyrǵan barlyq ózgerister, memleketimizdiń saıası júıesin jańǵyrtyp, azamattardyń turmys sapasyn arttyrýǵa, quqyqtyq tártipti nyǵaıtýǵa jáne otanshyldyq ıdeıany kúsheıtýge baǵyttalǵan. Bul tek quqyqtyq qujatty ózgertý emes, ol – qoǵamnyń damýynyń jańa kezeńine qadam jasaý. Onyń túpki maqsaty – turaqty, ádiletti jáne órkenıetti memleket qurý. Aldaǵy referendým – elimizdiń bolashaǵyna qatysty mańyzdy sheshim, – degen Jasandy ıntellekt jáne sıfrlyq damý mınıstri Jaslan Mádıev ár azamattyń bul tarıhı ózgeristerge jaýapkershilikpen qarap, eldik, memleketshildik pozısııasyn tanytýy – árqaısymyzdyń el bolashaǵyna qosqan naqty úlesimiz bolmaǵyn atap ótti.
Jalpy alǵanda kezdesýde memlekettik qurylymnyń bolashaǵy men azamattardyń quqyqtaryn qorǵaýdy aıqyndaıtyn konstıtýsııalyq reformalar týraly ashyq dıalog órbidi.