Alaıaqtar sıfrlyq tehnologııalardyń múmkindigin paıdalanyp, azamattardyń jeke derekterin urlaýdyń jańa tásilderin meńgerip keledi. Sonyń biri – dıpfeık tehnologııasy. Mamandardyń aıtýynsha, mundaı ádis arqyly qaskúnemder jalǵan beıne nemese daýys jasap, adamdardy aldap, banktik shottarǵa qol jetkizýi múmkin, dep jazady Egemen.kz.
Dıpfeık – jasandy ıntellekttiń kómegimen óńdelgen foto, beıne nemese aýdıo jazba. Bul tehnologııa adamnyń bet-beınesin dálme-dál jasap, kez kelgen daýysty nemese qımyldy qoldan jasaýǵa múmkindik beredi. Tipti keıbir servıster bir ǵana beıne nemese birneshe sekýndtyq daýys jazbasy arqyly jalǵan beıne ne aýdıo daıyndaı alady.
Mundaı tehnologııany alaıaqtar túrli maqsatta paıdalanady. Máselen, olar jalǵan foto, beıne nemese aýdıo arqyly banktik shottarǵa qol jetkizip, qarajatty qolma-qol aqshaǵa aınaldyrýy nemese jalǵan kredıt rásimdeýi múmkin. Sonymen qatar qaıtys bolǵan adamnyń derekterin paıdalanyp, banktik onlaın-qyzmetterge qol jetkizý úshin onyń «beınesin tiriltý» jaǵdaılary da kezdesedi.
Taǵy bir keń taraǵan tásil – jalǵan daýys arqyly qońyraý shalý. Mundaı jaǵdaıda alaıaqtar ózderin «týys», «basshy» nemese «bank qyzmetkeri» retinde tanystyryp, shuǵyl áreket etýdi talap etedi.
Jetisýda JI arqyly jalǵan chek jasaǵan úsh jasóspirim áshkerelendi
Mamandardyń aıtýynsha, qaskúnemder azamattardyń senimine kirý úshin memlekettik organdar basshylarynyń, bankter men qarjy uıymdary jetekshileriniń beınesin zańsyz paıdalanýy múmkin.
Dıpfeıkti anyqtaýǵa kómektesetin birneshe belgi bar. Mysaly, adamnyń beınede tabıǵı emes jypylyqtaýy, sózderdiń retsiz aıtylýy, kekeshtený nemese daýystyń robotqa uqsap shyǵýy kúmán týdyrýy tıis. Buǵan qosa, alaıaqtar kóbine adamdy asyqtyryp, «dál qazir sheshý kerek» dep qysym jasaıdy, qaıta qońyraý shalýǵa múmkindik bermeıdi jáne áńgimeni qupııa saqtaýdy talap etedi.
Sondaı-aq qaskúnemder túrli ınvestısııalyq onlaın-platformalar arqyly tez tabys tabýǵa shaqyryp, jalǵan saıttarda jeke derekterdi qaldyrýdy nemese az mólsherde aqsha aýdarýdy suraıdy. Mundaı jaǵdaıda SMS-kodtardy, bank kartasynyń derekterin eshkimge jibermeý, kúmándi siltemelerge ótpeý jáne aqparatty tek resmı derekkózder arqyly tekserý qajet.
Aıta keteıik, eger jaqyn adamyńyz nemese tanysyńyz qońyraý shalyp, shuǵyl aqsha aýdarýdy surasa, áńgimeni toqtatyp, oǵan ózińiz qaıta habarlasyńyz. Osylaısha qońyraýdyń shynymen sol adamnan kelgenine kóz jetkizýge bolady.
IIM qazaqstandyqtarǵa JI arqyly jasalatyn alaıaqtyq týraly eskertti
Sarapshylar tanymal adamdardyń beınesi paıdalanylǵan jarnamalarǵa da saqtyqpen qaraýǵa keńes beredi.
Qarjy naryǵyn retteý jáne damytý agenttigi qarjy uıymdarynyń aqparattyq qaýipsizdigin kúsheıtý baǵytynda turaqty jumys júrgizip keledi. Búginde klıentterge qashyqtan qyzmet kórsetý kezinde eki faktorly aýtentıfıkasııany mindetti qoldaný jáne negizgi faktor retinde bıometrııany paıdalaný talaptary engizilgen.