Prezıdent Qasym-Jomart Toqaev Qazaq eliniń kók pasportyn ıelengen árbir otandasymyz álemniń qaı túkpirinde júrse de memlekettiń qorǵaýy men qamqorlyǵynda bolatynyn jıi aıtyp júr. Kúni keshe máslıhat depýtattarynyń III forýmynda da Taıaý Shyǵystaǵy shıelenisti ahýalǵa toqtala kele, elimiz qaqtyǵys aımaǵynda júrgen azamattaryn dalada qaldyrmaı, týǵan jerge ákelip jatqanyn atap ótti.
«Azamattarymyzdy qıyn jaǵdaıda qaldyrmaımyz». Bul – jaı ǵana uran nemese popýlızm emes, memlekettik saıasatymyzdyń buljymas qaǵıdaty», dep atap ótti Q.Toqaev.
Prezıdent aıtqandaı, shyn máninde Qazaqstan óz azamattaryn eshýaqytta taǵdyr tálkegine qaldyrǵan emes. Pandemııa kezinde de, óz elimizde sý tasqyny, órt, basqa da tótenshe jaǵdaılar týyndaǵan shaqta da memleket qıyndyqqa dýshar bolǵan turǵyndarǵa jan-jaqty qol ushyn sozǵany málim.
Al shet aımaqtarda járdemge muqtaj bolǵan adamdarǵa jasalǵan qamqorlyqtyń jarqyn mysaldaryn sonaý táýelsizdik alǵan alǵashqy jyldardan da keltirýge bolady. Máselen, 90-jyldardyń basynda Tájikstanda azamat soǵysy bastalǵanda sol jaqtaǵy qazaqtardy ushaqpen alǵash bolyp alyp shyqqan da bizdiń elimiz edi. Odan bergi tarıhqa kóz júgirtsek, eń birinshi bolyp oıǵa oralatyn oqıǵa – «Jýsan» gýmanıtarlyq operasııasy. Radıkaldy dinı ıdeologııanyń yqpalyna ergen júzdegen otandasymyz «halıfat ornatamyz» degen aldap-arbaýǵa senip, týǵan jerin tastap, jyraqqa ketkeni belgili. Kópshiligi otbasymen, bala-shaǵasymen birge shekara asyp, oq pen ottyń ortasynda ómir súrip jatqan edi.
Degenmen sol joly da memleketimiz jat jerden jumaq izdep, adasqandardy kózden tasa qylmaı, dalaǵa tastamaı, birneshe kezeńnen turatyn «Jýsan» operasııasyn uıymdastyryp, 500-den astam otandasymyzdy týǵan jerge aldyrdy. Nege? О́ıtkeni olar da qasterli kók pasporttyń ıegerleri. Prezıdent Q.Toqaev atap ótkendeı, pasportymyzdyń qýaty memleketimizdiń yqpalynan, halqymyzdyń jasampaz rýhynan, zamannyń ozyq ıdeıalaryn ıgere alatyn qabiletimizden kórinedi.
Al bul joly memleketimiz Taıaý Shyǵystaǵy shynaıy soǵys jaǵdaıynda turǵan elderden Qazaqstan azamattaryn qosymsha arnaıy ushaq jiberip, evakýasııalaýdy óz jaýapkershiligine aldy. Syrtqy ister mınıstrliginiń 10 naýryzdaǵy málimetinshe 8 585 otandasymyz elge oralǵan. Onyń 66-sy Irannan.
«Aımaqtaǵy ahýalǵa baılanysty azamattardy áýe jáne qurlyq arqyly evakýasııalaý jumystary jalǵasyp jatyr. Aldaǵy kúnderi Izraılden – 78, Qatardan – 350, Birikken Arab Ámirlikterinen – 550, Saýd Arabııasynan – 300 adamdy qaıtarý josparda bar», dep málimdedi SIM baspasóz qyzmeti.
Qazir álemde óziniń eli men jeri, pasporty joq otansyz halyqtar az emes. Otany bolsa da, soǵys pen ózge de kúrdeli jaǵdaıdyń saldarynan týǵan jerinen bezgen bosqyndar qanshama? Osyndaıda «Qazaqstan» atty kıeli shańyraǵymyzdyń, ulanǵaıyr jerimizdiń, osy eldiń tól perzenti ekenińdi bildiretin kók pasportyńnyń baryna shúkir etý kerek. «Erim deıtin el bolmasa, elim deıtin er qaıdan shyqsyn!» deıdi Ahmet Baıtursynuly. Kók týy men kók pasportyn qasyq qany qalǵansha qorǵaıtyn otanshyl azamattarymyz barda, Qazaq eliniń irgesi berik, shańyraǵy bıik bola bereri sózsiz!