Batys Qazaqstan oblysynda búgin 489 ýchaske tolyq kólemde jumys istep jatyr. Onyń 136-sy Oral qalasynda ornalasqan, dep habarlaıdy Egemen.kz.
Jalpy óńir boıynsha barlyǵy 446 391 azamattyń daýys berý quqyǵy bar. Onyń basym bóligi – 237 532 adam – oblys ortalyǵynda tirkelgen. Oblysta 4089 jas alǵash ret daýys beredi.
«Osynaý mańyzdy naýqandy ótkizýge 1 oblystyq aýmaqtyq komıssııa, 1 qalalyq aýmaqtyq (Oral) jáne 12 aýdandyq aýmaqtyq komıssııa qyzmet kórsetip jatyr, komıssııa músheleriniń jalpy sany – 3215 adam» dep habarlady BQO aýmaqtyq referendým komıssııasy.
102 jastaǵy Uly Otan soǵysynyń ardageri referendýmda daýys berdi
Biz Oral qalasynyń eń úlken aýdany – Zachagan kentindegi birneshe referendým ýchaskesin aralap shyǵyp, daýys berýdiń barysyn baqylap qaıttyq.
«Bizdiń ýchaskede halyq tańdaýyn jasaý úshin barlyq jaǵdaı jasalǵan, ýchaske ýaqytynda ashyldy, bári retimen júrip jatyr. Bizde 2788 daýys berýshi tirkelgen. Tańǵy saǵat 7:00-de Ábý Dáýletov degen daýys berýshi otbasymen kelip, daýys berip, syılyǵyn alyp ketti. Túski saǵat 12-den keıin óz úıinen daýys beretin jandarǵa baramyz», deıdi №421 ýchaskelik referendým komıssııanyń tóraǵasy Sáýle Aıtqalıeva.
Biz bas suqqan №427 ýchaskede de adam qarasy ájeptáýir eken. Komıssııa tóraǵasy Tolqyn Jastalapqyzy tańdaý jasaýǵa tirkelgen 2037 adam bar ekenin, 13 adam úıden daýys beretinin, barlyǵy bir qalypty, zańnyń tártibine sáıkes uıymdastyrylyp jatqanyn habarlady.
«Daýys berýshilerge yńǵaıly bolýy úshin buryn Qadyr Myrza Álı atyndaǵy mektepte ornalasqan №400 ýchaske qazir Ahmet Baıtursynuly atyndaǵy mektep ǵımaratyna kóshirildi. Jalpy bizdiń aýdan – kóptegen úıler salynyp, halyq tez kóbeıip kele jatqan aýmaq qoı. Soǵan qaramastan bári úılesimdi, halyqqa yńǵaıly etip uıymdastyrylǵan», deıdi Tolqyn Jastalapqyzy.
Shuǵyla shaǵyn aýdanynda turatyn Turarbek Súndetov referendým ýchaskesine tańǵy 6:30-da kelip alypty. Ol daýys berý ýchaskesi ashylyp, elimizdiń ánurany oryndalǵan saltanatty sátke kýá bolyp, №427 ýchaskede tuńǵysh tańdaý jasaǵan saılaýshy bolyp tirkeldi. Sol úshin shaǵyn syılyqqa da ıe boldy.
Referendým: Elimizdiń chempıondary óz tańdaýyn jasady
«Bizdiń ýchaskede Bekjanov Abaı esimdi saılaýshy bıyl tuńǵysh ret tańdaý jasady. Qazir joǵary oqý ornynda stýdent bolyp júrgen bul jigit bizdiń №47 mektepte bilim alǵan shákirtimiz edi. Mańyzdy saıası naýqanǵa sanaly túrde qatysyp, óz tańdaýyn jasaǵan oqýshymyzǵa rıza bolyp qaldyq», deıdi №400 ýchaskeniń basshysy Aqsáýle Qobylandyqyzy.
Bul ýchaske de qaladaǵy eń iri daýys berý ortalyqtarynyń biri. Munda 2502 adam tirkelgen.
«Men ózim kóp jyldan beri saılaý ýchaskelerinde jasap júrmin ǵoı. Baıqaǵanym – osy referendým ereksheleý ótip jatyr, óıtkeni halyqtyń belsendiligi óte joǵary. Mysaly bizdiń ýchaskede jarty saǵattyń ishinde 100-ge jýyq adam kelip, tańdaý jasap úlgerdi», deıdi Aqsáýle Qobylandyqyzy.
Janat Tólenuly esimdi daýys berýshi dál búgin 58 jasqa tolyp jatyr eken. Onyń kýáligin kórgen referendým ýchaskesi qyzmetkerleri týǵan kún ıesine tátti syılyq tartý etip úlgerdi.
Kóptegen ýchaske mańynda kóńildi áýen oınap, kıiz úıler tigilip, qazan kóterilip, oshaq janyp jatqanyn baıqadyq. Jalpy Oral qalasynda merekelik kóńil-kúı baıqalady. Adamdar dostyq ráýishte, bir-birimen qol alysyp kórisip, keshe ǵana bastalǵan Kórisý – Amal merekesimen birin biri quttyqtap jatyr. Qala bıligi búgin qoǵamdyq kólikter jolaýshylardy tegin tasymaldaıtynyn habarlaǵan.
Batys Qazaqstan oblysy