Qostanaıda múgedektigi bar azamattar ınnovasııalyq tehnologııa kómegimen daýys berdi. Elimizdiń sanaýly óńirlerinde ǵana qolǵa alynǵan qanatqaqty joba aıasynda №21 referendým ýchaskesinde estý, kórý qabileti nashar jandarǵa arnalǵan sıfrlyq buryshtar jumys istep turdy.
Ýchaske ǵımaraty meńireý tynyshtyqqa til bitirip, qarańǵyny jaryq etetin «aqyldy» qurylǵylarmen jabdyqtalǵan. Júrip-turýy qıyn jandardyń kirip-shyǵýyna qajet jaǵdaıdyń bári qarastyrylǵan. Ýchaske pandýspen, kireberistegi taktıldi kórsetkishter, taktıldi navıgasııa quraldary, elektrondyq dybys bergish apparatpen qamtamasyz etilgen. Sondaı-aq kórý qabileti nashar jandarǵa baǵyt-baǵdar silteıtin Braıl qarpimen jasalǵan traferetter, aýdıo-nusqaýlyqtar qoıylǵan. Bir buryshta úlkeıtkish áınek, qosymsha jaryq kózderi, dybys ulǵaıtqysh qondyrǵylar qosylǵan. Kompıýterden Konstıtýsııa jobasy týraly qajetti aqparat alýǵa bolady. Daýys berý kabınasyna deıin dybystyq qondyrǵy ornatylǵan. Shymyldyǵy ashylsa, eki tilde sóılep qoıa beredi.
Jalpy, atalǵan ýchaskede daýys berý quqyna ıe 2 356 adam tirkelgen. Onyń ishinde estý qabileti nashar – 5, kórý qabileti tómen – 12, arbaǵa tańylǵan 4 azamat bar.
«Buǵan qosa, kórý qabileti nashar adamdarǵa arnaıy maıaktar ornatylǵan. Taktıldi kórsetkishterdiń ereksheligi, ýchaskege kelgen múmkindigi shekteýli adam qurylǵyny saýsaǵymen oqyp, referendým komıssııasynyń qaıda otyrǵanyn, bıýlettendi qaıdan alý keregin birden túsinedi. Sondaı-aq daýys berý kabınasy men daýys berý jáshigin de eshkimniń kómeginsiz ózi taba alady. Buǵan qosa, arbaǵa tańylǵan jandar úshin bastyrma núktesi bar arnaıy kótergish qurylǵy ornatyldy. Azamat núkteni basyp, kótergishke minip ǵımaratqa enedi. Odan ári kireberiste turǵan komıssııa múshesi ony daýys berý zalyna deıin jetkizedi. Sonymen qatar estý qabileti nashar azamattarǵa arnalǵan ındýksııalyq ilmek bar. Bul quraldyń kómegimen komıssııa músheleri daýys berýshimen esh kedergisiz túsinise alady. Ádette, mundaı azamattar únemi arnaıy estý apparatyn taǵyp júredi. Al mıkrofon taqqan komıssııa múshesi aıtqan árbir sóz sol arnaıy qurylǵyǵa blıýtýz arqyly jetip otyrady. Osylaısha, ekeýi esh kedergisiz op-ońaı túsinisedi», deıdi ýchaskelik referendým komıssııasynyń tóraǵasy Baýyrjan Qajıaqbarov.
Inklıýzıvti daýys berý ýchaskesi úsh tústi aımaqqa bólingen. Birinshi aımaq sary tústi boıaýmen qorshalǵan. Sary tús kózi nashar kóretinderdiń daýys berý zalyn jazbaı taýyp barýyna kómektesedi. Zaǵıp jan kók túspen qorshalǵan aımaqtan bıýlleten alatynyn, al jasyl aımaq daýys berýge arnalǵan alań ekenin birden túsinedi.
Kórý qabiletinen aıyrylǵan Aleksandr Prıahınniń aıtýynsha, atalǵan saılaý ýchaskesi múgedektigi bar jandardyń mańyzdy oqıǵadan shet qalyp qoımaýyna septigin tıgizedi.
«Men buǵan deıingi saılaý, referendýmdarda úıde otyryp daýys beretinmin. Komıssııa músheleri jáshikterin kóterip ózderi keletin. Búgin elden qalmaı kópshilikpen birge daýys berýge kelip turmyn. Ýchaskelik komıssııa jibergen ınvataksımen jettim. El bolashaǵy úshin asa mańyzdy tarıhı oqıǵadan tys qaldyrmaı, bizdi de elep-eskerip bar jaǵdaıdy jasap qoıǵan. Búgin elimizdiń jarqyn bolashaǵy úshin, ózim sııaqty múmkindigi shekteýli jandardyń jaqsy ómir súrýi úshin daýys berdim», deıdi A.Prıahın.
Qostanaı oblysynda 717 referendým ýchaskesi jumys istedi. О́ńirde 536 824 azamat daýys berý quqyǵyna ıe. Mańyzdy naýqanǵa turǵyndardyń asa belsendi atsalysqanyn da aıta ketý kerek. Ýchaskeler ashylǵan sátten bastap keshke deıin qoǵamdyq kólikter de toqtaýsyz tegin júrip turdy.
Qostanaı oblysy