Italııada ótken qysqy Paralımpıada oıyndarynyń chempıony Erbol Hamıtovtiń ata-anasy jańa Konstıtýsııa jobasy boıynsha respýblıkalyq referendýmda daýys berdi.
Oblys ortalyǵynyń irgesinde turatyn sańlaqtyń ákesi Ǵalymkereı Hamıtov pen anasy Ǵalııa Alpysbaeva óz tańdaýyn jasady.
– Biz qalanyń irgesindegi Bereke degen shaǵyn aýdanda turamyz. Jańadan salynǵan aýrýhanadaǵy №673 referendým ýchaskesinde daýys berdik. Balalarymyzdyń, nemerelerimizdiń bolashaǵy jarqyn bolsyn degen nıette tańdaýymyzdy jasadyq. Kúıeýim ekeýmiz ómirge eki ul, bir qyz ákeldik. Ortanshymyz Erboldyń arqasynda birden tanymal boldyq. Búginde habarlasýshylarǵa jaýap qatyp úlgere almaı jatyrmyz. Italııada ótken qysqy Paralımpıada oıyndarynda ulymyz aldymen qola, odan keıin altyn medal oljalap, mereıimizdi asyrdy. Balamyzdyń parasportpen erkin shuǵyldanyp, jahandyq dodalarǵa alańsyz ázirlik júrgizýine memleket orasan jaǵdaı jasady. Munyń barlyǵy da beıbitshilik ornaǵan, yntymaq, birligi uıyǵan eldigimizdiń arqasy dep bilemin, – deıdi Ǵ.Alpysbaeva.
Eske sala ketsek, Italııanyń Mılan – Kortına-d’Ampesso qalalarynda XIV qysqy paralımpıada dodasynda Erbol Ǵalymkereıuly parashańǵydan qola júlde alyp qýantsa, odan keıin parabıatlonnan iz qýý saıysynda aldyna qara salmaı, chempıon atandy.