Bıylǵy kóktemgi dala jumystaryna daıyndyq aıasynda aýyl sharýashylyǵy óndirýshilerin erte qarjylandyrý jalǵasyp jatyr. Qazirdiń ózinde 2 900-den astam sharýa jeńildetilgen nesıege qol jetkizip, alqaptarǵa qajetti daıyndyq jumystaryn bastaýǵa múmkindik aldy, dep jazady Egemen.kz.
Aýyl sharýashylyǵy mınıstrliginiń málimetinshe, 2026 jylǵy maýsymdaǵy kóktemgi egis naýqanyna arnalǵan erte qarjylandyrý baǵdarlamasy belsendi túrde júzege asyrylyp keledi. Baǵdarlama boıynsha ótinimderdi qabyldaý 2025 jylǵy qazan aıynda bastalǵan. Aýyl sharýashylyǵy taýaryn óndirýshiler úshin syıaqynyń túpkilikti mólsherlemesi jyldyq 5% deńgeıinde belgilengen.
Qazirgi ýaqytta jalpy somasy 519 mlrd teńgege 3 534 aýyl sharýashylyǵy taýaryn óndirýshiden ótinimder pýly qalyptastyrylǵan. Sonyń ishinde 2 936 ótinim maquldanyp, 288 mlrd teńge kóleminde qarjylandyryldy. Bul qarajat 3 mln gektardan astam egis alqabyn qamtıdy.
Baǵdarlama aıasynda sharýalardyń qarjyǵa qoljetimdiligin keńeıtý úshin «Damý» qory arqyly qaryzdardy kepildendirý tetigi de iske qosylǵan. Bul mehanızm nesıe somasynyń 85%-yna deıin kepildik berýge múmkindik beredi. Búgingi kúnge deıin 111,5 mlrd teńge kólemindegi qaryzdar boıynsha 753 kepildik usynylǵan.
Byltyr aýyl sharýashylyǵy salasynda 250 óndiris ashyldy
Aıta ketý kerek, «Keń dala 2» baǵdarlamasy boıynsha ótinimderdi qabyldaý ótken jyldyń 1 qazanynda bastalǵan. Bul bastama Memleket basshysynyń kóktemgi dala jumystaryn ýaqtyly ári sapaly uıymdastyrý jónindegi tapsyrmasyn oryndaý maqsatynda qolǵa alynǵan.
Qarjylandyrýdyń erte berilýi sharýalarǵa 2026 jylǵy egis naýqanyna aldyn ala daıyndalýǵa múmkindik jasap otyr. Bólingen qarajat eń aldymen janar-jaǵarmaı materıaldaryn tıimdi baǵamen satyp alýǵa, mıneraldy tyńaıtqyshtar alýǵa, aýyl sharýashylyǵy tehnıkasyn jóndeýge jáne sapaly tuqym qoryn qalyptastyrýǵa baǵyttalady.
Jeńildetilgen qarjy tek kóktemgi egis jumystaryna ǵana emes, sonymen birge oraq naýqanyna daıyndyq pen maýsymdyq shyǵyndardy óteýge de paıdalanylýy múmkin. Qarjylandyrý «Agrarlyq nesıe korporasııasy» AQ-nyń fılıaldyq jelisi jáne el boıynsha seriktes qarjy ınstıtýttary arqyly júzege asyrylady.
Aýyl sharýashylyǵy ónimin qaıta óńdeý úlesi jyl sońyna deıin 70%-ǵa jetedi