Aqordada HIV Qysqy Paralımpıada oıyndarynyń chempıony Erbol Hamıtov pen onyń bapkerlerin marapattaý rásimi ótti, dep jazady Egemen.kz Aqordanyń baspasóz qyzmetine silteme jasap.
Qasym-Jomart Toqaev Italııada ótken álemdik doda elimiz úshin óte tabysty bolǵanyna toqtaldy. Jahandyq básekede otandasymyz Erbol Hamıtov altyn jáne qola medal jeńip aldy.
«Naǵyz chempıon atanyp, elimizdiń mereıin ústem etti, kók Týymyzdy bıikte jelbiretti. Bul – qazaq parasporty úshin tarıhı jetistik. Erbol qazaqtyń qaısar, ór rýhty ári namysty ult ekenin kúlli álemge pash etti. Sondyqtan, eń aldymen, saǵan jáne bapkerlerge shynaıy rızashylyǵymdy bildiremin. Paralımpıada oıyndaryna attanar sátte men elimizdiń kók Týyn saǵan tabystadym. Sol artylǵan senimdi tolyq aqtap, Qazaqstanǵa jeńispen oraldyń. Keremet nátıjege jettiń! Sonyń arqasynda elimiz komandalyq esepte 18-shi orynǵa taban tiredi. Úzdikterdiń ishinen alǵa shyǵyp, chempıon bolý ońaı emes. Bul – jyldar boıǵy tynymsyz daıyndyq pen qajyrly ári tabandy eńbektiń jemisi ekeni anyq», dedi Prezıdent.
Prezıdent bapkerlerge, demeýshilerge, dárigerlerge jáne parasportshylarmen jumys isteıtin barsha mamanǵa rızashylyǵyn bildirdi.
Memleket basshysy Erbol Hamıtovtyń jetistikke jetý jolynda onyń bapkerleri aıryqsha ról atqarǵanyna nazar aýdardy.
«Sizder Erbol Hamıtovqa bilgenderińizdi úıretip, tájirıbelerińizben bólistińizder. Onyń chempıonǵa tán tabandylyq tanytyp, bıik maqsatqa umtylatyn kúresker minezin shyńdadyńyzdar. Olımpıada jylnamasyna esimin jazǵan belgili, kórnekti sportshy bolýyna kúsh saldyńyzdar. Sizderge alǵys aıtamyn. Oraıly sátti paıdalanyp, bapkerlerge, demeýshilerge, dárigerlerge jáne parasportshylarmen jumys isteıtin barsha mamanǵa rızashylyǵymdy jetkizgim keledi. Atletterimizdiń jetistigi – óskeleń urpaqqa úlgi-ónege. Tabysqa jetý formýlasyn bári biledi. Alaıda asqaq muratqa qol jetkizý úshin kóptegen ıgilikten jáne ómirdiń qyzyǵynan bas tartyp, qıyn joldy eńserýge ekiniń biri táýekel etpeıdi. Álem birinshilikterinde jeńip alǵan ár medal elimizdegi buqaralyq sporttyń damýyna zor serpin beredi. Bul óte mańyzdy. О́ıtkeni sportpen shuǵyldanatyn, óz-ózin qamshylap, kún saıyn shyńdaıtyn, sondaı-aq temirdeı tártipke úırengen adamdar tirshiliktiń taýqymetine moıymaıtynyn ómirdiń ózi kórsetip otyr. Bul rette paralımpıadashylardyń jóni tipten bólek. Olardyń ómiri – naǵyz erliktiń, qaıtpas qaısarlyq pen muqalmas erik-jigerdiń úlgisi», dedi Qasym-Jomart Toqaev.
Aıta keteıik, otandasymyz para bıatlon jarysynda jeńis tuǵyrynyń eń bıik satysyna kóterildi. Erbol Hamıtov 4,5 shaqyrymdyq iz kesý jarysynda (otyryp jarysý sanaty) úzdik nátıje kórsetip, chempıon atandy.
Jarysta qara úzgen jeńimpaz ýkraınalyq Taras Radty, qytaılyq Szysıýı Lıýdi shań qaptyrdy.
Sondaı-aq ol osy Paralımpıada oıyndarynda para shańǵy jarysynan qola medaldi jeńip alǵan edi. Osylaısha qazaqstandyq sportshy bir jarystyń ózinde eki júldeni qorjynǵa saldy.