Kezdesýde Qazaqstan men Reseı arasyndaǵy strategııalyq seriktestiktiń jáne odaqtastyq qarym-qatynastyń nyǵaıyp kele jatqany atap ótildi. Sondaı-aq ózara tıimdi dıalog pen joǵary deńgeıde qol jetkizilgen ýaǵdalastyqtardy iske asyrý qarqyn alǵanyna nazar aýdaryldy.
Memleket basshysynyń aıtýynsha, Mıhaıl Mıshýstınniń Shymkent qalasynda ótetin Eýrazııalyq úkimetaralyq keńes otyrysyna jáne Sıfrlyq forýmǵa qatysýy Qazaqstan-Reseı baılanystarynyń aıryqsha sıpatyn jáne ony odan ári óristetýge qos taraptyń umtylysyn taǵy da rastaıdy.
«Ekijaqty ekonomıkalyq yntymaqtastyqtyń qalaı damyp kele jatqany ózińizge málim. Qazirdiń ózinde quny 25 mıllıard dollarǵa jýyq 122 iri joba iske asyryldy. Saýda kólemi 30 mıllıard dollarǵa jaqyndady. Bul jaqsy nátıje deýge bolady. Reseı bizdiń negizgi saýda-ekonomıkalyq, ınvestısııalyq seriktesimiz sanalady. Buǵan árıne, qýanyshtymyz», dedi Qasym-Jomart Toqaev.
Memleket basshysy Paralımpıada oıyndarynyń chempıony Erbol Hamıtovty marapattady
Áńgimelesý barysynda Reseı Federasııasynyń Prezıdenti Vladımır Vladımırovıch Pýtınniń Qazaqstanǵa jasaıtyn memlekettik saparyna daıyndyq máselelerine basa mán berildi.
Memleket basshysy Astana aldaǵy sapardy eki el arasyndaǵy strategııalyq seriktestik pen odaqtastyq qatynastardy odan ári damytýǵa tyń serpin beretin óte mańyzdy shara retinde qarastyratynyn jetkizdi. Prezıdenttiń aıtýynsha, ázirlik jumystary aıasynda san qyrly yntymaqtastyq taǵy da pysyqtaldy.
Reseı Úkimetiniń Tóraǵasy qazaq jerinde kórsetilgen syı-qurmet úshin Memleket basshysyna rızashylyǵyn bildirdi.
Sondaı-aq Qasym-Jomart Toqaevty jalpyulttyq referendýmnyń tabysty ótýimen jáne Qazaqstan Respýblıkasynyń jańa Konstıtýsııasy qabyldanýymen quttyqtady.
Mıhaıl Mıshýstınniń aıtýynsha, referendým Qazaqstan Prezıdentiniń memleket irgesin nyǵaıtýdy, ekonomıkany damytyp, azamattardyń ál-aýqatyn arttyrýdy kózdeıtin saıasatyn barsha halyq qoldaıtynyn kórsetti.
«Oraıly sátti paıdalanyp, Sizge Vladımır Vladımırovıch Pýtınniń ystyq yqylasyn jetkizgim keledi. Birer kún buryn Prezıdentpen ekijaqty qarym-qatynastyń kún tártibin, sondaı-aq bıyl mamyr aıyna josparlanǵan saparyna ázirlik jumystaryn egjeı-tegjeıli talqyladyq. Úkimet bul sapardyń da tabysty ótýine barynsha kúsh salady. Sizdiń byltyr qarasha aıynda Reseı Federasııasyna jasaǵan saparyńyz barysynda memleketter basshylary qoıǵan barlyq mindetti eki el úkimetteri iske asyryp jatyr», dedi Mıhaıl Mıshýstın.
Sondaı-aq taraptar ekijaqty kún tártibindegi ózekti máseleler jóninde pikir almasty.