Ishki ister mınıstri Erjan Sadenovtyń tapsyrmasymen Almaty qalasynda bolǵan rezonanstyq jol-kólik oqıǵasy alǵashqy sátten bastap erekshe baqylaýǵa alyndy. Sonymen qatar qazirgi ýaqytta qoǵamda aıtylyp jatqan barlyq ýájder tekserilip jatyr, dep habarlaıdy Egemen.kz.
IIM resmı ókili Shyńǵys Alekeshevtiń aıtýynsha, atalǵan apat boıynsha buǵan deıin qylmystyq is qozǵalǵan bolatyn. ZEEKR avtokóliginiń júrgizýshisine sottyń sanksııasymen qamaqqa alý sharasy qabyldandy. Apat kezinde ol jeńil dárejedegi alkogoldik masań kúıde bolǵan.
Sondaı-aq mınıstrdiń tapsyrmasy boıynsha qyzmettik tekseris bastaldy. Onyń obektıvtiligi men tolyqtyǵyn qamtamasyz etý úshin Almaty qalasyna О́zindik qaýipsizdik departamentiniń, Ákimshilik polısııa komıtetiniń jáne Jeke qurammen jumys departamentiniń basshylary tájirıbeli qyzmetkerlermen birge jiberildi.
Al memlekettik nómirlik belgilerdiń zańsyz berilýi múmkin degen ýájder boıynsha О́zindik qaýipsizdik departamentimen qylmystyq is qozǵaldy.
«Polısııa departamenti basshylarynyń biriniń júrgizýshisine qatysty áreketsizdik faktisi boıynsha da qylmystyq is qozǵaldy. Ol ýaqytsha ustaý ızolıatoryna qamaldy. Osy aıtylǵan qyzmettik tekseris jáne qylmystyq ister aıasynda barlyq mán-jaılar, onyń ishinde medıakeńistikte taralyp jatqan aqparat jan-jaqty tekseriledi. Anyqtalǵan kemshilikterge baılanysty kadrlyq sheshimder qabyldandy», dedi Shyńǵys Alekeshev.
Mınıstrdiń buıryǵymen Almaty qalasy polısııa departamenti bastyǵynyń syrtqy qyzmetter men jol qaýipsizdigin qadaǵalaıtyn orynbasary, sondaı-aq ákimshilik polısııa jáne qoǵamdyq qaýipsizdik basqarmalarynyń basshylary qyzmetterinen bosatyldy.
Zań buzýshylyqtar rastalǵan jaǵdaıda apat qatysýshylary da, laýazymdy tulǵalar da jaýapqa tartylady.
«Azamattarǵa, áleýmettik jeli qoldanýshylaryna jáne buqaralyq aqparat quraldary ókilderine úndeý jasaımyz: tekserilmegen jáne jalǵan aqparatty taratýdan, sondaı-aq asyǵys qorytyndy jasaýdan bas tartýǵa shaqyramyz. Jalǵan aqparat taratqany úshin ákimshilik jáne qylmystyq jaýapkershilik kózdelgen. Zań men jol qozǵalysy erejelerin óreskel buzý derekteri buǵan deıin de qatań túrde toqtatylyp keldi, aldaǵy ýaqytta da toqtatylatyn bolady», dedi ol.
Almatyda jol apatynan 3 adam qaza tapty: Qylmystyq is qozǵaldy