Astanada 2026 jyldyń alǵashqy úsh aıynda tutynýshylardan 3 myńnan astam ótinish túsip, olardyń nátıjesinde 48,4 mln teńge qaıtaryldy, dep habarlaıdy Egemen.kz.
Elordanyń Kommýnıkasııalar qyzmetinde ótken brıfıngte Astana qalasy Saýda jáne tutynýshylardyń quqyqtaryn qorǵaý departamenti basshysynyń orynbasary Janat Asantaev vedomstvonyń 2026 jyldyń I toqsanyndaǵy atqarylǵan jumystardyń qorytyndylaryn baıandady.
Onyń aıtýynsha, mekeme ishki saýdany damytý jáne retteý, sondaı-aq tutynýshylardyń quqyqtaryn qorǵaý baǵytynda memlekettik saıasatty júzege asyryp keledi. Osy rette azamattardyń ótinishterin qaraý – negizgi basymdyqtardyń biri.
«2026 jyldyń alǵashqy úsh aıynda departamentke barlyǵy 3284 ótinish kelip túsken. Onyń ishinde 3006 ótinish «E-ótinish» platformasy men elektrondyq úkimet portaly arqyly joldanǵan. Túsken ótinishterdiń 769-y óz quzyreti sheginde basqa memlekettik organdarǵa jiberilip, 433 ótinishke túsinikteme berilgen, al 1054 ótinish qanaǵattandyryldy. Qabyldanǵan sharalar nátıjesinde tutynýshylarǵa qaıtarylǵan aqshalaı qarajattyń jalpy somasy 48,4 mıllıon teńgeni quraǵan. Bul kórsetkish respýblıka boıynsha joǵary nátıjelerdiń biri sanalady», dedi ol.
Janat Asantaevtyń aıtýynsha, halyqpen keri baılanys jumystary da júıeli túrde júrgizilip keledi. Máselen, Telegram-bot arqyly 55 suranys qabyldanyp, tutynýshylarǵa tıisti túsiniktemeler berilgen. Sondaı-aq, azamattardy jeke qabyldaý barysynda 116 azamattyń máselesi tyńdalyp, jedel jeli telefonyna 107 qońyraý túsken. Árbir ótinish boıynsha zań talaptaryna sáıkes keńes usynylǵan.
«Salalar boıynsha taldaý kórsetkendeı, ótinishterdiń basym bóligi bólshek saýda salasyna tıesili – 619 ótinish. Sonymen qatar, bilim berý salasynda – 420, medısınalyq qyzmet kórsetý boıynsha – 415, baılanys salasynda – 311, elektrondyq saýdada – 489 ótinish tirkelgen. Budan bólek, turmystyq qyzmet kórsetý salasy boıynsha 236, turǵyn úı-kommýnaldyq sharýashylyq salasynda 101, qoǵamdyq tamaqtandyrý boıynsha 71, týrıstik qyzmetterde 49, kólik qyzmetinde 24, qarjylyq qyzmet kórsetý salasynda 20 ótinish túsken. Al ózge sanattaǵy ótinishter sany 529-dy qurady», deıdi spıker.
Osy jyldyń úsh aıynda departament 48 kásipkerlik sýbektisine tekseris júrgizgen. Nátıjesinde tutynýshylardyń quqyqtary men zańdy múddeleriniń buzylý faktileri anyqtalyp, 48 kásiptik sýbektisine aıyppul salynǵan.
Tutynýshylyq nesıe naryǵyndaǵy qaýip: Bereshek kólemi nege ósýi múmkin?
Tutynýshylardyń quqyqtaryn qorǵaý maqsatynda halyq arasynda túsindirý jumystary turaqty júrgizilip keledi. Departament mamandary azamattarǵa keńes berip, tutyný saýattylyǵyn arttyrýǵa baǵyttalǵan jumystardy júzege asyrýda. Sonymen qatar, áleýmettik jelilerde aqparattyq jarııalanymdar turaqty túrde ornalastyrylyp keledi.
Tutynýshylardyń otandyq ónimge senimi artyp keledi – saýalnama