Premer-mınıstr Oljas Bektenov ortalyq memlekettik organdardyń, Básekelestikti qorǵaý jáne damytý agenttiginiń, «Samuryq-Qazyna» AQ basshylarynyń qatysýymen Ekonomıkany monopolııasyzdandyrý jónindegi komıssııanyń otyrysyn ótkizdi.
Onda Memleket basshysy Qasym-Jomart Toqaevtyń ekonomıkany odan ári yryqtandyrý men básekelestikti damytý, onyń ishinde taýar jáne sıfrlyq naryqtardaǵy kedergilerdi joıý, densaýlyq saqtaý, baılanys, elektr energetıkasy, tabıǵı monopolııalar qyzmetteri salasyndaǵy retteýdi jetildirý boıynsha qoıǵan mindetterin júzege asyrý máselesine erekshe nazar aýdaryldy.
Komıssııa Memleket basshysynyń «Ekonomıkany yryqtandyrý jónindegi sharalar týraly» Jarlyǵynyń oryndalý barysyn qarady. Basym baǵyttardyń biri – dári-dármekterdi naryqqa shyǵarý merzimin 3–5 jyldan 100 jumys kúnine deıin qysqartý. Densaýlyq saqtaý mınıstrligi preparattardy tirkeý men saraptamadan ótkizýdiń negizgi kezeńderin biriktiretin «biryńǵaı tereze» qaǵıdaty boıynsha kompozıttik memlekettik qyzmetti engizip jatyr. Halyqtyń ınnovasııalyq medısınaǵa keń aýqymda qol jetkizýin ári tehnologııalar transfertin qamtamasyz etý maqsatynda Komıssııa túpkilikti sıfrlandyrýdy júrgizý jáne satyp alýdyń barlyq negizgi tizbesine dárilik zattar men medısınalyq buıymdardy qatar engizý máselesin qarady.
Derekterdi Sáıkestendirý kodtarynyń bazasyna engizýge qajetti mobıldi qurylǵylardy verıfıkasııalaý máselesine de nazar aýdaryldy. Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev «Telekommýnıkasııalar naryǵyn jáne derekterdi óńdeý ortalyqtaryn damytý týraly» zań jobasy sheńberinde júrgizilip jatqan is-sharalar týraly baıandady. Verıfıkasııa rásimin zańnama arqyly naqty bekitý tirkeý júıesiniń ornyqtylyǵy men sıfrlyq ınfraqurylymnyń turaqty jumysyn qamtamasyz etedi.
Odan bólek elektrondyq qujat aınalymy júıeleri naryǵyn damytý jáne sıfrlyq sektorda básekelestik ortany qalyptastyrý baǵytynda atqarylyp jatqan jumys týraly habarlandy.
Investısııa tartý, jańa qýattardy iske qosý, tarıftik júktemeni teńestirý maqsatynda engizilgen Elektr energııasyn biryńǵaı satyp alýshynyń jumysyna qatysty suraqtar, sondaı-aq temirjoldaǵy kireberis joldardaǵy túıtkildi máselelerdi joıý jaıy talqylandy.