Ulytaý oblysynyń quramyna bar bolǵany eki aýdan kiredi. Sonyń biri – Ulytaý aýdany. Aýdanǵa keıingi úsh jylda 46 otbasy 166 múshesimen qonys aýdardy. Al bıyldyń ózinde aýdan ortalyǵy Jezdi kenti men Egindi, Qarsaqbaı aýyldaryna alǵashqy erikti túrde qonys aýdarýshylar kele bastady.
Keıingi eki jylda aýdanda 68 turǵyn úı salyndy. Byltyr Ulytaý selosynda 32 páterli, 10 páterli eki turǵyn úı, Jezdi men Qarsaqbaı kentterinde birneshe baspana salynyp, kezeń-kezeńimen paıdalanýǵa berildi. Sonymen qatar mamandardy tartý maqsatynda aýdan ortalyǵynda 12 oryndyq jataqhana ashyldy.
Eldi mekenderde demografııalyq jaǵdaıdy ornyqtyrý, eńbek áleýetin arttyrýda adam sanyn, sonyń ishinde túrli saladaǵy mamandar qataryn tolyqtyrý asa mańyzdy másele bolyp otyr. О́tken ǵasyrdyń toqsanynshy jyldaryndaǵy toqyraý shalǵaı aýyldardy ǵana emes, ónerkásibi shalqyp turǵan kent ortalyqtaryn da turalatyp tastady.
Jezdi kentinde 1997 jylǵa deıin 9000-12000 qaraly halyq turǵan. Ǵasyrlar toǵysynda bul kórsetkish belgili sebeptermen kúrt tómen túse bastady. Qazir munda bar-joǵy 2500 turǵyn qaldy. Osy turǵyda ońtústikten soltústikke qonys aýdarý memlekettik baǵdarlamasyn Úkimet ýaqtyly qabyldady. Sebebi baǵdarlamada maman kadrlar, jumys kúshi jetispeýshiligine qatysty kóptegen jeńildik qarastyrylǵan.
Jezdi kentinde baǵdarlama 2022 jyldan bastap júzege asa bastady. Qazir kentte turyp jatqan jeti otbasy osy baǵdarlama aıasynda kóship keldi. Biri Jezdi kenti aýrýhanasynda dáriger, endi biri mektepte fızıka, hımııa, matematıka pániniń muǵalimderi bolyp jumys isteıdi. Kóship kelgenderge memleket esebinen qyzmettik páter, jumys berilip otyr. Qyzmettik páter alǵandar tek qoldanylǵan qyzmet túrlerine tólem jasaıdy. Qonys aýdarǵan otbasy múshelerine birjolǵy járdemaqy beriledi. Aldaǵy ýaqytta qajet dep sanasa, berilgen úıdiń jarty aqshasyn úkimet tólep beredi, jarty aqshasyn ózi salady. Eger úı jaldaıtyn bolsa, jaldaý aqysy memleket esebinen tólenedi.
Jaqynda Túrkistan oblysynan qonys aýdarǵan ınformatıka pániniń muǵalimi úı satyp alyp, osynda qalatynyn jergilikti ákimshilikke málim etti. Áıeli de hımııa pániniń muǵalimi. Qos mamannyń kentte turaqtap qalýy, álbette qýantarlyq jaǵdaı.
Jaqynda Jezdi kentine qonys aýdarý baǵdarlamasy boıynsha kóship kelgen eki otbasyna Ulytaý aýdany ákiminiń orynbasary Almat Sakıpov jańa turǵyn úıdiń kiltin tabystady. Otbasylarǵa memleket tarapynan jan-jaqty qoldaý kórsetilip, turaqty jumyspen qamtyldy. Jas otbasylar negizgi qyzmetpen qatar qosymsha kásip bastap, aýdannyń áleýmettik-ekonomıkalyq damýyna óz úlesterin qosýdy maqsat etip otyr. Balalary mektep pen balabaqshaǵa ornalastyrylyp, túrli úıirmege jazyldy.
2024 jylǵa deıin Jezdi kentinde jańadan úı salynbaǵan. Qazir kentte ınjenerlik júıelerimen qamtylǵan zamanaýı jer úıler salynyp, 14 páter qoldanysqa berildi. Sonymen qatar Jezdi kentinde jańadan paıdalanýǵa berilgen sport keshenine bilikti mamandar tartý maqsatynda qurylysy aıaqtalǵan taǵy bir eki páterli turǵyn úıdi baǵdarlama aıasynda qonys aýdaryp kelgen otbasylarǵa tabystaý josparlanyp otyr. Osy baǵytta aýdannan ońtústik óńirlerge bos jumys oryndary jármeńkesine arnaıy delegat jiberilip, júıeli túrde túsindirý, nasıhat jumystary qolǵa alynǵan.
Ulytaý aýdanyna qaraıtyn Qarsaqbaı kentine de kóship kelgen bes otbasy jańa ortaǵa beıimdelip, eńbek etip jatyr. Bıyl ońtústik óńirden qonys aýdaryp kelgen alǵashqy azamattyń biri Erbol Tastambekov. Erikti túrde qonys aýdarý baǵdarlamasy boıynsha kóship kelgen otbasyna jańa turǵyn úı tabystaldy.
«О́zim elektrık mamandyǵy boıynsha jumysqa ornalasýǵa qujattar daıyndap jatyrmyn. Jubaıym Naǵıma ázirge úı sharýasynda. Úsh balam mektepke ornalasty, bireýi úıde, anasynyń tárbıesinde. Aldaǵy ýaqytta mal sharýashylyǵyn damytyp, óz kásibimdi ashýdy josparlap otyrmyn, – deıdi kópbalaly otbasynyń otaǵasy.
Bıyl da jaqsy is jalǵasyn taýyp, Ulytaý aýdany ortalyǵynda, Jezdi, Qarsaqbaı kentterimen qatar Baıqońyr aýylynda da jańa turǵyn úılerdiń qurylysy bastalmaqshy. Bul – halyqtyń turmys sapasyn jaqsartyp, eldi mekenderdiń damýyna serpin beredi.
Ulytaý oblysy