Sahna tynysy saraptaldy

Ǵabıt Músirepov atyndaǵy Qazaq memlekettik akademııalyq balalar men jasóspirimder teatrynda 2016 jyl­­dan beri turaqty túrde ótkizilip kele jatqan festıval alǵashynda balalarǵa arnalǵan qoıylymdar baıqaýy retinde bastalyp, ýaqyt óte kele aýqymy keńeıip, búginde teatr repertýaryn tolyqtyrǵan jańa spektaklderdiń kásibı deńgeıin baǵa­laı­tyn iri shyǵarmashylyq alańǵa aınaldy. Akterler men rejısserler arasyndaǵy kórkemdik básekeni kúsheıtti. Bıylǵy festıval osy úrdisti jalǵastyryp qana qoımaı, ony mazmundyq turǵydan tereńdete tústi. 2025–2026 jyldary teatr repertýaryna engen jeti jańa qoıylym bir sahnada toǵysyp, kórkemdik sapa men shyǵarmashylyq izdenistiń ózindik ólshemine aınaldy.

Festıval shymyldyǵy E.Shvars­tyń «Kúlbıkesh» ertegisimen túrildi. Bul qoıylym ǵana emes, teatrdyń negizgi muraty jas kórermendi tárbıeleý men estetıkalyq talǵam qalyptastyrý ıdeıasyn aıqyn kór­setken rámizdik bastaý boldy. Spektakl aldyndaǵy dýmandy is-shara, sırk ártisteriniń  óneri men ertegi keıipkerleriniń balalarmen júzdesýi teatr keńistigin naǵyz merekelik alańǵa aınaldyrdy.

Festıval baǵdarlamasy odan ári qaraı da alýan baǵyttaǵy qoıy­lymdarmen jalǵasty. Atap aıtsaq, «Qorǵansyz» spektakli ulttyq dra­matýrgııanyń tereń psıhologııalyq ıirimin ashsa, «Perzenthana» búgingi qoǵamdaǵy adam taǵdyry men moraldyq tańdaýlardy sahna tilimen jetkizdi. Al «Gamlet. Sońǵy kúnder» qoıylymy klassıkalyq mátinniń zamanaýı ınterpretasııasy arqyly kórermendi jańa oı keńistigine jeteledi. Klassıka men qazirgi zaman úndestigi «Shıe baǵy» men «Revızor» qoıylymdarynda aıqyn kórindi. A.Chehov dramasyndaǵy ýaqyt pen taǵdyr fılosofııasy názik berilse, N.Gogol komedııasy qoǵamdaǵy keleńsiz qubylystardy ótkir satıra arqyly áshkereledi. «Bári jaqsy...» spektakli festıvaldyń fınaldyq akkordyna aınalyp, qarapaıym ómirdiń astaryndaǵy kúrdeli mándi kórermenge sezindire bildi.

Qoıylymdarǵa Anar Erkebaı, Temýr Rashıdov, Tıgran Martırosıan syndy halyqaralyq deńgeıdegi sarapshylar kásibı baǵa berdi. Olardyń ár spektaklden keıingi taldaýlary teatr ujymyna baǵyt beretin mańyzdy baǵdar boldy. О́ner dýmanynyń mazmunyn baıytqan taǵy bir oqıǵa – kórermenmen tikeleı baılanys ornatýǵa baǵyttalǵan ashyq alańdar. Teatr foıesinde ótken fan-kezdesýler men spektaklden keıingi talqylaýlar ónerdi qabyldaýdyń jańa mádenıetin qalyptastyrdy. Kórermen endi baqylaýshy ǵana emes, shyǵarmashylyq úderistiń belsendi qatysýshysyna aınaldy.

Festıvaldyń jáne bir erekshe jobasy – «Teatr túni». Bul keshte kórermen sahna syrtyndaǵy tirshilikti kórýge múmkindik alyp, spektakldiń qalaı dúnıege keletinin, akter men rejısserdiń izdenisin kózben kórdi. Osy arqyly teatrdyń «tiri aǵza» ekeni taǵy bir márte dáleldendi.

Al festıval aıasynda ótken «80 jyldyq tarıh pen taǵylymdaǵy sahnalyq dástúr, akterlik mektep jáne kórkemdik mura» atty dóńgelek ústel teatrdyń ótkeni men búginin sabaqtastyrǵan taǵylymdy jıyn boldy. Onda Baıdilda Qaltaev, Mákil Qulanbaev, Altynbek Kenjekov syndy sahna sańlaqtarynyń murasy eske alynyp, ártisterdiń ulttyq teatr ónerindegi orny aıryqsha atap ótildi. Aıtýly tulǵalar atyndaǵy arnaıy júldeler taǵaıyndaldy. Atap aıtsaq, Altynbek Kenjekov atyndaǵy arnaıy júlde «Gamlet. Sońǵy kúnder» spektaklindegi Klavdıı róli úshin Edil Ramazanovqa, Mákil Qulanbaev atyndaǵy arnaıy syılyq «Shıe baǵy» qoıylymyndaǵy Leonıd Gaev beınesi úshin Jomart Zeınábilge, al Baıdilda Qaltaev atyndaǵy júlde «Revızor» spektaklindegi Dýanbasy róli úshin Erlan Káribaevqa tabystaldy.

Sonymen qatar qorytyndy keshte festıval jeńimpazdary anyq­talyp, úzdik akterlik jumystar men qoıylymdar arnaıy marapattar ıelendi. Osylaısha, «Altyn saqa-2026» festıvali qoıylymdar báıgesi ǵana emes, teatrdyń búgingi tynysy, kórkemdik deńgeıi men bolashaq baǵyt-baǵdaryn aıqyndaıtyn mańyz­dy mádenı alań ekenin taǵy bir márte dáleldedi.