Energetıka vıse-mınıstri Sanjar Jarkeshov elimizdiń munaı nysandary Iran tarapynan jasalýy múmkin shabýyldardan qanshalyqty qorǵalǵany týraly aıtty, dep habarlaıdy Egemen.kz.
Vıse-mınıstrdiń aıtýynsha, qazirgi ýaqytta munaı nysandaryndaǵy jumys yrǵaǵy buzylmaǵan jáne barlyq prosester qalypty tártipte júrip jatyr. Ásirese, eksporttyń negizgi kúre tamyry sanalatyn qubyr jelileri men júıeniń jumysyna eshqandaı kedergi keltirilmegen.
«Ártúrli ssenarııler konsorsıýmǵa qatysýshy barlyq tarappen birge qarastyrylyp jatyr. Qazaqstan óz múmkindikteri aıasynda barlyq mindettemesin oryndap keledi. Sonymen qatar tranzıt elder men energııa resýrstaryn tutynýshy memleketter de tıisti sharalardy qabyldaýda. Barlyq tarap prosestiń úzdiksiz júrýine múddeli», dedi vıse-mınıstr.
Qazaqstanda jańa alty munaı ken orny anyqtaldy
Sonymen qatar vıse-mınıstr geosaıası qaterlerge baılanysty nysandardyń qaýipsizdigin nyǵaıtý boıynsha naqty qandaı áskerı nemese tehnıkalyq sharalar qabyldanyp jatqany týraly saýalǵa da jaýap berdi. Ol nysandardy áskerı turǵydan qorǵaýǵa qatysty aqparattyń memlekettik qupııa ekenin, sondyqtan onyń egjeı-tegjeıi jarııalanbaıtynyn aıtty.
Eske sala keteıik, 29 qarashada Astana ýaqytymen 06:06-da Novorossıısk porty aýdanynda KQK-nyń teńiz ınfraqurylym nysandaryna shabýyl jasalǵan edi. Nátıjesinde teńizdegi qashyqtaǵy aılaq qondyrǵysy VPÝ-2 (qalqymaly tıeý qurylǵysy) aıtarlyqtaı zaqymdaldy.