Soltústik sportyndaǵy sony serpin

Aldymen boksshy Natalıa Bogdanova atoılap shyqty. Ulybrıtanııanyń Lıver­pýl qalasynda 2025 jyly ótken álem chem­pıonatynda Natalıa qarsylastaryn aıqyn basymdyqpen jeńip, eń bedeldi sanalatyn 70 kg salmaq dárejesinde chempıon atandy. Elimiz alǵan 7 altynnyń arqasynda komandalyq esepte qara úzip, basty qarsylasymyz – О́zbekstan quramasyn bir saty artta qaldyrdy.

1999 jyly Petropavlda týǵan Natalıa jastaı anasynan aırylyp, ájesiniń tárbıesin kórgen. «Otbasym erekshe ystyq, jarysqa shyqqan saıyn saǵynyp oralamyn», deıdi ol. Tabandy qyz bokspen qosa kıkboksıngpen aınalysyp, 2019 jyly osy sport túrinen sheber normatıvin oryndaǵan. 2022 jyly Azııa oıyndarynyń qola júldegeri atandy. Osy jarysta ózin qaırap, álem chempıony atanýdy maqsat etken. Talmaı tókken terdiń arqasynda sol bıikke qol jetkizdi. Elge jeńispen oralǵanda: «Qýanyshym qoınyma syımaı tur. Jattyqtyrýshym ekeýimiz eshteńege alańdamaı ter tógip, tabysqa jettik», dep aǵynan jaryldy.

Natalıanyń jeke jattyqtyrýshysy – Dastan Qabdenov. О́z isiniń sheberi ári shákirtterin qatań tártipte ustaıtyn bapkerdiń tabysy jyl saıyn artyp keledi. Ol – Kamıl Safın, Janat Jaqııanov, Darıǵa Shákimova syndy chempıondardy baptap shyǵarǵan Qyzyljar boks mektebiniń  tájirıbeli mamany.

Prezıdent Qasym-Jomart Toqaev Natalıa Bogdano­vany memlekettik nagradamen marapattady. Qazir qyzymyz ulttyq qurama sapynda kezekti jarysqa daıyndalyp júr.

Qyzyljar dańqyn asyrǵan erlerdiń biri – bıyl Italııanyń Mılan-Kortına-d’Ampesso qalalarynda ótken XIV Qysqy paralımpıadanyń chempıony Erbol Hamıtov. Oıyndardyń úsh túrine qatysqan Erbol aldymen shańǵy jarysynda qola júldemen qýantty. Al 13 naý­ryzda parashańǵyda otyryp jarysýdan Paralımpıada chempıony atanyp, el qorjynyna bıyl Qysqy Olımpıada oıyn­darynyń chempıony atanǵan Mıhaıl Shaıdorovtan keıin ekinshi altyndy áperip, barsha otandasymyzdy shattyqqa bóledi.

Ol 1997 jyly Qyzyljarda ómirge kelgen. Jambyl aýdanynan kóship kelgen ákesi Ǵalymkereı men anasy Ǵalııa qazir Petropavl qalasyndaǵy «Bereke» shaǵyn aýdanynda turady. Erboldan ózge bir ul, bir qyz tárbıelep otyr. Qarapaıym otbasynan shyqqan jalyndy azamattyń jetistigi talaı jannyń júregine ómirge qushtarlyq, bıik tabysqa umtylys shoǵyn úrledi.

Erboldyń ómir joly ońaı bolǵan joq. Aýylsharýashylyq tehnıkýmynda oqyp, djıý-djıtsýmen aınalysyp júrgen jas 2017 jyly buzaqylarmen qaqtyǵysta aıaǵynan oq jaraqatyn aldy. Saldarynan sol aıaǵyn tizeden tómen kestirýge májbúr bolǵan. Ony jaralaǵan bes qylmysker de ustalyp, tıisti jazasyn aldy.

Bıik beleske shyqqaly turǵan jas jigittiń úmiti úzilgendeı kúı keshti. Súıgen qyzy aınyp ketti, joldastary alystady, bapkeri de kózden ǵaıyp boldy. Ájesi ınfarkt alyp, atasy da aýyr qaıǵydan ómirden ótti. Tek ata-anasy men jaqyn týys­tary janynan tabylǵan azamat ómirden kúder úzbeı, jattyǵýyn jalǵastyra berdi. Ishki qýaty men qaısarlyǵyna sengen rýhty jigit aldymen baldaqpen, keıin protezben jattyǵa bastady. Oǵan MMA aralas jekpe-jek federasııasynyń Astanadaǵy jattyqtyrýshysy Sergeı Veselov pen federasııa prezıdenti Anatolıı Kım senim artyp, qurama jattyǵýynan qaldyrmady. Bahreınde ótken álem chempıonatyna grepplıngten qatysyp, júldeger atandy. 2019 jyly osy sporttan Azııa birinshiliginde ekinshi oryn ıelenip, UWW nusqasynda altyn medalǵa qol jetkizdi.

Alaıda jekpe-jektiń bul túri Paralımpıada baǵdarlamasyna enbegen edi. Sondyqtan Erbol qysqy sportqa bet burdy. 2022 jyly Beıjińdegi dodaǵa ulttyq qurama sapynda shyqqanymen, júl­dege ilige almady.

Bıylǵy Paralımpıadada tamasha óner kórsetip, aldymen qola, keıin altyn me­dal taqty. El mereıin ósirgen erdi Aqordada Memleket basshysy quttyqtap, «Barys» ordenin tósine qadady. Qasym-Jomart Toqaev jahandyq básekede Erboldyń altyn men qola medal jeńip alýy zor abyroı bolǵanyn atap ótti.

«Naǵyz chempıon atanyp, mereıimizdi ústem ettiń, Kók týymyzdy bıikte jel­birettiń. Bul – qazaq parasporty tarı­hyndaǵy úlken jetistik. Erbol halqy­myz­dyń qaısar, ór rýhty, namysty ult ekenin kúlli álemge pash etti», dedi Prezıdent.

Sonymen qatar Prezıdent HIV Qysqy Paralımpıadadaǵy joǵary sporttyq jetistikterine oraı Týrızm men sport mınıstrligine qarasty Dene múmkindikteri shekteýli tulǵalardy sportqa daıarlaý ortalyǵynyń bapker­leri Vasılıı Kolomıes pen Anton Jdanovıchke «Parasat» ordenin, teristiktegi «Úmit» sport klýbynyń jattyq­tyrýshysy Aslan Toqbaevqa «Qurmet» ordenin tapsyrdy.

Erbol – otbasyly azamat. Jary men eki qyzy onyń jetistigine qatty qýanyp otyr. О́zi qazir M.Qozybaev atyndaǵy ýnıversıtettiń stýdenti, kelinshegi – dáriger. Chempıonǵa oblys ákimi úsh bólmeli úıdiń kiltin tabystasa, elordalyq kásipker Nurlan Smaǵulov temir tulpar mingizdi, al GBG qurylys kompanııasy eki bólmeli páter syılady.

GBG kompanııasynyń basqarýshy dırektory Merýert Ádilbaeva men Erbol Hamıtov

Shal aqyn aýdanynan shyǵyp, qazir Qyzyljardaǵy arnaýly sport mektep-ınternatynda oqıtyn apaly-sińlili Krıstına, Inessa, Alına Shýmekovalar bolashaǵynan úlken úmit kúttiredi. Úsheýi de konkımen júgirýmen aınalysady. Krıstına bıyl jasóspirimder arasyndaǵy álem chempıonatynda 500, 1000, sondaı-aq 1 500 metrge júgirýden chempıon atandy. Álem kýbogi jolyndaǵy jarysta 2 altyn men komandalyq sprıntte kúmis medal oljalady. Onymen birge baq synaıtyn Varvara Glýhova da komandalyq sprıntte chempıon atandy.

Qyzdardyń úlkeni Inessa Álem kýbo­giniń fınalynda 1000 metr qashyq­tyqta top jardy. Krıstınanyń egizi Alına da ta­­laı halyq­aralyq arenada turaqty túrde júlde alyp júr. Bul daryndardy Olga Ihten­drıs pen Aleksandra Sýrovıatkına jat­­­tyqtyryp, jeńisti jolǵa bastap kele­di.

Naýryz merekesinde oblys ákimi Ǵ.Nur­mu­hambetov barlyq jeńimpaz, júl­deger sport­shylarǵa 1 mln teńgeden, Krıs­tına Shýmekovaǵa 3 mln teńge syıaqy tabystady.

Apaly-sińlili Shýmekovalar

Tabystyń qaınar kózi – sportshylar­dy qoldaý men jattyǵý oryndaryn ashyp, qam­qorlyq jasaý ekeni sózsiz. Petro­pavl­da 2015 jyly ashylǵan A.Vınokýrov atyndaǵy záýlim sport saraıy bar. Dóńgelengen ǵımaratty óńirdiń bas sport ortalyǵy deýge bolady. Munda hokkeıden, mánerlep syrǵanaýdan, ózge de sport túrlerinen respýblıkalyq jarystar jıi ótedi. 2348 sharshy metr alańy muzda jat­tyǵýshylarǵa qysy-jazy ashyq. Joǵa­ry­da atalǵan qyzdardyń bári osy muz arenasynda shyńdalady.

Byltyrǵy jeltoqsanda qalada uzaq ýaqyt jóndeýde turǵan tennıs ortalyǵy 400 mln teńgege jańartylyp, esigin aıqara ashty. «Tennıs korty halyqaralyq standartqa saı keledi. Onda oblystyq, respýblıkalyq qana emes, halyqaralyq jarystar da ótkizýge bolady. Qazir óńirde 2 myńnan astam sporttyq nysan bar, sonyń 43-i byltyr men bıyl ashyldy», dedi oblys ákimi. Bıyl jańa fýtbol stadıonynyń qurylysy da bastalady. Qoldaý bolsa, óńir sporty osylaısha qarqyndy damı beredi.

Soltústik Qazaqstan oblysy