Ulybrıtanııanyń astanasy – Londonda ústel tennısinen komandalyq álem chempıonaty ótip jatyr. Oǵan jer jahannyń ár qıyrynan jınalǵan 128 komanda (64 erler+64 áıelder) qatysýda, dep habarlaıdy Egemen.kz.
Qazaqstannyń erler quramasy (álemdik reıtıngte 25-oryndy ıelenip otyr) Londondaǵy komandalyq álem chempıonatyn sátti bastady. Tusaýkeser kezdesýde bizdiń jigitter Túrkııany (№58) tize búktirdi – 3:1. Jerlesterimizdiń arasynan Alan Qurmanǵalıev qana utyldy. Kırıll Gerasımenko eki básekede basymdyq tanytsa, Aıdos Kenjiǵulovtyń bir márte mereıi ústem boldy.
Kelesi oıynda Mysyrdyń (№16) jigitterin joldan yǵystyrdyq – 3:2. Bul joly da Gerasımenko erledi. Ol Omar Assar men Muhammed ál-Beıálıdi tize búktirdi. Qurmanǵalıev birde jeńip, birde jeńildi. Eskendir Harkıdiń Iýsýf Ábdelázızge áli jetpedi. Kóp keshikpeı Taılandty (№46) qapy qaldyrdyq – 3:1.
Ústel tennısi: Kırıll Gerasımenko el chempıonatynda úsh altyn enshiledi
Qyzdarymyz (№37) Brazılııaǵa (№10) ese jiberdi – 1:3. Zaýresh Aqasheva bir oıynda jeńiske jetip, ekinshisinde jeńildi. Sarvınoz Mirqadyrova men Jánerke Kóshkimbaeva qarsylastaryna ese jiberdi. Ekinshi kezdesýde Mońǵolııany (№73) erkin eńserdik – 3:0. Bul básekede Záýresh Aqasheva, Sarvınoz Mirqadyrova jáne Ánal Baqyt qarsylastaryna bas kótertken joq. Úshinshi básekede Chehııaǵa (№42) shań qaptyrdyq.