Jetisý jerinde taý týrızmi jaqsy damyp keledi. Oǵan dálel – bıyl da «Shagan Fest 2026» sporttyq-ekologııalyq festıvali dúrildep ótti. Myńdaǵan adam 2551 metr bıiktiktegi Shaǵan shyńyn baǵyndyrdy. Alys-jaqyn shetelden júzdegen týrıst keldi. Úshinshi jyl qatarynan uıymdastyrylyp otyrǵan aýqymdy shara tek týrıstik festıval emes, tabıǵatpen úndesken rýhanı qozǵalysqa aınalǵandaı.
Tańǵy salqynmen bastalǵan festıvalǵa ár óńirden kelgen sportshylar, týrıster, jastar, otbasylar jınaldy. Taýdyń etegin erekshe sergektik pen kóterińki kóńil kúı kernedi. Qatysýshylardy oblys ákiminiń orynbasary Marlen Kólbaev quttyqtap, festıvaldyń mańyzyna toqtaldy.
«Shagan Fest» – adamnyń tabıǵatpen baılanysyn tereńdetetin, taý týrızmin damytýǵa serpin beretin erekshe joba. Osyndaı sharalar arqyly jastardy belsendi ómir saltyna baýlyp qana qoımaı, týǵan jerdiń tabıǵatyn qadirleýge úndeımiz. Búgingi is-shara – tek shyńǵa shyǵý emes, erik-jigerdi shyńdaý, birlikti nyǵaıtý, óz múmkindigińdi synaý. Jetisýdyń tabıǵaty – halqymyzdyń baǵa jetpes baılyǵy. Ony qorǵaý – bárimizdiń ortaq mindetimiz», dedi ol.
Shynynda, óńirde keıingi jyldary taý týrızmi qarqyndy damyp keledi. Buǵan oblystyń tabıǵı áleýeti, kórkem taýlary, taza aýasy men biregeı landshaftary úlken múmkindik berip otyr. Jońǵar Alataýynyń baýraıyndaǵy kórikti shatqaldar, bıik shyńdar, sarqyraǵan ózender men alpilik shalǵyndar jergilikti turǵyndardyń panasyna aınaldy. Tipti elimizdiń túkpir-túkpirinen keletin saıahatshylardyń qyzyǵýshylyǵyn arttyryp otyr. Ásirese «Shagan Fest» sekildi aýqymdy festıvaldardyń uıymdastyrylýy aımaqtaǵy taý týrızminiń jańa deńgeıge kóterilgenin kórsetedi.
«Bizge bul úlken jańalyq boldy. Fıtnes-stýdııada jattyǵyp júrgende festıval týraly estidik. Alǵashynda azdap qobaljydyq. Biraq uıymdastyrýshylar qaýipsizdik erejelerin egjeı-tegjeıli túsindirip, baǵyt jóninde nusqaýlyq ótkizdi. Jol boıyndaǵy tabıǵattyń sulýlyǵy sharshaǵanyńdy umyttyrady eken. Shyńǵa jetken sáttegi sezimdi sózben jetkizý qıyn», deıdi reseılik saıahatshy Andreı Asıtov.
Festıvaldyń basty basymdyǵy – onyń kópshilikke qoljetimdiliginde. Jalpy uzyndyǵy shamamen 13 shaqyrymdy quraıtyn marshrýt kórkem tabıǵatymen ǵana emes, salystyrmaly túrde jeńil soqpaǵymen de erekshelenedi. Sol sebepti tájirıbeli alpınıstermen qatar, balalaryn ertken otbasylar, egde jastaǵy turǵyndar da qalys qalmady.
Jol boıynda qatysýshylardy tańǵajaıyp kórinister qarsy aldy. Bıiktegen saıyn kókjıekke sozylǵan jotalar, samal jelmen terbelgen alpi shalǵyndary men bultqa oranǵan asqar shyńdar erekshe áser syılady. Tabıǵattyń tynysyn sezingen ár adam úshin bul sapar fızıkalyq synaqtan buryn rýhanı serpiliske aınaldy. Festıvalǵa qatysqan sport ardageri, «Temiradam» ataǵynyń bes dúrkin ıegeri Baqytjan Bektenov Shaǵanǵa kóterilýdiń máni erekshe ekenin aıtty.
«Taý adamdy tárbıeleıdi. Bıikke kóterilgen saıyn sen ózińniń álsizdigińdi jeńesiń, erik-jigerińdi shyńdaısyń. Mundaı festıvaldar jastardy sportqa baýlıdy, tabıǵatty súıýge úıretedi. Ár shyń – jańa ómirlik maqsattyń belgisi. Sondyqtan búgingi joryq ár adamǵa kúsh-qýat, shabyt syılaıdy dep senemin. Onyń ústine, Jetisýdyń tańǵajaıyp tabıǵatyn álemge pash etýge taptyrmas múmkindik», dedi ol.
Taý týrızminiń damýy óńir ekonomıkasyna da serpin beretini daýsyz. Bul sala shaǵyn jáne orta bıznestiń damýyna, jańa jumys oryndarynyń ashylýyna yqpal etedi. Jergilikti turǵyndar qonaqúı, tamaqtaný, gıd qyzmeti, ulttyq ónimder satý sııaqty kásipterdi damytyp, týrızm arqyly tabys tabýǵa múmkindik alyp otyr. Oǵan dálel retinde Taldyqorǵan joǵary polıtehnıkalyq kolledjiniń oqytýshysy Andreı German mynandaı qyzyq oqıǵasymen bólisti.
«Bul jerge ekinshi ret kelip otyrmyn. Osyndaı festıvaldardyń atmosferasy múlde bólek bolady. Munda adamdar ortaq maqsatpen jınalady. Biri sportty baǵyt tutyp kelse, biri tabıǵat aıasynda demalýdy qalaıdy. Biraq bárin biriktiretin nárse – taýǵa degen súıispenshilik. Buǵan deıin sheteldik dostarymmen osynda 3-4 kún qonyp, serýendegenbiz. Jergilikti sharýalardyń qymyzyn iship, qurt-maıyn satyp alyp, dostarymmen qazaqtyń dástúrine qanyqqanbyz. Taýǵa birge kóterilýdiń ózi adamdy jaqyndastyrady», deıdi ol.
Festıval barysynda tek sporttyq belsendilikpen shektelmeı, qatysýshylarǵa túrli mádenı, oıyn-saýyq alańdary uıymdastyryldy. Ashyq aspan astyndaǵy karaoke alańy, arnaıy fotozonalar, demalys oryndary kópshiliktiń kóńilinen shyqty. Shyń basyna jetken árbir qatysýshyǵa arnaıy medal tabystalyp, estelik retinde erekshe syı jasaldy.
Is-sharaǵa týrıstik uıymdar men klýbtar da belsendi atsalysty. Atap aıtqanda, «Istokı», «Jońǵarııa» týrıstik klýbtarynyń tárbıelenýshileri jas týrısterge baǵyt-baǵdar berip, joryq mádenıetin nasıhattady. Uıymdastyrýshylardyń aıtýynsha, mundaı klýbtardyń qatysýy jastar arasynda taý týrızmine degen qyzyǵýshylyqty arttyra túsedi.
Odan keıin festıvaldyń mańyzdy bóligi ekologııalyq aksııamen jalǵasty. «Jetisý jastary» KMM dırektorynyń mindetin atqarýshy Arnaı Baıjurynov bastaǵan eriktiler taý bókterin qoqystan tazartýǵa kiristi.
«Tabıǵat bizge sulýlyq pen qýat beredi. Sondyqtan ony taza saqtaý – ár azamattyń paryzy. Biz búgin tek shyńdy baǵyndyryp qana qoımaı, tabıǵatty qorǵaýdyń naqty úlgisin kórsetip otyrmyz. Ekologııalyq mádenıet osyndaı áreketterden bastalady», dedi ol.
Shaǵan shyńyna kóterilgen júzdegen adamnyń júzinen qýanysh pen maqtanysh sezimi anyq baıqaldy. Sebebi «Shagan Fest 2026» festıvali Jetisýdyń týrıstik áleýetin taǵy bir márte kórsetti. Aıbyndy taýlar men kórkem tabıǵat aıasynda ótken shara ishki týrızmdi damytýǵa serpin berip, adamdardyń týǵan jerge degen súıispenshiligin arttyrdy. Shaǵan shyńy taǵy da talaı jannyń armanyn asqaqtatyp, jańa belesterge jeteleıtin rýhanı meken bolary sózsiz.
Búginde Jetisý taýlary – tabıǵat, saıahatsúıer qaýymnyń qalaýly, tartymdy baǵyty. Aldaǵy ýaqytta halyqaralyq deńgeıdegi festıvaldar men týrıstik jobalardyń kóbeıýi óńirdiń áleýetin odan ári arttyra túsedi. Jetisýdyń asqar taýlary tek tabıǵattyń kórki emes, el týrızminiń damýyna jol ashatyn mańyzdy ortalyqtardyń birine aınalady.
Jetisý oblysy