Beısenbiden jumaǵa qaraǵan túni Mehıkodaǵy áıgili «Asteka» stadıonynda fýtboldan HHIII álem chempıonatynyń shymyldyǵy túrildi. Alǵashynda osy jerde jarystyń ashylý saltanaty ótti. Keremet shoýǵa ulasqan shara, jantebirenterlik resmı rásim, tarıhı týrnırdiń tusaýkeser kezdesýin tamashalýǵa jankúıer kóptep jınaldy. 87 500 kórermendi syıdyra alatyn alyp stadıonda ıne shanshar oryn bolmady.
Dúbirli dop dodasynyń alǵashqy básekesi Meksıka men Ońtústik Afrıka Respýblıkasy (OAR) quramalary arasynda ótti. Bir qyzyǵy, bul komandalar osydan 16 jyl buryn álem chempıonatynyń tusaýkeser kezdesýinde kúsh synasqan edi. Atalǵan jarystyń 2010 jyly Afrıka qurlyǵynda uıymdastyrylǵanyn jankúıer- ler jaqsy biledi. OAR astanasy – Iohannesbýrgte ótken sol básekede teń esep tirkeldi – 1:1. Mine, endi araǵa jyldar salyp, olardyń joly qaıta qıysty.
«Astekadaǵy» aıqas bastalǵan bette Raýl Hımenestiń alań ıelerin alǵa shyǵarýǵa jaqsy múmkindigi boldy. Biraq onyń shirene tepken dobyn Ronven Ýılıams buryshtamaǵa buryp jiberdi. Kóp keshikpeı bıylǵy chempıonattaǵy alǵashqy goldyń qalaı soǵylǵanyn kórdik. 9-mınýtta dál qaqpanyń aldynda ortalyq qorǵaýshynyń aıaǵyndaǵy dopty tartyp alǵan Hýlıan Kınones qaqyrata soqqy jasady – 1:0.
Ekinshi kezeń bastalǵanda qarsy baǵyttaǵy qaqpaǵa quıyndaı júıtkip bara jatqan shabýylshyny erejeden tys tásilmen toqtatqan Iаıa Sıtholege brazılııalyq tóreshi Vılton Sampaıo qyzyl qaǵaz kórsetti. Bul jaǵdaı olarǵa qıynǵa soqty. Onsyz da oıyny júrmeı jatqan OAR-dyń odan keıin berekesi qashty. 67-mınýtta Hımenes aqyry degenine jetip, ekinshi goldyń avtory atandy – 2:0. Matchtyń sońyna qaraı taǵy eki oıynshy alańnan qýyldy. Olar – afrıkalyq Themba Zvane men meksıkalyq Sesar Montes. Al tabldodaǵy esep ózgerissiz qaldy.
Tań ata «A» tobyndaǵy kelesi komandalar – Ońtústik Koreıa men Chehııa quramalary Sapopandaǵy stadıonda jasyl alańǵa shyqty. Birinshi taımda qos komanda qansha jantalasqanymen, bir-biriniń qaqpa kiltin taba almady. Naǵyz «qyzyq» úzilisten keıin bastaldy. Tolassyz shabýyldardan keıin Vladıslav Kreıchı 59-mınýtta esep ashty – 0:1. Biraq bul jaǵdaı azııalyqtardy qanaǵattandyrmady. Olar dereý alǵa umtyldy. Eren eńbek esh ketken joq. Arada 8 mınýt ótkende Hvan In Bom tarazy basyn teńestirse, 80-mınýtta O Hen Gıý óz komandasyna jeńis syılady – 2:1.
Sóıtip, «A» tobynda 3 upaıdan oljalaǵan Meksıka men Ońtústik Koreıa fýtbolshylary alǵa shyqty. OAR men Chehııanyń qorjyny bos. Keshe túnde kórermender «V» tobyndaǵy Kanada – Bosnııa men Gersegovına quramalary arasyndaǵy oıyndy tamashalady. Búgin «D» tobyndaǵy AQSh pen Paragvaı, Aýstralııa men Túrkııa kúsh synasady.