Bıznesmender báıgesi

Qaraǵandyda «Qazaqstannyń úzdik taýary» kórme-baıqaýy ótti Qaraǵandy qalasynda «Qazaq­stannyń úzdik taýary» óńirlik kór­me-baıqaýy ótti. Otandyq ónimniń órisin keńeıtip, órkenin ósirýge baǵyttalǵan bul ıgi sharany ob­lys­­­tyq ákimdik, ónerkásip jáne ındýstrııalyq-ınnovasııalyq damý basqarmasy, sondaı-aq kásipkerler palatasy birigip uıymdastyrdy. «Mundaı kórmelerdi ótkizý – eń aldymen memlekettik ın­dýs­­trııalyq-ınnovasııalyq da­mý aıasynda biz qabyldaǵan baǵ­darlamalardyń iske asý barysymen naqty mysaldar negizinde tanysýǵa, jınaqtaǵan tájirıbeni zerttep jáne baıytyp, sonan soń baryp ony kún­de­likti jumysta paıdalanýǵa mol múmkindik be­redi», dedi kórme-baı­qaýdyń ashylý saltanatynda sóılegen sózinde Qaraǵandy oblysynyń ákimi Nurmuhambet Áb­dibekov. Qazaqstan Respýblıkasy Prezı­dentiniń «Prezıdenttiń «Al­tyn Sapa» syılyǵyn alýǵa arnalǵan konkýrs  jáne «Qazaqstannyń úzdik taýary» respýblıkalyq kórme-baıqaýy týraly» Jarlyǵyna sáıkes, jyl saıyn elimizde res­­pýblıkalyq jáne óńirlik «Qa­zaqstannyń úzdik taýary» kórme-baıqaýy ótkizilip keledi. Atalǵan sharanyń otandyq ónim shyǵarýmen shuǵyldanyp júrgen jeke jáne zańdy tulǵalardyń sharýasyna shabyt berip, básekege qabilettiligin arttyrýǵa kádimgideı septigin tıgizip júrgenin aıtpaı ketýge bolmaıdy. Qazirgi tańda kásipkerler mundaı kórme-baıqaý­dyń otandyq ónimniń sapasyn jetildirý, naryqtaǵy óziniń ornyn tabý jáne turǵyndar tarapynan yqylasqa ıe bolý syndy qat-qabat sharýada kóp kómegin tıgizip jatqanyn biraýyzdan aıtyp júr. Qaraǵandydaǵy el aýmaǵynda azyq-túlik jáne óndiristik-teh­­nıkalyq maqsattaǵy taýar shy­ǵaryp júrgen kásipkerler óz­de­ri­niń ónimderin kórmege qo­ı­y­p, jurtqa jarııa etýge tamasha múm­kindik aldy. Ortalyq saıa­baqtaǵy kórme-baıqaýǵa qara­ǵandylyq kásiporyndardyń 92 kórneki stendi qoıyldy. Kórme-baıqaýda «О́ndiristik maqsattaǵy úzdik taýarlar», «Tur­ǵyn­darǵa arnalǵan úzdik taýarlar» jáne «Úzdik azyq-túlik taýary» syndy negizgi úsh atalym boıynsha myqtylar anyqtaldy. «О́ndiristik maqsattaǵy úzdik taýarlar» atalymy boıynsha birinshi júldeni Buqar jyraý aýdanynyń «Bemer Armatýra» JShS jeńip aldy. Bul kompanııa jylýmen qamtý, munaı, gaz jáne óndiristiń basqa da salalaryna qajetti shúmekter shyǵarady. Qaraǵandynyń «Qaraǵandy metall ónimderi zaýyty» «Tur­ǵyndarǵa arnalǵan úzdik taýarlar» atalymy boıynsha ozyp shyqty. Qurylǵanyna 60 jyl bolǵan bul kásiporyn Qazaqstanda balalarǵa arnalǵan velosıped shyǵaratyn birden-bir zaýyt. Al «Úzdik azyq-túlik taýarlary» atalymynda Qaraǵan­dynyń «Eurasian foods» aksı­nerlik qoǵamynyń aldyna túser kompanııa bolmady. Bul kásiporyn 45 jyldan beri óziniń sapaly ónimderimen jurttyń yqy­lasyna ıe bolyp keledi. Qazirgi tańda olar shyǵaratyn otandyq aqýyz ónimi naryqta óte joǵary suranysqa ıe. Áleýmettik maqsattaǵy nysandar salýmen aınalysatyn «Aspap» óndiristik kooperatıvi turaqty jumys isteıtin kásiporyn sanatynda arnaıy syılyqqa ıe boldy. «Balqash-nan» JShS «Jyl jańalyǵy» atalymynyń arnaıy syılyǵyna ıe bolsa, «Qaragandanerýd» kompanııasy «Áleýmettik jaýapkershilikti bıznes» atalymy boıynsha marapattaldy. Oblystyń bıznes qaýymdastyǵy «Jyldyń aqparattyq jobasy» atalymyna isker jańalyqtardy jedel ári obektıvti túrde jetkizetin EKaraganda.kz saıty laıyqty dep tanydy. «Shaǵyn jáne orta bıznesti damytýǵa qosqan úlesi úshin» syılyǵy Saıran Syzdyqova men Saýda-óndiristik palata alqasynyń tóraıymy Nesip Seıitovaǵa tabys etildi. Al «Úlgili salyq tóleýshi» atalamynyń júldesine «Aıza» JShS ıe boldy. Kompanııa 1997 jyldan bastap memleket qazynasyna salyq tóleý salasynda abyroı-bedeline kir keltirmegen eken. Endi óńirlik kórme-baıqaýda báıgeniń aldyn bermegen qara­ǵandylyq kásiporyndar Astana qalasynda jyl sońyna qaraı ótetin «Qazaqstannyń úzdik taýary» respýblıkalyq kórme-baıqaýynda baq synaıtyn bolady. Qaırat ÁBILDINOV, «Egemen Qazaqstan».