Keshe Premer-Mınıstrdiń birinshi orynbasary Baqytjan Saǵyntaev Aýǵanstan Islam Respýblıkasynyń taý-ken ónerkásibi jáne munaı mınıstri Daýd Shah Sabamen kezdesti, dep habarlady Premer-Mınıstrdiń baspasóz qyzmeti.
Taraptar ekonomıkalyq jáne gýmanıtarlyq salalardaǵy yntymaqtastyq máselelerin talqylady.
Baqytjan Saǵyntaev Qazaqstannyń prezıdent Mohammad Ashraf Ǵanı men atqarýshy bılik basshysy Abdýlla Abdýlla basqaratyn Ulttyq birlik úkimetin qoldaıtynyn atap kórsetti. Ol eldiń jańa basshylyǵynyń aýǵan halqynyń ál-aýqatyn jaqsartýǵa baǵyttalǵan tolyqqandy reformalardy júzege asyra alatynyna úmittenetinin jetkizdi.
Kezdesýge qatysýshylar ekijaqty saýdanyń ulǵaıǵanyn atap ótti (2014 jyldyń qorytyndysy boıynsha eki eldiń arasyndaǵy taýar aınalymy 336,7 mln. dollardy qurap, 2013 jylmen salystyrǵanda úshten birden astamǵa ósti), degenmen, saýda-ekonomıkalyq yntymaqtastyq áleýetiniń áli de sońyna deıin ashylmaǵanyn tilge tıek etti. Osylaısha Daýd Shah Saba Qazaqstannyń aýǵan taýarlaryn jetkizýdi ulǵaıtý úshin qajet degenniń bárin jasaıtynyna senim bildirdi.
Saýda-ekonomıkalyq yntymaqtastyq jónindegi Qazaqstan-Aýǵan úkimetaralyq komıssııasy ekijaqty yqpaldastyqty ulǵaıtýdyń mańyzdy tetikteriniń biri bolyp tabylady.
Gýmanıtarlyq yntymaqtastyqqa qatysty Premer-Mınıstrdiń birinshi orynbasary Qazaqstannyń aýǵan jastarynyń ókilderi úshin bilim berý baǵdarlamasyn jalǵastyryp jatqanyn atap kórsetti. 2010-nan 2020 jylǵa deıingi kezeńde myńǵa jýyq aýǵanstandyq jas qazaqstandyq joo-larda bilim alatyn bolady. Bul baǵdarlamanyń jalpy quny 50 mln. AQSh dollaryn quraıdy. Degenmen, aýǵan tarapynyń suranysyna sáıkes Qazaqstanda baǵdarlamany uzartý máselesi qarastyrylýda.
Baqytjan Saǵyntaev sondaı-aq, kezdesý barysynda Qazaqstannyń Aýǵanstandy turaqtandyrýǵa baǵyttalǵan halyqaralyq kúsh-jigerge belsendi qoldaý bildiretinin jáne ol elge jyl saıyn gýmanıtarlyq kómek kórsetetinin atap aıtty.