Keshe Premer-Mınıstrdiń birinshi orynbasary Baqytjan Saǵyntaev Halyqaralyq gýmanıtarlyq kómek máseleleri jónindegi komıssııanyń otyrysyn ótkizdi, dep habarlady Premer-Mınıstrdiń baspasóz qyzmeti.
Tájikstandaǵy sel men sý tasqynynan zardap shekken halyqtyń basyndaǵy ahýaldy nazarǵa ala otyryp, komıssııa Qazaqstan Úkimetine ol elge resmı túrde gýmanıtarlyq kómek kórsetý jóninde keńes berdi. Tájikstannyń zardap shekken aýdandaryna et jáne sút konservileri, ósimdik jáne sary maı, qant, kúrish, metall prokaty men shıfer jetkiziletin bolady.
Aýa temperatýrasynyń kúrt kóterilýine baılanysty Tájikstannyń kóptegen taýly óńirlerinde muzdaqtardyń erýi kúsheıip, nóser jaýyndar sońy sel men sý tasqynyna aparyp soqtyrdy. Pıandj, Vahsh, Zeravshan, Kafırnıgan, Isfara jáne Isfana ózenderi basseınderiniń boıynda osyndaı kúrdeli jaǵdaı qalyptasyp otyr.