Jaqynda Qazaqstan Respýblıkasynyń Reseı Federasııasyndaǵy Tótenshe jáne ókiletti elshisi Zaýytbek Turysbekov Ýkraınanyń Reseıdegi Tótenshe jáne ókiletti elshisi Vladımır Elchenkomen kezdesti, dep habarlady elshiliktiń baspasóz qyzmeti. Kezdesýde ekijaqty áriptestikke negiz bolatyn máseleler jóninde pikir almasyldy. Ýkraına elshisi óziniń sózinde Qazaqstannyń EQYU-ǵa tóraǵalyq etýine joǵary baǵa bere kelip, elimizdiń halyqaralyq qaýipsizdikti qamtamasyz etýdegi is-qımyl men róline toqtalyp ótti.
Elshi Zaýytbek Turysbekov sol kúni, sondaı-aq, Astana jáne Almaty qalalarynyń Mıtropolıti, arhıepıskop Aleksandrmen de kezdesý ótkizdi. Arhıepıskop óz sózinde Qazaqstan basshylyǵynyń toleranttylyqty nyǵaıtý, eldegi etnıkaaralyq jáne dinaralyq kelisimdi saqtaý baǵytynda atqaryp jatqan jumystaryn joǵary baǵalady. Onyń pikirinshe, Qazaqstan dinı-rýhanı qundylyqtardy eń joǵary qoıatyn, sol arqyly óz elin órge súıreıtin el retinde kópshilikke úlgi bola alady.
“Egemen-aqparat”.