Shyǵys Qazaqstan oblysynyń Úrjar aýdanyndaǵy Olımpııalyq rezervke mamandandyrylǵan balalar men jasóspirimderge arnalǵan sport mektebiniń tárbıelenýshisi Almat Kebisbaev Máskeý qalasynda ótken álem chempıonatynan qola medalmen oraldy.
Álem birinshiligi úshin kúres qyrkúıek aıynyń 6-sy men 8-i kúnderi Máskeý qalasynda ótti. Oǵan elimizden 7 balýan, aýdanymyzdan 3 balýan qatysty. Mártebeli álemdik jarysta Almat qanjyǵasyna medal baılap, Reseıden elimizdiń kók baıraǵyn jelbiretip qaıtty. Ol óziniń jetistigine dán rıza. Osyǵan deıin Almat basqa da jarystarda júldeli oralyp, jaqsy nátıjeler kórsetken edi.
– Álem chempıonaty óte joǵary dárejede ótti, qarsylastarym da myqty boldy, biraq eshteńege qaramastan júldemen oraldym. Jattyqtyrýshymyzdyń eńbegi zaıa ketken joq dep oılaımyn, – deıdi Almat Kebisbaev.
Almattyń aıtýly jetistikterinde onyń bapkeri, Qazaqstannyń eńbek sińirgen jattyqtyrýshysy Boranbek Qońyratovtyń eńbegi bir tóbe ekeni sózsiz.
Al biz, úrjarlyqtar Almattyń jeńisine shynaıy qýanyshtymyz. Sporttyń qaı salasy bolsa da Olımpıadada baǵy janyp, el mereıin asyrsa, bizge odan artyq qýanysh joq. Balýandarymyzdyń top jaryp, medal enshileýiniń orny bir bólek.
Aýdan ákimi Baýyrjan Janaqov kilem jabylǵan úsh sáıgúlikti Almat Kebisbaev pen Darhan Baıahmetovqa jáne osy eki balýannyń jattyqtyrýshysy Boranbek Qońyratovqa tabys etti. Bul qýanysh, bul jeńis aýdanymyz úshin úlken abyroı. Jas balýandarǵa aldaǵy ýaqytta jarystarda úlken jetistikterge jetip, elimizdiń abyroıyn, dańqyn asqaqtata berińder demekpiz.
Zýhra TURAPOVA.