Zańmen bekitilgen bir-aq tý bar

Ol – Qazaqstannyń Kók baıraǵy Elbasymyz Nursultan Nazar­baev: “Biz táýelsizdikti ańsap za­ryǵa jettik. Endi sol táýelsizdiktiń qasıetti belgilerin de erekshe qadirleýimiz, qasterleýimiz kerek. Árbir azamat Qazaqstannyń Týyn, Eltańbasyn, Ánuranyn tumardaı qasıet tutýy qajet. Elimizdiń sy­nalatyn bir tusy osy”, – degen edi. Menińshe, osy synalatyn tus kelip jetken sekildi. Bizdiń bulaı deýimizge keıingi ýaqytta eli­miz­diń memlekettik rá­miz­derine qatysty qoǵamda oryn alyp otyrǵan keleńsiz jaǵdaılar sebep bo­lyp otyr. Qazaqstan Res­pýblıkasy Konstı­týsııasynyń 9-babyna sáıkes elimizdiń memle­ket­tik rámizderi – Týy, Eltańbasy jáne Ánurany. Qazaqstan Respýblıkasynyń aza­mattary, sondaı-aq Qazaqstan Respýblıkasy aýmaǵynda júrgen adamdar Qazaqstan Respýblıka­synyń memlekettik rámizderin qurmetteýge mindetti. Bul – Qazaqstan Respýblıkasynyń memlekettik rámizderi týraly zań talaby. Alaıda, bul zań talaptary barlyq jerde tıisinshe saqtalyp otyrǵan joq. “Vremıa” respýblıkalyq qoǵamdyq-saıası gazetiniń aǵymdaǵy jyldyń 9 qyrkúıegindegi sanynda “Trýsy vne zakona?” degen maqala jaryq kórdi. Onda Pavlodar qalalyq máslıhatynyń depýtaty Arman Alıakparov qalalyq dúkenderde elimizdiń Memlekettik týy beınelengen ishkıimderdiń satylyp jatqandyǵyna dabyl qaqqan bolatyn. Memlekettik rámizder – bul táýelsizdik pen egemendiktiń belgisi. Sonda eldigimizdiń belgisi – Kók baıraǵamyz baılaǵannyń belinde kete berýi tıis pe? Joq. Sonymen qatar, qazir elimizdiń birqatar basylymdary “otaý ishinen otaý tikken” jalaýlar týraly da ashyna jazýda. Ústimizdegi jyldyń 7 qyr­kúıe­ginde respýb­lıkalyq qoǵamdyq-saıası “Aıqyn” gazeti “Biz kók týly elmiz be, álde kóp týly elmiz be?” degen ma­qala jarııalady. Maqalada sońǵy jyldary, ásirese, Almaty kóshelerinde qazaqtyń Kók týyn emes, Shyńjań-Uıǵyr avtonomııa­lyq aýda­nynyń beıresmı rámizine aınalǵan, jarty aı men juldyz be­zendirilgen kógildir týdy avtokó­lik­teriniń aldyńǵy jáne artqy tere­zelerine ilip júrý úrdisi beleń alyp bara jatqany týraly da­byl qaǵy­lyp otyr. Ǵalamtordaǵy resmı máli­metterge sensek, atalǵan tý Qytaıda separatızm­niń nyshany retinde tanylǵan, sondyqtan da onyń qoldanylýyna tyıym sa­lynǵan. Eger de árbir kólikte adam óz ultyna sáıkes, syrttaǵy ata­jur­ty­nyń týyn ilip qoısa, bizdiń mem­le­kettiligimiz ben ulttyq azamat­tyǵymyz­dyń, táýelsizdigimiz ben egemendigimizdiń qaıda qalǵany?! Qazaqstan Respýblıkasynda zańmen bekitil­gen bir-aq tý bar. Ol – qazaqtyń Kók baıraǵy. Odan basqa tý moıyndalmaýy kerek. Sebebi, bul bizdiń egemendigi­mizge, táýelsizdigimizge nuqsan. Qazaqstan Respýblıkasynyń memlekettik rámizderi týraly zańynda, Qazaqstan Respýblıkasynyń Memlekettik týyn, Memlekettik eltańbasyn jáne olardyń beınelerin, sondaı-aq Qazaqstan Respýblıkasy Memlekettik gımniniń mátinin ornalastyrý erejesinde eldiń rámizderin qaıda jáne qaıtip paıdalaný kerektigi táptishtep jazylǵan. Al Qazaqstan Respýblıkasynyń Qylmystyq kodeksiniń 317-babyna sáıkes memlekettik rámizderdi qorlaǵany úshin qylmystyq jaýapkershilik belgilengen. Menińshe, el baıraǵyn ishkıimge tańý bul el rámizin qorlaý, al elimizdiń Kók baıraǵyn moıyndamaý eldigimizdi, táýelsizdigimizdi, ýnıtarlyǵymyzdy moıyndamaý dep túsiný kerek. Sondyqtan, qaı jerde jáne qandaı nysanda bolsyn, Qazaqstan rámizderi týraly zańnyń oryndalýyn qatań baqylaýǵa alyp, joǵaryda atalǵan faktilerdi zań sheńberinde tekserý qajet dep esepteımiz. Berik BEKJANOV, Nurlan О́NERBAI, Májilis depýtattary.