Almaty qalasyndaǵy Bostandyq aýdany aýmaǵynda oıyn avtomattary zaldarynyń zańsyz jumys istep turǵandyǵy jaqynda ótkizilgen tekseris kezinde anyqtaldy. Oıyn bıznesi týraly zańnamany qoldanýǵa qatysty tekseris júrgizgenge deıin Bostandyq aýdanynda shamamen qyryq oıyn mekemesi zańsyz jumys istegen. Atap aıtarlyǵy, kezekti tekseris nátıjesinde oıyn zaldarynyń kúndelikti kirisiniń – 100 myń teńgeni quraıtyny, al keıbir kezde bul somadan da artyq bolǵany anyqtaldy. Sonymen qatar olar salyq oryndaryna tirkelmegen, sáıkesinshe eshqandaı salyq ta tólemegen. Osyǵan qaramastan, Bostandyq aýdandyq salyq basqarmasy óz betinshe tekseris jasamaı, EQSJKD-ge jáne prokýratýraǵa aqparattyq habarlar jiberýmen ǵana shektelgen.
Bostandyq aýdanynyń prokýrory Ǵanı Seısenbıevtiń aıtýynsha, búginde joǵaryda atap kórsetilgen zań buzýshylyqtar úshin 13 adam jaýapkershilikke tartylyp, 300-den astam oıyn jabdyqtary tárkilengen. Bostandyq aýdandyq prokýratýrasynyń Almaty qalalyq IID-niń uıymdasqan qylmysqa qarsy kúres bólimimen birlesip, “Alfa” bılıard klýbyndaǵy tekserisi jáne ózge de is-sharalary óz nátıjesin berýde.
Sala mamandary oıyn zaldarynyń ıeleri órtke qarsy qarapaıym saqtandyrý erejelerin de qoldanbaıtyndyǵyn aıtady. Qynjylarlyǵy, jalǵa alynǵan bólmeler elektrondy jabdyqqa toltyrylyp, elektr qýatyn paıdalanǵan kezde qaýipsizdik tehnıkasy da saqtalmaıdy. Sonymen qatar oıyn bıznesinde qoldanylatyn jabdyqtardyń sanıtarlyq talaptarǵa jaýap beretinine jáne adam densaýlyǵyna qaýipsiz ekendigine kepildik joq.
Oıyn zaldarynyń ádette qaladaǵy kóp qabatty úılerdiń birinshi qabatynda ornalasatyny belgili. Kezdeısoq órt tutansa onyń kópshilikke úlken qater tóndirip, qaıǵyly jaǵdaıǵa ushyratatyndyǵy aıtpasa da túsinikti. Oıyn jabdyqtary Qazaqstanǵa eshqandaı qujatsyz jáne sapa sertıfıkatynsyz ákelingen. Zańsyz oıyn bıznesimen kúres is-sharalary jalǵasýda, keleshekte bul baǵyttaǵy zań buzýshylyqpen kúreste turaqty jumys isteıtin toptar da qurylmaq.
Baqyt BALǴARINA. Almaty.