Semeıdegi múgedek jandarǵa arnalǵan mekemelerdiń biri “Kómek” dep atalady. Jýyrda osy mekemege alystaǵy Shveısarııa elinen Maınrad Shade degen sýretshi arnaıy kelip atbasyn tiredi. Egemen el atanyp, Elbasy Jarlyǵymen Semeı atom polıgony jabylǵannan bergi kezeńde gýmanıtarlyq maqsatpen bul jaqqa kimder kelip ketpedi deısiz. Soǵan oraı, qazirde burynǵy polıgon aımaǵy túrli mazmundaǵy kómekten kende emes.
Solaı deı turǵanmen, bul jolǵy qonaqtyń Semeıge kelisiniń jón-josyǵy múldem bólek bolyp shyqty. Iаǵnı, onyń basty maqsaty “Kómek” birlestiginde tirkelgen polıgon aımaǵyndaǵy daryndy múgedek balalarǵa kómektesý eken. Osy maqsatpen qonaq mundaǵy jas talanttardyń shyǵarmashylyq jumystarymen jete tanysty. Sýret salyp, keste tikken, óleń shyǵaryp, án aıtqan jetkinshekter qonaqty tánti etti. Ol, sýretshi retinde ásirese, Arhat Shashtyǵarın esimdi jas talanttyń sýretterine zor qyzyǵýshylyq tanytyp, mynadaı sýretterdi salý meniń de qolymnan kelmeıdi dep aǵynan jaryldy.
Alystan kelgen qonaq polıgon aımaǵyndaǵy jas talanttardyń shyǵarmashylyq jumystaryna sheteldik qaıyrymdylyq uıymdarynyń nazaryn aýdarýǵa tyrysyp baǵamyn dep ketti. Qyryqtyń biri qydyr degen. Laıymda solaı bolyp, taǵdyrdyń tálkegine túsken jetkinshekterimizdiń juldyzy janyp shyǵa kelip jatsa, kánekı!
Dáýlet SEISENULY. Semeı.