Buǵan deıin habarlaǵanymyzdaı, Qyrǵyzstandaǵy parlament saılaýy aldyndaǵy ahýalmen tanysý úshin EQYU Is basyndaǵy tóraǵasynyń Arnaýly ókili, Parlament Májilisi Tóraǵasynyń orynbasary J.Káribjanov EO-nyń Ortalyq Azııa elderi boıynsha Arnaýly ókili P.Morel jáne BUU-nyń Ortalyq Azııadaǵy aımaqtyq ortalyǵynyń basshysy M.Encheımen birge 2010 jyldyń 13-15 qyrkúıegi aralyǵynda Qyrǵyz Respýblıkasyna baryp qaıtqany belgili.
Sapar barysynda halyqaralyq uıym ókilderi ótpeli kezeń ókimeti basshylarymen, saıası partııalar jáne úkimettik emes uıymdar ókilderimen, EQYU-ǵa múshe memleketterdiń dıplomatııalyq mıssııalary basshylarymen jaǵdaıdy jan-jaqty talqylap, konsýltasııalar aldy jáne halyqaralyq qoǵamdastyqtyń Qyrǵyz Respýblıkasyna qatysty sharalaryn úılestirý máselelerin qarastyrdy.
Qyrǵyz Respýblıkasynyń ótpeli kezeńdegi prezıdenti R.Otýnbaeva eldegi qaýipsizdik pen turaqtylyqty saqtaýdaǵy halyqaralyq qoǵamdastyqtyń jasap jatqan áreketterine, sonyń ishinde EQYU-nyń qazaqstandyq tóraǵalyǵynyń zań ústemdiginiń saqtalýy men ekonomıkany turaqtandyrý baǵytynda atqaryp jatqan naqtyly qoldaýlaryna rızashylyǵyn bildirdi. Birinshi vıse-premer A.Muralıevpen bolǵan kezdesýde eldiń ońtústik aımaǵyn qalpyna keltirý, ekonomıkany damytý, qysqa daıyndyq máseleleri talqylandy. Ortalyq saılaý komıssııasynyń tóraǵasy A.Sarıev saılaýǵa daıyndyqtyń barysymen tanystyrdy. 10 qyrkúıekte Qyrǵyzstanda saılaýaldy naýqany bastalǵan bolatyn. Elde shamamen 2 mln. 700 myń saılaýshy bar. Saılaýǵa 29 partııa qatysady. Baıqaýshy retinde EQYU DIAQB, EQYU PA, TMD PAA, ShYU, TúrkPA jáne basqa uıymdardan ókilder kelmekshi.
Reseı Federasııasy prezıdentiniń Qyrǵyzstanmen aradaǵy qatynastardy damytý jónindegi arnaýly ókili V.Rýshaılomen bolǵan áńgimede Qyrǵyzstandaǵy saılaý aldyndaǵy ahýal, ekonomıkanyń jaǵdaıy jáne eldegi saıası úderisterdiń damý perspektıvalary týraly pikir almasyldy.
ÚEU ókilderin saılaýmen qatar gýmanıtarlyq kómekterdiń ádiletti bóliný máseleleri tolǵandyrady eken. Ońtústik aımaqtardaǵy qurylys jumystaryna jarııalanǵan tenderlerdi ótkizýde sybaılas jemqorlyq jáne ahýaldy halyqtan jasyrýshylyq jaılary baıqalady. Elde IIM, sot jáne prokýratýra qyzmetkerleriniń biliksizdigi men sybaılastyǵy týraly jalpylama syndar kóp aıtylady.
OSK-de tirkelgen saıası partııalar ókilderin úgit úderisi bastalmaı jatyp ákimshilik resýrstardyń aralasýy men saılaý qorytyndysyn burmalaý isi qatty tolǵandyrýda. Olardyń oıynsha, bul – eldegi jaǵdaıdy turaqsyzdandyrýǵa ákeletin faktorlardyń biri.
Sapar qorytyndysy boıynsha EQYU, BUU jáne EO arnaýly ókilderi birlesken málimdeme jasap, onda halyqaralyq qoǵamdastyqtyń eldegi jaǵdaıdy turaqtandyrý isi boıynsha Qyrǵyzstannyń ótpeli kezeńindegi úkimetin jan-jaqty qoldaıtyndyǵy aıtyldy.
“Egemen-aqparat”.