Qyzyljarlyq dıqandar Elbasy tapsyrmasyn abyroımen oryndap shyqty
Memleket basshysy Nursultan Nazarbaev jumys saparymen astyqty ólkede bolyp egin alqabynda agroqurylym basshylarymen kezdeskende, bıyl da bıik meje alynatyndyǵyna úlken senim bildirgen edi. Sonda Qyzyljar óńiriniń dıqandary kemi 4 mıllıon tonna astyq jınaýǵa sóz bergen edi. Olar sertke saı serpin tanytyp, bergen ýádelerin abyroımen oryndap shyqty.
Sonymen, oblys kúzgi oraqty aldyńǵylardyń qatarynda uıymshyldyqpen aıaqtap, sátti qorytyndylady. 3,9 mıllıon gektar alqapqa ósirilgen egindi shashpaı-tókpeı jınap alý tolyq qamtamasyz etildi. Gektar berekesi 10,5 sentnerden aınalyp, 4,2 mıllıon tonna altyn dán qambalarǵa jóneltildi. Onyń 90 paıyzy 3 synypty quraıdy. Astyq tapsyrý áli jalǵasýda. Keler jyl ónimi úshin 546 myń tonna tuqym quıylyp alyndy.
Jaz qurǵaqshylyq bolyp, astyqqa attanys ádettegiden on kún erte bastalsa da qapysyz ázirliktiń arqasynda “áttegenaılarǵa” jol berilgen joq. Jaýapty naýqanǵa 10 myńǵa jýyq “qyr kemeleri” qatystyrylyp, kóp jerlerde astyqty tikeleı jınaý ádisi qoldanyldy. Kúzdiń janǵa jaıly ár kúni tıimdi paıdalanyldy. Qyzyljar jáne Aqjar aýdandary tanap shyǵymdylyǵyn 14 sentnerden asyrsa, Mamlıýt, Aqqaıyń, M.Jumabaev aýdandary da orta kórsetkishten joǵary ónim ala bildi.
Endigi kúsh-jiger memlekettik turaqtandyrý qoryn astyqpen qamtamasyz etýge jumyldyrylǵan. Respýblıka boıynsha onyń mólsheri 2 mıllıon tonna dep belgilense, oblysqa júktelgen tapsyrma 620 myń tonna. Kún ótken saıyn astyq tapsyrýshy sharýashylyqtardyń qatary qalyńdaı túsýde. “Azyq-túlik kelisim-shart korporasııasy” UQ AQ-tyń jergilikti fılıalyna úsh júzden asa agroqurylymnan ótinim tústi.
Soltústikqazaqstandyq dıqandar ishki rynokty azyqtyq bıdaımen qajetinshe ótep, nan jáne nan-toqash ónimderiniń negizsiz qymbattamaýyna úles qosýdy paryz sanap otyr.
О́mir ESQALI.
Soltústik Qazaqstan oblysy.