Podobedovanyń álemdik úsh rekordy

Qazaqstandyq aýyr atletshi dúnıe júziniń eki dúrkin chempıony atandy Úsh-tórt jyl buryn Re­seı­den kelgen Svetlana Podo­bedova óz otandastary tara­pynan talaı zábir, kemsitý­shi­lik kórdi. Eger ol Beıjińdegi Olımpııa oıyndaryna qatys­qanda, sóz joq, Qazaqstan qor­jynyna úshinshi altyn alqany syılaıtyn edi. Amal bar ma, Reseıdegi aýyr atletı­ka­nyń tutqasyn ustap otyr­ǵan sheneýnikter de, bapkerler de tastaı qatyp, qansha ret ke­lissózge shaqyrsaq ta ji­bimeı-aq qoıǵany. Arada bir jyldan keıin ǵana Svetlana iri jarystarǵa qatysý múm­kin­digine ıe boldy. 2009 jyly Oń­tústik Koreıanyń Goıang qalasynda ótken álem chem­pıo­natynda S.Podo­be­do­vanyń Qytaı, Reseı qyzda­ryn da shań qaptyryp, úsh birdeı álem rekordyn jasa­ǵa­ny sport dese ishken asyn jerge qoıatyn jankúıerlerge jaqsy tanys. S.Podobedova sársenbiniń sátinde Astana ýaqytymen keshki 20.00-de jarysqa shy­ǵýy tıis. Ekinshi qyzymyz, elimizdegi aýyr atletıkanyń da­mýyna on jyl boıy úles qosyp kele jatqan Tatıana Hro­mova da Svetlananyń namysyn janyp, birge óner kórsetpek. Qazaqstandyq jan­kúıerler Antalııadaǵy “Eks­po” sport arenasyna bardy. Sveta tis jarmaıdy, únsiz, mazasyn alýdy jón kórmedik. Sol kúni Qýanysh Rahatov er­ler arasynda 77 kılo sal­maq­ta “V” tobynda jarysqa qa­tysqan. Amal bar ma, ol jul­qı kóterýde 155 kılony ba­synan asyrǵanymen, kenetten jaraqat alyp, jarystan shyǵyp qaldy. Al bul salmaqta armıan sportshysy chempıon atandy. Ekinshi oryn qytaılyq atlette. Týrızm jáne sport mı­nıs­tri Temirhan Dosmuham­betovtiń aýyr atletter saıy­syna arnaıy kelip qatysýy sportshylardyń ǵana emes, barlyǵymyzdyń eńsemizdi kóterip tastady. Maıa Maneza alǵashqy altyndy ıelengende qasynan tabylyp, altyn al­qasymen jáne álem rekordy­men ózi quttyqtaǵan. Aýyr at­letıka federasııasynyń pre­zıdenti, osy salanyń órken­deýine ólsheýsiz úles qosyp kele jatqan Qaırat Turly­hanov sol sátte endigi úmit S. Podobedovada, onyń da óz rekordyn jańartýǵa múmkin­digi bar ekenin tilge tıek et­ken. Biraq Qaırat Bolatuly reseılik eki qyzdan da qaýip­tenetinin jasyrmaǵan. Jarys bastalar aldynda Týrızm jáne sport mınıstri Temirhan Dosmuhambetov pen basqa da delegasııa músheleri Svet­lanaǵa jiger berip, na­mysyn janady. Julqı kóterý. Qytaılyq Lı-Hııa úshinshi áreketinde 120 kılony kótere almady. Bela­rýs ókili Irına Kýleshına 120 kılony baǵyndyrdy. Is­pan qyzy Lıdııa Valentınniń joly bolmady. Ol 117 kılo­ny kótere almaı, jarys jo­ly­nan shyǵyp qaldy. N. Zabolotnaıa 127 kılony erkin kóterdi. S.Podobedova 130 kılony baǵyndyrǵan soń 134 kılony da erkin ıgerip, óz rekordyn birden eki kıloǵa jańartty. Serpe kóterý. Federasııa basshysy bosqa qaýiptenbegen eken. Saıysqa qatysqan on arýdyń armany – reti kelgenshe óz elderine lısenzııa upaıyn barynsha kóbirek alý. Onyń tártibi qarapaıym. 25-shi orynǵa deıin upaı berilmek. Júldeli oryndardyń upaılary da joǵary. Belarýs atleti Irına Kýleshova 140 kılo salmaqty qınalmaı baǵyndyrdy. Reseılik Nadejda Evstıýhına 155 kıloǵa tap­syrys bergen. Reseılik aýyr atletıka maman­dary­nyń taktıkany ózgertip jibergeni anyq boldy. Sirá, olar Podobedovanyń eren kúshi men ózderine degen salqyn qabaǵyn ańǵarsa kerek. Evstıýhına 150 kılony baǵyndyrǵan soń, Natalıa Zabolotnaıa 153 kılony basynan asyrdy. Svetanyń júıkesi myqty ekenine talaı kóz jetkizgenbiz. Qazir de baısaldy. Tórge shyqty da qolyn borǵa malyp alyp, 155 kılo ziltemirdi erkin kóterdi. Ekinshige Evstıýhına 157 kıloǵa tapsyrys bergenimen kótere almady. Natalıa Zabolotnaıa aıdy aspanǵa shyǵaryp, 160 kılony baǵyndyrdy. Bul – álem rekordyn qaıtalaý. Evstıýhınanyń ekinshi tynysy ashylǵandaı. Ol da 160 kılony kóterip, álem rekordyn qaıtalady. Reseılik jankúıerler bir-birin quttyqtap jatyr. Mine, syn sátte S.Podobedova salqynqan­dy­lyq tanyta bildi. Ol 161 kılony erkin kóterip, bárimizdi tańqaldyrdy. Dıktor túrik­she, aǵylshynsha “Fantastıka”, “Fantastıka” dep jatyr. О́zderi de baıqamasa kerek, jany­myzda otyrǵan jergilikti jankúıerler Qazaq­stan delegasııasyn quttyqtady. Qany bir túrik aǵaıyndardyń bul qýanyshyn jaqsy­lyqqa jorydyq. Sonymen, S.Podobedova úsh birdeı álem rekordyna túzetý engizdi. Munyń aldyn­daǵy rekordy 134, qossaıysta 161, jal­py kótergeni 295 kılo bolatyn. Al Antalııa­daǵy chempıonatta rekordyn ol birden úsh kıloǵa jańartty. Elimizdiń kók baıraǵy Antalııa tó­rin­de shalqydy. Osydan keıin Temirhan Dos­muhambetov aqparat ókilderine suhbat berdi. “Londonda aýyr atletter kem degende eki neme­se úsh altyn alýary tıis. Jumys osy baǵytta qurylýy kerek”, – degendi aıtyp qaldy mı­nıstr. Ol ótken joldaǵydaı úsh arýǵa da eli­mizdiń atynan eskertkish syılyqtar tapsyrdy. Svetlana jarys aıaqtalǵan soń BAQ ókil­derine suhbat berdi. “Ekinshi márte álem chem­pıony atanyp qana qoımaı, úsh birdeı rekord jasaǵanyma qýanyshtymyn. Federasııa prezı­denti Qaırat Turlyhanov, bas bapker Alekseı Nı, keńesshi Enver Túrkelerıge, jeke bapkerim Vıktor Nıge erekshe alǵysymdy aıtqym kele­di. Búgingi jarys aýyr boldy. Reseılik eki qar­sylasym syralǵy qurbylar. Natalıa Za­bolot­naıa julqı kóterýde 133 kıloǵa tapsyrys ber­gen­de, 134 kılony baǵyndyramyn dep oı­ladym. Bir múmkindigimdi buǵyp qaldym, ony Lon­donda paıdalanarmyn”,– dedi S.Podobedova. Keshe Vladımır Kýznesov 85 kılo salmaqta As­tana ýaqyty boıynsha 23.00-de arenaǵa shyq­ty. Al búgin A.О́teshov, A.Aborneva, álem chem­pıony V.Sedov baq synasa, erteń jarystyń soń­ǵy kúni I.Vashanov, S.Istomın básekege túsedi. Ońdasyn ELÝBAI, Egemen Qazaqstan” – Antalııadan.