Árıne, qala ishindegi dyń júrgizýshiden qujat suramaq túgili túrine de úńilip qaramaıtyny o bastan belgili. Kóshe boıynda turǵan MAI qyzmetkerleri de aýzy-murnynan shyǵyp, yńyranyp bara jatqan avtobýstardy toqtatyp, qujatyn tekserýdi artyq sharýa kóredi. Sodan bolar qala ishinde júıtkip júrgen avtobýstardyń shopyrlary tipten erkinsip ketipti.
Nebári úsh-aq kúnde ótken respýblıkalyq «Avtobýs» jedel-profılaktıkalyq is-sharasynda Taraz qalalyq IID jol-patrýldik qyzmeti №37 baǵyt boıynsha jolaýshy tasymaldap júrgen avtobýstyń eki júrgizýshisin ustady. Taraz qalalyq IID jol-patrýldik qyzmeti batalonynyń komandıri, polısııa maıory Baqytjan Joldasbekovtiń aıtýyna qaraǵanda, «Saıahat-99» JShS-ne tıesili bul avtobýs júrgizýshisiniń joldama qaǵazdary osy baǵytqa sáıkes kelmegeni bylaı tursyn, kóliktiń osy túrin júrgizýge eshqandaı qujattary bolmaı shyǵypty. Eń sumdyǵy, ózin óte dóreki ustaǵan 20 jastaǵy júrgizýshini medısınalyq tekserýden ótkizgende dárigerler oǵan esirtkige eltigen degen qorytyndy bergen. Sonda bul mekeme basshylary úshin avtobýs toly jolaýshylardyń taǵdyry bir tıyn bolǵany ma?
Erteńinde taǵy da 27 jastaǵy avtobýs júrgizýshisi ustaldy. Onyń da kólik júrgizýge quqyq beretin eshqandaı qujattary bolmaı shyqty.
Jergilikti polısııa qyzmetiniń málimetine qaraǵanda, osy «Avtobýs» is-sharasy kezinde 649 jol erejesin buzý faktileri anyqtalypty. Onyń ishinde júrgizýshiniń rólde ketip bara jatyp uıaly telefonmen sóılesýi, jol boıynda qaýipti manevr jasaý jáne jyldamdyqty arttyrýy óte kóp kezdesken. Osy tusta taǵy bir aıtary, jyl basynan beri Jambyl oblysynda oryn alǵan jol-kólik oqıǵalarynyń toǵyzynda kináli jaq oqıǵa ornynan qashyp ketipti.
Oralhan DÁÝIT,
«Egemen Qazaqstan».
Jambyl oblysy.