Dana Abaı aıtqandaı

Elbasymen birgemiz!

Qazaqstandyqtar N.Nazarbaevtyń Prezıdenttik ókilettigin uzartýdy qoldaıdy

Jolmuhan TÚRIKPENULY, Abaı atyndaǵy Qazaq ulttyq pedagogıkalyq ýnıversıtetiniń professory. Kóp nárse basshyǵa, jetekshige, istiń kózin biletin adamǵa baı­lanysty ekenin naqty ómirde aıaq basqan saıyn kóresiń. Qaı salada bolmasyn, úlkendi-kishili ujym­nyń basyna jaqsy adam kelse, úlken qabileti bar adal adam kelse, sol ujym eńsesin kóterip, qul­­pyryp shyǵa keledi. Isker adam ózi basqarǵan sharýashy­lyq­ty, uj­ymdy alǵa súıreıdi. Al elińe baılanysty bol­ǵan­da, Tuńǵysh Prezıdentimiz Nur­sul­tan Ábishuly Nazarbaevtyń uly kóshimizdiń tizginin ustap ot­yrǵanyna shúkirshilik etip, os­yn­daı adamnyń basshyń ekenin maq­tan etesiń. Ol jaıynda basqalar­dyń jaqsy aıtqanyna mereıiń óse­di. Osydan biraz buryn Tájik­stan prezıdenti Emomalı Rahmon­nyń: «Nazarbaevtaı basshysy bar qazaq halqy baqytty ǵoı» degen sózin estip kóńilimiz marqaısa, mundaı sózderdi qazir álemniń ár tusynan, nebir dýaly aýyzdardan estımiz. Munyń ózi qazir qalypty jaǵdaıǵa aınalǵandaı. Bul jaıynda tolǵanýǵa res­pýb­lıka jurtshylyǵy ókilderiniń elimizdiń shyǵysynda bas qosyp, Elbasymyz Nursultan Nazarba­ev­tyń ókilettigin 2020 jylǵa deıin uzartý jóninde usynys ja­sa­ýy, Qazaqstan Respýblıkasy aza­mat­taryna úndeý tastaǵany se­bep­shi bolyp otyr. Bul shaqyrýǵa respýblıka halqy tolyqtaı derlik qoldaý kórsetetinine kámil senemin. «Tolyq» demeı, «tolyqtaı der­lik» dep, az da bolsa, keıbir qarsy azamattardyń da taby­la­tynyn jasyrǵym joq. Ol da ómir zańdylyǵy. Olardyń óz pikirlerin bildirýlerine múmkindik jasa­ǵan da sol Prezıdentimiz Nazar­baevtyń basshylyǵymen ornyq­qan táýelsiz demokratııalyq mem­le­ketimizdiń paıda bolýy. «Aıdaǵany bes eshki, ysqy­ry­ǵy jer jarady» degen bar. Olar­dyń aıqaıy ájeptáýir, biraq ol­ar­dy qoldaıtyndar shamaly. Ony ótken prezıdent saılaýy kórset­ken. Halyqtyń Nursultan Nazar­ba­evty qanshasy qoldaǵanyn da jurt umytqan joq. Sol saılaýdan beri Prezıdenttiń bedeli halyq­aralyq aýqymda da, óz ishimizde de burynǵydan da artqany aıqyn, kúmánsiz. Ony jaqynda Astanada ótken EQYU Sammıti kezinde ál­em de moıyndady, halqymyzdyń da kózi jetti. Sol Sammıtten keıin Prezıdent Nursultan Nazarbaevtyń be­del-abyroıy álem aldynda, ha­lyq aldynda jańa bir beleske kó­te­­rilse, soǵan oraı oǵan qarsylar­dyń qatary myqtap seldiredi dep tujyrym jasaýǵa ábden bolady. Osyndaı kezde prezıdent saı­laýy óter bolsa, Elbasyna daýys berýshiler sany burynǵydan da artary kúmánsiz. Sony eskerip, Nursultan Na­zarbaevtyń prezıdenttik ókilet­ti­gin uzartýǵa baılanysty referendým ótkizý jóninde usynys aı­ty­lýy óte oryndy. Saılaý ótse, on­yń aıqyn basymdyqpen jeńiske jetetini shúbásiz. Sonda máse­le­niń saılaý ótkizýdeı shyǵyny da, aıqaı-dańǵazasy da mol naýqan­syz sheshilgeni jón-aq deısiń. Osy jerde sózimizdi danysh­pan Abaıdyń bizge ósıet retinde qaldyrǵan bir oıyn keltirýmen tujyrymdaýdy jón kórip otyr­myz. Uly babamyz óziniń otyz toǵyzynshy sózinde qazaqtyń boı­yndaǵy jaqsy eki minezdi atap kórsetip, sony joǵaltpaýdy aı­ta­dy. Tyńdaıyq: «Ol eki minezi qaısy deseń – áýeli – ol zamanda el basy, top basy degen kisiler bolady eken. Kóshi-qondy bolsa, daý-janjaldy bolsa, bılik solarda bolady eken. О́zge qara jurt jaqsy-jaman ózderiniń sharýa­sy­men júre beredi eken. Ol el basy, top basylary qalaı qylsa, qalaı bitirse, halyqta ony synamaq, birden-birge jú­girmek bolmaıdy eken. «Qoı asy­ǵyn qolyńa al, qolaıyńa jaqsa, saqa qoı», «Bas-basyńa bı bol­sań, manar taýǵa syımassyń, ba­salqańyz bar bolsa, janǵan otqa kúımessiń» dep, mal aıtyp, tileý qylyp, eki tizgin, bir shylbyrdy berdik saǵan, bergen soń, qaıtyp buzylmaq tú­gil, jetpegenińdi jetiltemin dep, jamandyǵyn jasy­ryp, jaqsy­ly­ǵyn asyramyn dep tyrysady eken. Ony zor tutyp, áýlıe tu­typ, onan soń jaq­sy­lary da kóp azbaıdy eken. Bári óz baýyry, bári óz maly bolǵan soń, shy­ny­menen jetesinde joq bolmasa, solardyń qamyn jemeı qaıtedi?». Buǵan qosyp-alý artyqtaý kó­rinedi. Qazaqı mentalıteti kem­shin­der ǵana muny túsinbeýi, qa­byldamaýy múmkin. Men sózimdi olarǵa arnap otyrǵanym joq, tú­sinetinderge aıtyp otyrmyn. Almaty.

Halyq qalaýy qapysyz

Mahambet aýdany jurtshyly­ǵynyń Elbasyna degen yqyla­synda shek joq. О́ıtkeni, Nur­sul­tan Nazarbaev 2002 jyly Aty­raý­ǵa sapary kezinde osy aýdanǵa arnaıy keldi. Jurtshy­lyqpen emen-jarqyn pikir aly­syp, óti­nish-tilekterin zeıin qoıa tyńdady. Sonan soń “Kelesi jyly Mahambet baba­myz­dyń 200 jyldyq mereı­toıyn IýNESKO deń­geıinde atap ótemiz. Soǵan deıin Mahambet aý­da­nyna deıingi jol aralyǵy kúr­deli jón­deýden ótedi. Sol kezde taǵy da kelip, ózderińizben júz­desemin, batyr ba­bamyzdyń me­reı­toıyn birge atap ótemiz” degen edi Elbasy. Aıtqandaı, bir jyldan soń El­basy Mahambet aýdanyna tur­ǵyn­dar qýanyshyn bólisýge keldi. Aýdan jurtshylyǵyn batyr ba­ba­nyń mereıtoıymen quttyqtady. Bul kezde qos oblysty bir-bi­ri­men jal­ǵaıtyn kúrejolǵa kúr­de­li jón­deý bastalyp, Mahambet aý­danyna deıingi aralyǵyna taq­taı­daı tegis asfalt tóselgen edi. Aýdan tur­ǵyndarynyń júzderine shýaq uıa­lap, Nursultan Nazar­ba­evty erekshe yqylaspen qarsy al­ǵanyna kýá bolǵanbyz. Sol yqy­las áli de sol qalpynda ekenine mine, taǵy kóz jetkizdik. El­basynyń prezıdenttik ókilet­tigin uzartýǵa baıla­nys­ty referen­dým­nyń bastamashy to­bynyń Úndeýin qapysyz qýattaǵan jıynda mahambettikter “Biz árqa­shan da El­basymen birgemiz! Nur­sultan Nazarbaev – bizdiń tańda­ýymyz! Pre­zıdentpen birge – abzal bolashaqqa, jańa tabystarǵa, jańa jeńisterge jeteıik!” degen ortaq ustanymǵa toqtady. Aýdan­dyq máslıhat hat­shy­sy A. Qur­manbaevtyń aı­tý­ynsha, elimizde iske asyrylǵan re­formalar men eko­nomıkalyq ór­leý – Elbasy Nur­sultan Nazar­ba­evtyń salıqaly saıa­satynyń jemisi. “Qazaqstanda álem elderi qy­zy­ǵatyndaı saıası turaqtylyq qa­lyp­tasty. Taıaý Shy­ǵystaǵy, al­ys-jaqyn shet elderde dúrkin-dúrkin dúrbeleńder men qaqtyǵystar oryn alsa, Qa­zaqstandaǵy ár túrli etnostar arasyndaǵy yntymaq pen birlikke syzat túsken joq. Bizdiń elimiz úshin yntymaq pen birlikten, tu­raq­tylyq pen tatýlyqtan qymbat nárse bolmaıdy” degen ony ardagerler keńesiniń tóraǵasy S. Táj­bentaı, bilim bóliminiń ádiskeri M. Bekımova, “Jas Otan” jastar qa­natynyń atqarýshy hatshysy Q. Qul­mashev, emhana dárigeri M. Ǵa­bıtovtar biraýyzdan qoldady. Qazaq munaıynyń alǵashqy tam­­shysy alynǵan Jylyoı aýda­ny­nyń turǵyndary Elbasyna uda­ıy arqa súıep júredi. Sebebi, Nursultan Nazarbaevtyń tikeleı yqpalymen aýdan aýmaǵyndaǵy “Teńiz” kenishin ıgerýge alǵashqy sheteldik ınvestor keldi. Kenishti ıgerý úshin qurylǵan “Teńizshevroıldyń” ál­eý­mettik demeýin aldymen osy aýdan jurtshylyǵy kóre bastady. Birlesken kásiporynnyń qarjy­laı qoldaýymen Saryqamys, Keń­aral aýyldary jańa mekenge qo­nys aýdardy. Endi bul kásiporyn aýdan ortalyǵy – Qulsarydaǵy aý­yz sý, kanalızasııa qubyrlaryn jańǵyrtýdy qolǵa aldy. Munyń bári Elbasynyń tikeleı tapsyr­ma­symen atqarylýda dep paıym jasaıdy jylyoılyqtar. – Elimizdiń ekonomıkalyq ór­ken­deý men bıik belesti baǵyn­dy­rýdaǵy órleýinde Tuńǵysh Prezıdentimiz Nursultan Nazarbaevtyń eren eńbegi bar. Shetelden ınvestısııa tartyldy. Eger shetel ın­vestorlary Elbasymyz Nursul­tan Nazarbaevtyń batyldyǵyna sen­bese, Qazaqstan ekonomı­kasy­na ın­vestısııa salar ma edi? En­di, mine, ekonomıkamyz órken jaı­dy, Qa­zaqstandaǵy turaqty­lyq jahan jur­­tyn qyzyqtyrady. Egemendigimiz ben kemeldigimizdi jalǵastyrý úshin biz, aqsaqaldar zaman tynysh­tyǵyn, urpaǵymyz­dyń áleýetti óm­ir súrýin qalaı­myz. Ol úshin Pre­zıdentimizdiń ókilettigin uzartý jó­­nindegi referendým ótkizýdi qol­daı­myn, – dedi aýdandyq ardagerler ke­ńesiniń tór­aǵasy Tilegen Kádirov. Al Atyraý qalasyndaǵy jı­yn­dy ashqan oblystyq máslıhat hat­shysy Jalǵas Dúısenǵalıev “Odaq ydyraǵannan keıingi qıyn kezeńde Qazaqstanda beıbit ómir saqtalyp qaldy. Elbasynyń sheteldik ınves­torlardy tartý jó­nin­degi bastama­sy baıandy bolyp, alpaýyt kompanııalar qazaq eline ozyq tehnologııa, jańa tehnıka men sheber mamandar ákeldi. El ekonomıkasy damydy, halyqtyń áleýmettik turmysy jaq­sardy” deı kele, Nursultan Nazar­baev­tyń ultaralyq tatýlyqty ny­ǵaı­tý, Qazaqstandy álemdegi kósh­bas­­shy memleketter qataryna qosý­da­ǵy jemisti eńbegin atap ótti. Munaıly óńir jurtshyly­ǵy­nyń qoldaýy munymen shektelip qalmaq emes. Ár aýdanda, ár aý­yl­da, ár ujymda Elbasy Nursultan Nazarbaevtyń ókilettigin 2020 jyl­­ǵy 6 jeltoqsanǵa deıingi mer­zimge uzartý úshin referendým ótkizý qa­jettigin qoldaǵan jıyndar jalǵa­sý­da. Nursultan Nazarbaevtyń qa­zaq eliniń damýy, kemel keleshegi úshin sińirgen eńbegin oryndy ba­ǵalaǵan halyq aldaǵy on jyldy Tuń­ǵysh Prezıdentpen birge jal­ǵas­tyrýdy qalaıdy. Joldasbek ShО́PEǴUL. Atyraý oblysy.

Kesimdi pikirge qosylamyn

Orazbaı ÁBIShEV, Sosıalıstik Eńbek Eri. Jaqynda kıeli Altaıda Memleket basshysy Nursultan Na­zarbaevtyń prezıdenttik ókilet­tigin 2020 jyldyń sońyna deıin uzartý jóninde alqaly jıyn bo­lyp ótti. Bastamashy toptyń bul usynysyna búginde respýblıka kólemindegi turǵyndar qy­zý qol­daý bildirýde. Ras, táýelsiz elimizdiń turaqty túrde damýyna, órkenıetti ty­nysh elde ómir súrýimizge Elba­sy­nyń qosqan úlesi orasan. Mun­daı jetistikke Ult Kóseminiń sarabdal saıa­satynyń arqasynda qol jetkizip, ýyzdaı uıyǵan baıan­dy tirshiligimizdi tórtkúl dúnıege pash ettik. Álemdik qarjy daǵdarysy ke­ze­ńinde de Prezıdentimiz tyǵy­ryq­tan shyǵa bilip, sala vedom­stvolaryna naqty mindetter júk­tedi. Sonyń nátıjesinde birneshe jarqyn jo­ba­lardyń ómirge kelýine jáne jumys orny sanynyń artýyna jol ash­yldy. Bul degenimiz, halyqtyń turmys-tirshiligi jaqsaryp, ónim­di­lik eselene tú­sedi degen sóz. Saryarqanyń tórinde búginde zaman talabyna jaýap beretin bir­neshe nysandar boı kóterdi. Kór­genderdiń kózi súısinetin ǵa­jaıyp osy ǵımarattar eńsesi bıik eldiń mártebesin asqaqtatyp tur. Memleket basshysynyń kezinde As­tanany qalyptastyrý jó­nindegi utymdy usynysy osylaısha óm­irsheńdigin dáleldedi. Aıta bersem, jaqsylyqqa to­ly isterimiz jeterlik. Sondyqtan osy jetistikterimizge jetýge tikeleı bastamashy bolǵan Nursultan Nazarbaevtyń prezıdenttik óki­let­tigin uzartý týraly kesimdi pikirge tolyqtaı qosylamyn.

Halqynyń baǵyna týǵan

Elbasy Nursultan Nazar­baev­tyń ókilettigin 2020 jylǵa 6 jel­toqsanǵa deıin uzartý maqsa­tynda búkilhalyqtyq referendým ótkizý jóninde respýblı­ka­lyq bastama­shy toptyń Úndeýi bú­ginde Batys Q­a­zaqstan obly­syn­daǵy Aqjaıyq aý­dany jur­tynyń da basty na­za­ryn­ da. «Aldaǵy onjyldyqta da Tuń­ǵysh Prezıdentimiz Nursultan Nazarbaevpen birge bolamyz!» – ál­eý­mettiń búgingi nıeti de, tilegi de osy. Elbasy N.Á.Nazarbaevtyń óki­lettigin 2020 jyldyń 6 jeltoq­sanyna deıin uzartýǵa arnalǵan respýblıkalyq referendým ótki­zý jónindegi bastamashy toptyń usy­nysyn qoldaýǵa arnalyp aý­dan­dyq máslıhat otyrysy ótti. Osynda jınalǵan depýtattar men úkimettik emes uıymdar ók­il­deri, jastar jetekshileri al­dyn­daǵy sózinde máslıhat hat­shy­sy D.Jaq­­sybaev bylaı dedi: – Elimiz táýelsizdiktiń 20 jy­lyna aıaq basty. Osy jyldar ara­lyǵynda Elbasynyń basshylyǵy­men ǵasyrǵa bergisiz jumystar atqarylǵanyn bilesizder. El da­mýy­nyń negizgi qujatyna aına­lyp otyrǵan «Qazaqstan-2030» Strategııasy nátıjeli orynda­lý­da. Nursultan Ábishulynyń bede­liniń arqasynda elordamyzda EQYU Sammıti ót­ip, Astana Deklarasııasy qabyldandy. Elbasynyń bıylǵy tarıhı Jol­daýyna oraı elimizde ındýs­trııalyq-ınnovasııalyq órleý dá­ýiri bastaldy. Búginniń ózinde 152 ındýstrııalyq joba iske qo­syl­dy. Sonyń ishinde bizdiń obly­symyzdan 5 joba bar. Táýelsizdik jolyna túsken syn saǵattarda Elbasymyz ózin qajyr­ly qaıratker, dana saıasatker retinde kórsetip, egemen Qazaqstan mem­leketiniń negizin qalady. Hal­qy­nyń baǵyna týǵan ol shynaıy Ult Kóshbasshysyna aınalyp otyr. Elimizdegi jetistikter Elba­sy­nyń bastamasymen qolǵa alynǵan baǵdarlamalardyń nátıjesinde jú­zege asýda. О́zi usynǵan baǵdar­lamalardy qalaı júzege asyrýdy Elbasynan artyq biletin adam bol­mas. Sondyqtan Kóshbas­shy­myzǵa múmkindik berýimiz kerek, deıdi batysqazaqstandyqtar. Bolat ESQALIEV, jýrnalıst. Batys Qazaqstan oblysy, Aqjaıyq aýdany.

Súıer ulyń bolsa eger

Jaqsylyq YSQAQOV, Soltústik Qazaqstan oblysynyń qurmetti azamaty, aqsaqaldar alqasynyń múshesi. О́z basym Semeı jerine eli­miz­diń barlyq aımaqtarynan jı­nal­ǵan bastamashy top múshe­le­riniń Qazaqstan Respýblıkasy­nyń Prezıdenti – Elbasy N.Á. Nazarbaev­tyń prezıdenttik ókilettigin uzar­týǵa baılanysty referendým ót­kizý jónindegi sheshimin dál osy­laı bolýǵa tıistideı salqynqan­dy­lyqpen, sabyrmen qabyldadym. Desek te, aramyzdan Ata Za­ńymyzda jazylǵandaı Qazaqstan Prezıdentiniń ári qaraıǵy óki­let­tigin jalpyhalyqtyq saılaý ar­qyly nege ulǵaıtpasqa deýshiler­diń tabylýy ábden múmkin. Iá, Qazaqstan Konstıtýsııasynda Pre­­zıdent jaıly arnaıy taraý bar. Onda memlekettiń basshysy, mem­lekettiń ishki jáne syrtqy saıa­sa­tynyń negizgi baǵyttaryn aıqyn­daıtyn, el ishinde jáne halyq­ara­lyq qatynastarda Qazaqstannyń atynan ókildik etetin eń joǵary laýazymdy tulǵanyń konstıtýsııa­lyq zańǵa sáıkes jalpyǵa birdeı, teń jáne tóte saılaý quqyǵy negizinde bes jyl merzimge saıla­na­ty­ny aıtylǵan. 1991 jylǵy 1 jel­toq­sandaǵy Tuńǵysh Prezıdent saılaýyn áli umyta qoıǵan joq­pyz. Aradaǵy bes jyldan keıin 29 sáýirde búkilhalyqtyq referendým arqyly prezıdenttik ókilet­ti­lik uzartyldy. Budan soń eki ret balamaly saılaý ótkizildi. Qaı-qaı­sysy bolsyn zańǵa qaı­shy em­es. Eń bastysy, bul saılaýlar N.Nazarbaevtyń halyqtyń úlken qol­daýyna ıe saıası kóshbasshy ekenin dáleldedi. Bul senim áli kúnge deıin joıylǵan emes. Jyl ótken saıyn Nursultan Ábishulynyń ustanǵan baǵytyn qyzý qoldap, sara saıasatyn qoldaýshylar qata­ry­nyń arta túskenin baıqaý qıyn emes. Al, bastamashy top Memleket basshysynyń ókilettigin ha­lyq­tyq referendým arqyly uzar­tý­dy nıet etse – oǵan árkim quqy­ly. Munyń ózi zaıyrly elge tán demokratııalyq qubylys, qundy­lyq ekeni daýsyz. Talaı saılaýdy bastan ótker­dik. Tartysqa toly saıası doda­lar­dyń bel ortasynda júrdik. Me­nińshe, bar másele saılaýǵa, bolmasa referendýmǵa tirelip turǵan joq. Ony ótkizý sonshalyqty qı­yn da emes. Tájirıbemiz de mol. Saılaý dál búgin ótse de halyq tańdaýy Táýelsiz Qazaqstanymyz­dyń Tuńǵysh Prezıdentine túseri anyq. О́ıtkeni, sonaý aýmaly-tókpeli kezeńde El Basshysyn qa­pysyz tanı bilgen qazaqstan­dyq­tar óz taǵdyrlaryn oǵan senip tapsyrdy, amanat etti. Sodan beri 19 jyl boıy ystyǵyn da, sýyǵyn da, jeńisin de, jemisin de birge kórip keledi. Tarıh úshin qas-qa­ǵym sát ishinde Qazaqstan álem moı­yndaǵan elder sanatynan oı­yp turyp oryn aldy. Prezıdent­tiń zor tabandylyǵy men orasan kúsh-jigeriniń, uıymdastyrý­shy­lyq talantynyń arqasynda tu­raq­ty damý jolyna túsip, ult­ara­lyq jáne konfessııaaralyq keli­sim­niń qazaqstandyq úlgisi qa­lyp­tasty. Alǵa qoıǵan óreli maqsat­tarymyzdyń oryndalyp, strate­gııa­lyq damý josparlarymyzdyń ózara úılesim tapqany bolashaqqa degen berik senimdi ushtaı túsedi. Tarıh betine altyn áripter­men jazylǵan Astana Sammıti El­basynyń halyqaralyq arena­daǵy abyroı-bedelin odan ári aspandata tústi. Eki kún boıy elordada jahandyq qaýip-qaterlerdiń aldyn alýda asa mańyzdy máse­lelerdi talqylap, qoǵamdyq qaý­ip­sizdiktiń tyń bastamalaryn aı­qyn­dap bergen VII Sammıt EQYU jumysyna tyń serpin berdi. Qa­zaqstan basshysynyń eýrazııalyq ıntegrasııalyq jáne álemdik pro­blemalardy sheshý jónindegi bas­ta­malary men usynystary oǵan qa­tysýshy memleket basshylary ta­rapynan keń qoldaý tapty. О́z basym Nursultan Ábish­ulyn kópten beri bilemin. Ony qazaqtyń baǵyna týǵan tulǵaly aza­mat retinde qadir tutamyn. Ja­ýapty qyzmetterde júrgende talaı ret júzdesip, iskerligine, adamı qasıetterine tánti bolǵan edim. Kóp jyl Pavlodar oblystyq atqarý komıtetiniń tóraǵasy bol­ǵa­nymda aqyl-keńesterin berip, sol kezde-aq kóshbasshylyqqa laı­yq ekenin moıyndata bilgen-tuǵyn. Qazaqstandyqtardyń qaı-qaı­sy­sy bolsyn elimizdiń turaqty da­mýyna, ekonomıkalyq jaǵynan qaryshtap alǵa basýyna, ult­ara­lyq tatýlyq pen kelisimniń bekı túsýine múddeli. Alda qanshama irgeli mindetter tur. Keleshegi kemel elimizdi Elbasynsyz elestetý múmkin emes. Hakim Abaı «súıer ulyń bolsa eger, súıenerge jarar ol» dep jyrlaǵandaı Nursultan Ábishulyndaı Elbasymyz, Kósh­bas­shymyz turǵanda eshteńege al­ań­damaımyz. Soltústikqa­zaqstan­dyq­tar qashanda Sizdi qoldaıdy. Biz Sizben árkez birgemiz! Soltústik Qazaqstan oblysy.

Kókeıdegi oıdy dóp basqan bastama

«Qazhrom» TUK» AQ fılıaly Aqtóbe ferroqorytpa zaýyty qa­shanda  «bir jaǵadan bas, bir jeń­nen qol shyǵaryp» kele jatqan ujym. Sondyqtan da bolar táý­elsizdiktiń eleń-alańynda da, ál­em­dik qarjy daǵdarysy etekke jar­masqanda da eńbek yrǵaǵynan jańylǵan emes. Kásiporynda ón­diristi keńeıtýdiń alǵysharttary jasalyp, Elbasynyń Aqtóbege sa­pary kezinde jańa sehtyń ir­getasyna kapsýl salyp ketkeni de kúni keshe ǵana. Sonda Nursultan Ábishuly zaýyt ujymyna úlken senim artqan-dy. Sol senimniń údesinen kórinýge baǵyt ustanǵan aksıonerlik qoǵam ujymy shy­ǵys­qazaqstandyqtardyń úndeýin bir kisideı jyly qabyldady. Osynda ótken  Elbasynyń prezıdenttik ókilettigin 2020 jyldyń 6 jeltoqsanyna deıin uzartý týraly respýblıkalyq referendým ótkizýge baılanysty jıynda bul másele shyn júrekten qoldaý tapty. Úsh júzden astam ju­mys­shy qatysqan jıyndy kirispe sóz sóılep ashqan  zaýyttyń ál­eýmet­tik máseleler jáne kólik bóli­miniń bastyǵy, bastaýysh partııa uıymynyń tóraǵasy Jamansary Maqashev táýelsizdik alǵan 19 jylda Elbasynyń ekonomıkalyq qýatty, saıası turaqty memleket qura bilgenin, búkil dúnıejúzilik qaýymdastyqtyń Qazaqstan atty irgeli eldi Nursultan Ábish­uly­nyń kóregendik saıasaty nátıje­sinde tanyp, moıyndaǵanyn atap ótti. EQYU-ǵa elimizdiń tóraǵa­lyq etkenin, Astana tórinde EQYU Sammıtin bir demde sátti ótkizgenin, Astana Deklarasııa­syn qabyldaýǵa uıytqy bolǵa­nyn tarıhı oqıǵa dep baǵalap, Elba­synyń álemdik deńgeıdegi saıa­sat­shy ekenine toqtaldy. Osy baǵytta oıyn sabaqtaǵan Aqtóbe ferroqorytpa zaýytynyń dırektory Murat Muqashev  Pre­zıdenttiń elimizdegi birlik pen tatýlyqtyń, ekonomıkalyq damý men saıası turaqtylyqtyń birden-bir kepili ekenine nazar aýdardy. – Biz  Nursultan Ábishulyn za­manymyzdyń asa iri saıasatkeri dep bilemiz. Prezıdenttiń ókilet­ti­gin 2020 jyldyń 6 jeltoq­sa­nyna deıin uzartý jóninde referendým ótkizý týraly bastamany qýana qoldaımyz. Bul kóptiń kókeıindegi kórikti oı ekeni shyn­dyq. Qazir elimizdegi ishki jalpy ónim Ortalyq Azııa memleket­te­riniń kórsetkishinen 1,5 ese ar­tyq. Elbasynyń jer betinde beıbitshilik pen qaýipsizdikti qamta­ma­syz etýdegi orasan eńbegin bú­kil álem moıyndady. Bizdiń Prezıdentimizge memleketimizdi qa­lyp­tastyrý barysynda úlken jaýapkershilik júkteldi. Bul mindetti qaıyspas qara nardaı alǵa tarta bildi. Qazaqstan ekonomı­kasy Elbasymyzdyń strategııa­lyq kóregendigi, tabandylyǵy men eren erligi arqasynda ny­ǵaı­dy. Qazir halyq Prezıdenttiń ál­eýmettik-ekonomıkalyq salada jú­­zege asyrǵan isteriniń jemisin kórip otyr. Sondyqtan da súıikti Prezıdentimizge degen senim mol, kóńil nyq, – dedi ol. №23 peshtiń brıgadıri Dáýken Raıysov, qaıta óńdeý sehynyń bastyǵy Myrzaǵul Quldybaev, oblystyq máslıhattyń hatshysy, «Nur Otan» HDP oblystyq fı­lıalynyń tóraǵasy Balǵalı Ordabaev elimizdiń álemge tany­lýyn, erteńimizge degen senimniń nyǵaıýyn, memleketimizdiń bede­liniń kóterilýin Elbasy esimimen sabaqtastyrdy. Qazaqstandy mekendegen barsha ulttar men ul­ystardyń birligi men tatýlyǵyn nyǵaıtýdaǵy qol jetken jetistikti Nursultan Ábishulynyń kóre­gen­dik bastamalarynyń nátıjesi dep málimdedi. Jıynda sóıleý­shiler Elbasynyń Prezıdenttik ókilettigin uzartý arqyly  basta­ǵan isterin baıandy etýge múm­kin­dik beriletinin basa aıtty. «Qazhrom» TUK» AQ fılıaly Aqtóbe ferroqorytpa zaýyty ju­mysshylarynyń jınalysynda Qa­zaqstan Respýblıkasynyń Prezıdenti Nursultan Nazarbaevtyń ókilettik merzimin 2020 jylǵy 6 jeltoqsanǵa deıin uzartý jóninde  búkilhalyqtyq referendým ótki­zý týraly bastamasyn qoldaý boı­­ynsha úndeý qabyldandy. Ún­deý­de zaýyt ujymynyń Qazaq­stan­nyń Tuńǵysh Prezıdenti Nur­sultan Ábishuly Nazar­baevty bar­lyq iste de qoldaıtyny aı­tyl­dy, ferroqorytýshylar qa­zaq­standyqtardy búkilhalyqtyq referendým týraly bastamany qoldaýǵa shaqyrdy. Satybaldy SÁÝIRBAI. Aqtóbe oblysy.

Emenniń ıir butaǵy

41 jyl ásker sapynda júrgen sardar, Halyq Qaharmany, QR Áskerı ınspeksııasynyń Bas qolbasshysy, general Ba­qytjan ERTAEVQA Jańa jyldyq merekege sanaýly kúnder qalǵanda jolyqqan edik. – Baqytjan Ertaıuly, Siz Jańa jyldy beıbit kúnde qarsy alýdyń qadirin biletin adamsyz ǵoı. – Aldymen mynany aıtqym keledi. Tarıhsyz el joq. Biz rýhty, abyroıly, namysqoı, arýaqty halyqpyz. Keń baıtaq elimizdi ata-babalarymyz, batyrlarymyz jan berip, qan tógip júrip qorǵap, bizge qaldyrdy. Jerimizdiń keńdigi jóninen álemde toǵyzynshy oryn alamyz. Qandaı baqytty ha­lyq­pyz! Sol baqyttan aıyrylmaýymyz qajet. Sol ba­qytty alǵa jetelep alyp kele jatqan bizdiń Tuń­ǵysh Prezıdentimiz. Elimizdiń júregi – Astana. Osy sheshimge bastamashy bolǵan, qıyn jaǵ­daıda sheshim shyǵarǵan kim? Elbasy! Saıası ókimet shashyrap, ózge ulttyń ókilderi atajurtyna aýyp jatqanda As­tanany qurýǵa bel býdyq.  Osynyń bári tarıhtyń óne boıynda kórgen qıynshylyqtarymyz ben qasi­retimiz­diń óteýi, ata-babalar arýaǵy­nyń qol­daǵany. Kúni keshe ǵana Baý­keńniń basyna baryp Quran baǵysh­ta­typ qaıttym (24 jeltoqsan B.Mo­mysh­uly 100-ge tolǵan kún). Biz osyndaı ha­lyqpyz. О́li rıza bolmaı, tiri baı­y­maıtyndyǵyn biletin halyqpyz. Jyl aıaqtalǵan saıyn aldymen kórgen jaq­sylyq­tary­myz­dy aıtamyz. Jańa jyl­da da Alla bizdi aby­roısyzdyqtar men keleń­siz­dikterden saqtaǵaı! – Áńgimeni ózińiz eldikke, bútindikke buryp qal­dyńyz. Jýyrda sizdi О́skemen qalasynda Elbasynyń ókilettiligin uzartýdy qoldaǵan yn­taly toptyń qatarynan kórdik. Osy bastamaǵa shyn máninde ne túrtki boldy? – Men sardar retinde aıtaıyn. Bizdiń osyǵan deıin kórgen qıynshylyǵymyz az emes. Endi osy jaqsy kúnniń jalǵasqanyn, jetistikterimizdiń kemeldene túskenin qalaımyz. Ony halyq ta kókseıdi. Osy kúnge bizdi jetkizgen, kóregen kóshbasshy bol­ǵan Elbasy – bizdiń Joǵarǵy Bas qolbasshymyz. Ol kisi bizdi jarty jolda qaldyrmaýy qajet. 2020 jyl­ǵa ol kisi bizdi jetkizýi qajet. Oǵan deıin de óser-óner elimiz bar. О́sip kele jatqan jastarymyz, býyny bekip jatqan urpaǵymyz bar. Men danyshpan emespin. Biraq bútindelgen kezimizde jamanymyzdy jasyryp, jaqsymyzdy asy­rýymyz kerek. Biraq, kemshiligimizdi de betke aıtqan jón. Osydan jıyrma jyl buryn qandaı edik, qazir qandaı boldyq. Shashyrap, toıyp tamaq ishe almaı qınalǵan kezeńder de boldy ǵoı. Qazir árkimniń úıinde eki máshıneden bar. Eshkim jyrtyq shapan kıip júrgen joq. Qanaǵat kerek. Munan da jaqsy kúnderge qanaǵatpen, aýyzbirshilikpen jetemiz. Ol qanaǵat bir kúndik emes, keleshek úshin bolýy tıis. – Táýelsizdiktiń de 20 jyldyǵyna qadam bas­qaly turmyz. О́tkenge oısholý jasaǵanda endi neniń bitkenin kókseısiz? – Buryn áskerı okrýgter bolmaǵan edi. Men shtabtyń bastyǵy bolyp júrgende osy en-baıtaq dalany ata-babalarymyz qalaı alyp qaldy dep oılaıtynmyn. Myna jaǵy Zaısannan Semeıge deıin, Qorǵas pen Otarǵa deıin lyq tolǵan áskerı bólimder bolǵanymen, basqa tusymyzda áskerı okrýgter bolmady. Qazir táýbe, memleketimizdiń tórt qıyrynda da áskerı okrýgterimiz bar. Endi árkim óz ornynda óz jumysyn sapaly, adal atqarsa – qol jetkizgen tabystarymyz jalǵasady. – Esińizde qalǵan eń jaqsy Jańa jyl qaısy? – Áli esimde, 10 jasymda Jańa jyl dastar­ha­nynan úlken tortty kórip qýanǵanym bar. Balalyq qýanysh qoı. Bul qalaı dep, tań qalsańyz da aı­taıyn. Odan keıingi jaqsy bir Jańa jyl Aýǵan dalasynda boldy. Qan maıdanda, bógde elde júrip, qazaq jigitterimen poıyzda ketip bara jatyp, merekeni qarsy aldyq. «Aǵa, bizdiń elimizge Jańa jyl birneshe saǵat buryn keldi. Elimizdiń amandyǵy úsh­in tilek tilep, toılaıyq», dep jigitter jú­rek­jar­dy sózderin aıtyp, án shyrqap otyrǵanymyz esimde. Al bıylǵy jyl halqymyz úshin de, qara basym úshin de jaman bolǵan joq. Ulym úılendi. Jańa jyldy óz shańyraǵymda qarsy alǵandy jaqsy kóremin. – Qandaı qıyndyq kórsem de, ádiletsizdikke dýshar bolsam da eshkimdi kinálap, ǵaıbattaǵan emespin deısiz. – Er jigittiń basyna ne kelip, ne ketpeıdi?! Aý­yrdy kórmegen adam, jeńildiń qadirin qaıdan biledi. Qandaı qyspaq kórsem de, jala ja­bylsa da Elbasyn da, eldi de ja­mandaǵan emespin. Birde aıt­qa­nym bar eken: «Batyr taqqa talaspaı­dy, batyr taqty qorǵaıdy». Biz sar­darmyz. Biz sarbazbyz. Eldiń tynysh­tyǵy men baqýattylyǵy úshin qyzmet etýge ant bergen adamdarmyz. Er adam eki ret ant bermeıdi. Basyma qı­yn­shylyq túskende adaldyǵyma sengen adamdar, maıdandas jigitter meni qol­dady. Sy­naqty kúnderdiń ótýin sa­byr­men kút­tim. Talaı bıikke kóterilip, talaı tó­men quldılap, bıigime qanshama ret kóterildim... – Siz úshin búkil ómir taǵdyr talqysy sekildi deısiz ǵoı. – ...Osyny aıtqym kelmegen edi. 10 aılyǵymda ákemnen qaldym, basymnan sıpap qamqor bolǵanyn kóre almadym. Biraq, alaqandaı aýyl meni tár­bıeledi. Tabıǵaty meni aıalap ósirdi. Baýyrjandaı batyrdy týǵan bizdiń aýyldyń tabıǵaty da erekshe. Shaqpaq pen Kúıik asýynyń arasy Baýkeńniń minezi sekildi. Sol aýyldan 8 general shyqqan. Osy aýyldyń bastalǵan tirligi, kóteriletin shańyraǵy, tipti shabylatyn shóbine deıin batasyz júrmegen. Sol tilek er balaǵa da aıtylady. Eldiń tilegimen, nıetimen jetildik. – Bir oblystyń, bir aýdannyń nemese aý­yl­dyń batyry bolmaıdy desedi. Batyr ortaq. Bi­raq, aınalyp kelgen ár qazaqtyń kindik qany tamǵan jeri bary belgili. Kisilikke jetip, eldiń azamatyna aınalǵanda aýylyńyzǵa shapaǵa­ty­ńyz tıdi me? – Elim maǵan Halyq Qaharmany degen ataqty almaı turyp-aq, men turǵan kóshege atymdy berdi. Sol aýylyma tyrmysyp júrip, meshit turǵyzyp berdim. Sóıtip, eldiń batasyn aldym. Bizdiń aýylda alaqandaı kópir bar edi. Sony jóndetip berdim. Osynyń bárin jasaýǵa dostarym kómektesti, Aýǵan soǵysy ardagerleri bolysty. Eldiń yqylasymen ákemniń de elge sińirgen eńbegi elenip, bizdiń aýyl – Ertaı aýyly atandy. Osynyń bári meniń júregimdi árkez jylytyp, jiger berip turady. – Sońǵy ret qashan qýandyńyz? – Úlken ulym kenetten qaıtys bolyp ketti. Dúnıeden baz keship júrgende joldastarym súıin­shi­lep, ulymnyń dúnıege kelgenimen quttyqtady. Sonda qýanǵannan aıqaılap, aty Serikjan bolsyn dedim. Odan keıin Aýǵan soǵysynda júrgende so­ǵystyń alǵashqy kúnderi dosym, leıtenant Álim­jan Ernııazov qaıtys boldy degen sýyq habar estidim. 3-4 saǵat ótpeı, dosyń tiri eken degende ólerdeı qýanǵanym bar. Sońǵy ret aýylǵa ákemniń aty berilgende júregim jarylardaı boldy. – Endigi armanyńyz? – Alladan suraıtynym, nemereli bolsam eken. Bul birinshi tilegim. Ekinshi tilegim, ádilet – týymyz bolsa, ótirik – qulymyz bolsyn. Úshinshisi, jattan­dy sóz bolyp kórinse de, beıbitshilik jalǵasyp, elimiz soǵys kórmese eken dep tileımin! – Áńgimeńizge rahmet. Áńgimelesken Aınash ESALI.

Álemdi tańdandyrǵan tulǵa

Biz, Ońtústik Qazaqstan obly­sy­nyń ardagerleri búkil keń-ba­ı­taq elimizdiń barsha halqyna ózi­mizdiń ózekjardy sózimizdi arnap otyrmyz. Táýelsiz qazaq eliniń, egemen Qa­­­­zaqstannyń búkil dúnıe júzi mem­­leketteri arasyndaǵy aby­roı-bedeli barǵan saıyn bıiktep, mereıi artýda. Myńjyldyqtar to­ǵy­­synda jańa, táýelsiz memleket qu­ryldy. Babalar armany shyn­dyqqa aınal­dy. Tóle bı, Qazybek bı, Áı­teke bı kóksegen, Abylaı han ar­man­daǵan, Abaı ańsaǵan abat zaman ornady. Enshisi bó­lin­begen birtu­tas, myz­ǵymas eldikke qol jetti. «Qazaq memleket bolyp tura al­maı­dy» degendeı keıbir kereǵar pikirler men boljamdar joqqa shyǵaryldy. Qazaqstan halqy tatýlyq pen turaqtylyqtyń altyn arqaýyna aınaldy. Elimizdegi erekshe tú­si­nistik pen tózimdilik ózara nyq senimge negizdelgen. Bizdiń eldiń birligi – yntymaqty yrysqa aınal­dyrýdyń aıryqsha úlgisi. Taǵdyr tabystyrǵan, tarıh toǵystyrǵan túrli etnos ókilderi Otanymyzdy birge kórkeıtýde, bir shańyraqtyń astynda urpaq ósirýde. Qazaq eliniń durys jol tańdap, bolashaqty baısaldylyqpen boljap, izgilik pen senimge negizdelgen parasatty saıasat júrgizýi, táýel­siz­diktiń jıyrma jylynda ǵasyrǵa bergisiz ǵalamat, ǵajaıyp jetistikter men jeńisterge jetýi – El­basymyz Nursultan Nazar­baev­tyń eren eńbeginiń nátıjeleri. Álem­degi nebir bedeli bıik mem­le­ket­ter­diń basshylary, asa kór­nek­ti qoǵam qaı­ratkerleri arasynda bizdiń Prezıdentimiz kóregendigi­men, kemeń­ger­ligimen, jańashyl­dy­ǵymen, kú­res­kerligimen, refor­ma­torlyǵy­men er­ek­shelenedi. Nur­sultan Nazarbaev shyn mánindegi Ult Kóshbasshysyna aınaldy. Qa­zaqstannyń jıyrma jylda júrip ótken joly jeńil bolǵan joq. Kúrdeli kezeńderde eren Elba­sy­myz, kemel Kóshbas­shy­myz óziniń janashyrlyǵy arqyly jarqyn isterge bastaı bildi. Búginde búkil álem Nazar­baev­ty jaqsy biledi. Joǵary baǵa­laı­dy. Keremet qurmetteıdi. Bizdiń Prezıdentimiz, Kóshbasshymyz ha­lyq­aralyq deńgeıde de tamasha bastamalar kóterip, dúnıejúzilik beıbitshilik pen tatýlyqqa, búkil­adamzattyq parasattylyqqa teń­dessiz úles qosýda. Qazaqstan áli jas, jańa memleket ekendigine qaramastan, TMD keńistigi boıynsha tuńǵysh ret EQYU-ǵa tóraǵalyq etti. Elimiz­diń mundaı bıikke kóterilýi de – Elbasymyzdyń eren eńbeginiń jemisi. Elimizdiń peshenesine jazyl­ǵan baqyt. Nursultan Nazarbaev memleke­timizdiń basshysy retinde Qazaq­stan Respýblıkasynyń EQYU-ǵa tóraǵalyǵyn eldiń halyqaralyq bedeli ekendiginiń dáleli dep qana emes, sonymen birge, Uıymǵa jańa tynys, jańa serpin berýdiń múm­kindigi dep baǵalaı bildi. Sońǵy on jyldyń ishinde EQYU-ǵa múshe elderdiń memleket, úkimet basshy­lary qatysýymen Uıym qyzme­ti­niń negizgi baǵyttaryn aıqyndaı­tyn, jaǵdaılardy saralap, baǵa beretin kezdesýi múlde ótpegen eken. Nursultan Nazarbaevtyń bastamasymen mundaı iri de irgeli Sammıt Astanada ótti. Qazaqstan Rýhy, Astana Rýhy, Ult Kóshbasshysynyń kemeńger­ligi kúlli álemniń kóz aldynda barǵan saıyn bıikteýde. Prezıdentimizdiń ishki saıasatta da, syrtqy saıasatta da mereıli túr­de mejelegen asýlary tańǵa­jaıyp. Olardyń bári de oryn­dalaryna nyq senimdimiz. Álemniń áıgili mem­leketteri de, álsiz elderi de, halyqaralyq uıymdardyń barly­ǵy da Qazaqstandy Nazar­ba­ev­syz, Nazarbaevty Qazaqstansyz elestete almaıtynyn ashyq aıtýda. Táýelsizdik tuǵyry nyǵaıyp, bereke-birligimiz búgingiden de bekemdenbegi úshin búkil álem tań­dana qaraıtyn tekti tulǵamyz, qa­zaqtyń nurly perzenti Nursultan Nazar­baevtyń prezıdenttik óki­let­tigin 2020 jylǵa deıin uzar­týymyz qa­jet. Bul – elimizdiń eldigin, ulty­myzdyń ulylyǵyn, hal­qymyzdyń birligin tanytar qa­sıet. Osy usy­nys-tilegimizdi izgi nıetti, mem­le­ket­tiń mereıli bola­shaǵyn adaldyq­pen ańsaıtyn, ózin Otanymyzdyń shyn patrıoty, shy­naıy azamaty dep esepteıtin árbir qazaq jáne árbir qazaq­stan­dyq qoldaıdy degen senimdemiz.

Ońtústik Qazaqstan oblysy ardagerler keńesi atynan:

Á.ASAÝBAEV, Sosıalıstik Eńbek Eri; O.BEGALIEV, Sosıalıstik Eńbek Eri; K.BО́RIǴAZIEV, Sosıalıstik Eńbek Eri, Sozaq aýdanynyń qurmetti azamaty; О́.О́TETILEÝOV, Sosıalıstik Eńbek Eri; A.SÁTMYRZAEV, Sosıalıstik Eńbek Eri, Báıdibek aýdanynyń qurmetti azamaty; B.ShÚKIRBEKOV, Sosıalıstik Eńbek Eri, Ońtústik Qazaqstan oblysynyń qurmetti azamaty; T.QAÝYMBAEV, Keńes Odaǵynyń Batyry, barlyǵy 84 adam qol qoıǵan.

Syrboıylyqtar ún qosýda

Qyzylorda oblysynda Elbasy Nursultan Nazarbaevtyń prezıdenttik ókilettigin 2020 jyldyń jeltoqsanyna deıin uzartý jóninde referendým ótkizýdi qoldaýshylar qatary kún saıyn kóbeıip keledi. Bastamashy toptyń О́skemen qa­lasyndaǵy jıynynda qabyl­danǵan Úndeýge Jalaǵash aýdany turǵyndary alǵashqy bolyp ún qosty. Aýdan ortalyǵynda ótken jıynǵa úkimettik emes uıymdar ókilderi, ardagerler men kásip­ker­ler qatysyp, Qazaqstandy ál­emdik arenaǵa alyp shyqqan Ult Kóshbasshysynyń prezıdenttik óki­lettigin uzartý týraly referendým ótkizýdi qyzý qoldady. Basqosýda kent ardagerleri ke­ńe­siniń tóraǵasy Bir­jan Kóshtaev osydan 10 jyl bu­ryn Elbasynyń Jalaǵash aý­da­ny­na jasaǵan sapa­ryn esine aldy. – Sol saparynda aǵa býyn ók­ilderimen tildesken Elbasy Qa­zaq­stannyń bolashaq baǵyt-baǵ­dary jaıly baılamdy sóz aıtyp edi, – dedi ardager. – Mine, búgin sol órkendi eldiń óristi tirligine kýá bolyp otyrmyz. Eliniń eń­se­sin tiktep, álemge tanytqan Elba­sy ókilettigin uzartý ózge emes, ózimiz úshin kerek sheshim. Árkimniń kókeıinde jatqan oı­dy dóp basqan bastamany qol­daý­da Syr jastary da belsendilik tanytýda. Oblys ortaly­ǵyn­daǵy «Bolashaq» ýnıversıteti ót­kiz­gen jıynda Elbasynyń bilim jáne ǵylym salasyn damytýdaǵy eńbegi basa aıtyldy. El táý­el­sizdik alǵan alǵashqy jyldary-aq Memleket basshysy «Bolashaq» baǵ­darlamasy arqyly qazaqstan­dyq jastardyń shetelde bilim alýy­­na jol ashty. Bilim berýdi basym baǵytqa aınaldyrǵan qo­ǵam múshe­leri ekendigin maq­ta­nysh tutatyn Syr jastary bas­tama­shyl toptyń Úndeýin tolyq qoldaıdy. Murat JETPISBAEV, jýrnalıst. Qyzylorda.

Bolashaqqa – Elbasymen

Almaty qalasynyń uıǵyr má­denı ortalyǵy eldiń Tuńǵysh Pre­zıdenti, Ult Kóshbasshysy Nur­sultan Nazarbaevtyń ókilettigin 2020 jylǵa deıin uzartý jóninde respýblıkalyq referendým ótki­zilýin qoldaǵan arnaıy jınalys ótkizdi. Qalalyq uıǵyr mádenı ortalyǵynyń tóraǵasy Abdýllam Ýshýrovtyń atap ótkenindeı, Qa­zaqstan uıǵyrlary referendým ótkizý jónindegi bastamany toly­ǵynan qoldaıdy. Atalmysh jına­lysqa qatysqan Qazaqstan halqy Assambleıasy hatshylyǵynyń, «Nur Otan» HDP Almaty qalalyq bó­limshesiniń, qalalyq saılaý ko­mıssııasynyń,  etnomádenı bir­les­tik­terdiń, sondaı-aq shyǵarma­shy­lyq jáne ǵylymı zııaly qa­ýym ókilderi Elbasy ókiletti­gi­niń merzimin uzartý qajettigi jaı­ynda basa aıtty. Sóıleý­shi­ler memleketimizdiń basshysyna búgin tańda balama joq ekendigin atap kórsetti. Olar eldiń keleshektegi turaqty damýyn, báse­kege qabilettiliktiń artýyn, ha­lyqtyń bereke-birligi men órken­dep gúl­denýin Nursultan Nazar­baevtyń esimimen baılanys­ty­ra­dy. – Memleket basshysy 90-shy jyldary usynǵan kóregendik saıasat pen damý strategııasynyń ar­qasynda biz búginde tatýlyq pen tynyshtyqta ómir súrip, álemdik qarjy daǵdarysynyń zardap­ta­ryn jeńip shyqtyq, sóıtip, jańa jetistikterge qaraı kámil senimmen ilgerileýdemiz,– dep atap aıt­ty Abdýllam Ýshýrov. О́z kezeginde respýblıkalyq uıǵyr mýzykaly komedııa teat­ry­nyń shyǵarmashylyq ujymy El­basyna únemi kóńil bólip, qam­qorlyq jasap kele jatqany úshin alǵys bildirdi. Teatr dırektory Ádil Janbakıev Prezıdenttiń tikeleı tapsyrmasymen óz ǵımarat­taryna kúrdeli jóndeý júrgizilip jańartylǵanyn eske saldy. Memlekettik qoldaýdyń arqasynda uj­ym óziniń alǵashqy tarıh mu­rajaıyn ashty. Ondaǵy jádiger­ler 1934 jyldyń qyrkúıeginen bas­talǵan uıǵyr teatrynyń qa­lyp­tasýy jaıynda syr shertedi. Alqaly jıynǵa qatysýshylar derbes damýdyń ótken 19 jyly Prezıdenttiń eldi bastap kele jatqan baǵytynyń durystyǵyn aıqyn kórsetip bergenin alǵa tart­ty. Nursultan Nazarbaev úde­meli ındýstrııalyq-ınnova­sııa­lyq damý baǵdarlamasyn bastap berdi, Qazaqstandy 2020 jylǵa deıin damytýdyń strategııalyq jospa­rynda alǵa asqaraly mindetter qoıdy. Búkil halyq úshin asa mańyzdy naq osy baǵdarla­ma­lardy Tuńǵysh Prezıdentimizdiń basshylyǵymen júzege asyrýy­myz qajet. Elbasynyń árdaıym tabysqa bastaıtynyna biz senimdimiz, deıdi olar. Qorǵanbek AMANJOL.

Eren eńbek úlgisi

Tileýhan ÁBILDAEV, Týberkýlez máseleleri ulttyq ortalyǵynyń dırektory, medısına ǵylymdarynyń  doktory. Qazaqstanda keıingi jyldarǵa deıin týberkýlez máselesin túp-tamyrymen joıý jumysy kóp ýa­qyt óz sheshimin tappaı kelgen edi. Osy bir kúr­meýi qıyn kúrdeli máselege, ásirese, sońǵy jyldary E