Shymkentte sheteldik dárigerler – Germanııanyń Marbýrg qalasyndaǵy «Gessen» travmatologııalyq klınıkasynyń jetekshisi R.Shnetler men Máskeýdegi Halyqtar dostyǵy ýnıversıtetiniń dosenti D.Rımashevskıı qatysqan operasııa sátti ótti.
Emine shıpa izdegen jandar alysqa uzamaı-aq, oblystyq klınıkalyq aýrýhananyń ortopedııa bólimshesinde memlekettik kvota esebinen kúrdeli ota jasatyp, jasandy tize, jambas súıekterin almastyra alady. Býyn aýrýlaryna operasııa jasaý 2010 jyldan beri qolǵa alynǵan bolatyn. Alǵashqy jyly 25 naýqasqa ota jasalǵan. Qazyǵurt aýdany Qaqpaq eldi mekeniniń turǵyny Danııar Omarov ótken jyly jazda sol jaq jambas urshyǵy men tizesine jasandy endoprotez qoıdyrǵan edi. Jarty jyldan keıin endi ekinshi aıaǵyna ota jasatýǵa kelipti. Naýqastyń joly boldy. Bul kelisi sheteldik bilikti mamandardyń sheberlik synybymen tuspa-tus keldi.
– Qazaqstanǵa eki kúnge keldim, – deıdi R.Shnetler bizben áńgimesinde. – О́z bilimimdi jáne azdy-kópti tájirıbemdi qazaq áriptesterimmen qýana bólisemin. Kúrdeli ota jasaýmen qatar, arnaıy leksııa oqımyn.
– Sizderdegi oblystyq klınıkalyq aýrýhanamen kópten beri tyǵyz baılanystamyz. Emdeý mekemesiniń tehnıkalyq jaraqtandyrylýy keremet. Áriptesterimniń kásibı sheberlikterine de tántimin, – deıdi Denıs Rımashevskıı. – Alaıda, medısına salasy úzdiksiz izdenýdi talap etedi.
Shemirshegi jelinip, jambas urshyǵyn aýystyrýǵa kelgenderdiń biri – saryaǵashtyq Amanjol Saqaev. Ota jasatqanyna bir aptadaı bolypty. Naýqas ózin sergek sezinedi. Onyń ortopedııa bólimshesiniń meńgerýshisi Ábdiǵanı Qudaıbergenov pen basqa da emdeýshi dárigerlerge rızashylyǵy sheksiz. Belsendi ómirmen qaıta qaýyshtyrǵanyna dán rıza.
Oblys boıynsha 200-deı naýqas býyn aýrýlaryn emdetýde. Qazir olar aıaǵynan nyq turyp keledi. Mamandardyń aıtýynsha, óńirimizde taǵy 20 syrqat kezekte tur. Jasandy býyn 15-20 jylǵa deıin senimdi qyzmet kórsetýge jaramdy.
Serikqalı JEKSENBAEV.