Aqjarda ońaltý ortalyǵy ashyldy

Tarbaǵataı aýdanynyń Aqjar aýylynda balalarǵa arnalǵan ońaltý ortalyǵy ashyldy. Jańa mekemege jergilikti bıýdjetten 15 mıllıon teń­ge bólingen. 15 adamdy jumyspen qamtyǵan ortalyq qyzmetkerleriniń ortasha eńbekaqysy 50 myń teńgeni quraıdy. Ońaltý mekemesinde qımyl-qozǵalysy men aqyl-oıy tejelgen 15-17 jas aralyǵyndaǵy balalarǵa áleýmettik medısına­lyq, psıhologııalyq, eńbek jáne mýzyka, logoterapııa, deneshy­nyq­­­tyrý mamandary qyzmet kór­setedi. Jalpy, aýdan bo­ıynsha ońaltý ortalyǵymen 28 bala qam­­­tylsa, Aqjar aýylyndaǵy or­ta­lyqqa 13 bala qabyldandy. Bul meke­me Aqsýat aýylyndaǵy psı­honevrologııalyq aýytqýy bar balalarǵa arnalǵan jartylaı sta­s­ıo­narlyq ońaltý áleýmettik-medısınalyq ortalyǵynyń bó­lim­shesi retinde ashylǵanyn aıta keteıik. Ońaltý ortalyǵynyń ashylý sharasyna qatysqan aýdan áki­mi Dildábek Orazbaev Elbasy tapsyrmasymen múmkindigi shek­teýli balalar memleket tarapyna qam­qorlyqqa alynǵanyn, olarǵa úzdiksiz áleýmettik-medısınalyq qyzmet kórsetýdiń túrli joldary qarastyrylǵanyn, sonyń biri shalǵaı óńirlerde ońaltý orta­lyqtarynyń ashylýy bolyp otyrǵanyn erekshe atap ót­ti. Sondaı-aq, aýdan basshysy or­talyqty jabdyqtaýǵa qol ushyn sozǵan mekemelerdiń jetekshileri men kásipkerlerge rızashylyǵyn jetkizdi. «Bala – baýyr etiń» deı­di halqymyz. Eshkim balasynyń jarymjan bolýyn qalamaıdy. Biraq, ómirdiń óz zańy bar. Aq­jar­­­lyq­tar jańadan ashylǵan ortalyqqa tartý-taralǵylarymen de kelipti. Olardyń biri «Otaý-TV» spýtnıktik tabaǵyn syılasa, endi biri kilem tartý etip jatty. – Elbasy Joldaýynda atap kór­setkendeı, múmkindigi shekteýli jandar tek járdemaqy alyp otyrmaýy kerek. Olar da ortaǵa beıimdelip, qoǵamdyq ómirden tys qalmaýy tıis. Bul rette keleshekte Qazaqstannyń kedergisiz aımaqqa aınalýy kóz­delgenin aıta ketkenimiz abzal. Osyǵan deıin kvota alǵan balalar iri qalalarǵa baryp emdelip júrdi. Biraq kvota barlyq balaǵa jete ber­meıdi. Sondyqtan, tórt qa­byr­ǵaǵa qarap jatqan aýyl balalaryna bul ortalyqtyń tıgizetin kómegi kóp bolady, – dedi atalǵan ońaltý ortalyǵynyń meńgerýshisi Merýert Dúısenova. Aqsýat pen Aqjardaǵy ońaltý ortalyqtarynyń árqaısysyna sha­ǵyn avtobýs berilgen. Son­dyqtan, ońaltý mekemesine sol aýyldyń balalarynan bólek, ma­ńaıdaǵy eldi mekenderdiń de emdi qajet etetin búldirshinderin kólikpen alyp kelip, 6 saǵattan keıin qaıtadan úıine jet­kizip, ata-analaryna tabys etýge jaǵdaı jasalyp otyr. Biz aýyl turǵyny Dınara Ká­kimbekovany sózge tartqan edik. Ortalyqqa alty jastaǵy Marǵulan Jeńisbekov esimdi búldirshinin alyp kelgen ananyń aıtýynsha, balasy eki jyl buryn ınsýlt alyp, ózdiginen júre almaı qalǵan jáne bir qoly jumys istemeıdi. Bir jyl buryn Astanadaǵy balalarǵa arnalǵan ońaltý ortalyǵyna baryp kelgennen keıin, em-domdy taǵy da jalǵastyrýǵa múmkindigi bol­maǵan ana aýyl ishinde ońaltý ortalyǵynyń ashylyp jatqanynan úlken úmit kútetinin aıtty. – Elordaǵa barý biz sııaqty aýyl turǵynyna kádýilgideı kúsh. Jol uzaq. Bala da qajıdy. Sondyqtan, memleketimizdiń aýylda kúnde­lik­­ti em alýǵa jaǵdaı jasaǵany­na qýa­­­nysh­­tymyz. Endi balamyzdyń densaýlyǵy jaqsarady degen oıdamyz. Munda balalardy fızıkalyq turǵydan damytýǵa qajetti jaǵ­daıdyń barlyǵy jasalǵan eken, – dedi Dınara Ahmetqyzy. Sóz sońynda aýdan ákimi Dil­dábek Orazbaev Aqjar aýylynda bıyl jańa mektep pen aýyz sý júıesiniń paıdalanýǵa beriletinin, sonymen birge oblys ákiminiń tapsyrmasy boıynsha úshtuǵyrly tildi damytý baǵdarlamasy aıasynda aǵylshyn tilin tereńdetip oqytý ortalyǵy men mentaldy matematıka mektebi ashylatynyn atap ótti. Dýman ANASh, «Egemen Qazaqstan». Shyǵys Qazaqstan oblysy, Tarbaǵataı aýdany.