Kóktem lebi araılanǵan kún

Alǵys aıtý kúni – birligi men tatýlyǵy jarasqan Qazaqstan halqyn odan ári jaqyndastyra túsýge, bir el, bir múdde jolynda eńbek etýge jumyldyratyn ataýly meıramǵa aınaldy. Elimizde alǵash ret toılanyp otyrǵan bul mereke ulttar tatýlyǵyn bekemdep, el birligin saqtaý maqsatynda júzege asyrylǵan. Osyǵan oraı elimizdiń barlyq aımaq­taryndaǵydaı, Astana jurtshylyǵy da elimizde tynyshtyq pen úndestik, ózara senimdilik pen barlyq qazaqstandyqtarǵa degen qurmettiń ornyǵýyna negiz bolǵan Prezıdenttiń beıbitshilik pen kelisim saıasatynyń saltanatty kúni bolǵan aıtýly merekeni shadyman shattyqpen atap ótti. Elordadaǵy Ulttyq mýzeıde Alǵys aıtý kúni merekesine oraı «Bir sha­ńyraq astynda» atty Qazaq­stan hal­qy festıvali ótip, is-shara barysyn­da etnomádenı dástúrde jasalǵan balalar shyǵarmashylyǵy ortalyq­tary men mektep oqýshylarynyń qol­óner jumystarynyń jármeńkesi uıym­das­tyryldy. Atalmysh festıval aıasynda Astana qalasynyń orta jáne mýzykalyq mektepteriniń oqýshylary merekelik konsert usynyp, jınalǵan jurtshylyqqa óz ónerlerin tartý etti. Sonymen qatar, Ulttyq mýzeıde Alǵys aıtý kúnine oraı «Mýzeı kitap­hanasyna kitap syıy» aksııasy ótip, aksııa Ulttyq mýzeıdiń ǵylymı kitaphanasyna turaqty qoldaný úshin tarıh, arheologııa, etnografııa, mádenıettaný, restavrasııa, mýzeıtaný jáne basqa baǵyttar boıynsha kitaptar, maqalalar jınaǵy, konferensııa materıaldary, monografııalardy tabystaýǵa shaqyrdy. Atalǵan is-sharalardyń ashylýynda sóz alǵan Ulttyq mýzeı dırektorynyń orynbasary Jáken Taımaǵambetov bú­gingi aıtýly kúnniń erekshelikterine toq­taldy. Sonymen qatar, qıly kezeńderde Qazaqstanǵa qonys aýdarǵan kóptegen ulttardyń búgingi berekeli ómirin tilge tıek etti. – Naýryz aıynyń alǵashqy kúnin merekemen qarsy alyp jatyrmyz. Osynyń bári yntymaq pen birligimizdiń sebebinen kelip shyǵyp otyr. О́tken jyly Qazaqstan halqy Assamblıasynyń 20 jyldyǵyn atap óttik. Alǵys aıtý kúni sonyń jalǵasy desek bolady. Keshegi qıly kezeńderde qazaq dalasynyń darhandylyǵyn talaı ulttar kórdi. Búgin ol jyldar artta qaldy. Onyń bári árqaısysymyzdyń esimizde, jadymyzda. Uıymdastyrylyp otyrǵan osynaý jıyn Ulttyq mýzeıdiń búgingi merekege tartýy dep qabyl alyńyzdar, – dedi J.Taımaǵambetov. Halyqaralyq Túrki akademııasynyń ǵalym-hatshysy Amantaı Shárip Qazaq­stannyń búgingi turaqtylyǵy men qaýip­sizdigi týraly aıtty. – Bereke-birlik ornaǵan memlekette ómir súrip jatyrmyz. Kúnimiz kúlip shy­ǵady, túnimiz tynysh. Bastysy, biz­diń jas urpaq alańsyz ósip keledi. Olar úshin barlyq jaǵdaı jasalǵan. Turaq­ty­lyǵymyz tuǵyrly bolsyn degim keledi. Osynaý Alǵys aıtý merekesine oraı Ulttyq mýzeıdiń ǵylymı kitaphanasyna ártúrli salany qamtyǵan 50-ge jýyq kitapty syılap otyrmyz. Bul úrdisti ári qaraı da jalǵastyra bermekpiz, – dedi A.Shárip. Atalmysh aksııa barysynda Tuńǵysh Prezıdent – Elbasynyń kitaphanasy Nursultan Ábishuly Nazarbaevtyń ómir joly týraly jáne onyń eńbekteriniń 36 baǵa jetpes jaýharlaryn usynsa, Syrtqy ister mınıstrligi 217 kitapty syıǵa tartty. Sonymen qatar, Ulttyq mýzeıge kitap syılaǵan zııaly qaýym qatarynda – ǵalym Myrzataı Joldasbekov, jazýshy Sultan Orazalınov, akademık Aqtoty Smaǵulova bar. Al «Astana» Ulttyq sýret galereıa­synda Alǵys aıtý kúnine jáne Qazaqstan Respýblıkasy Táýelsizdiginiń 25 jyl­dy­ǵyna arnalǵan «Birlik túbi – bereke» atty Astana qalasy sýretshileri men stýdent­terdiń qatysýymen dóńgelek ústel ótip, kelgen qonaqtarǵa arnaıy Astana qalasy sýretshileriniń týyndylary qoıylǵan kórme ekspozısııasy usynyldy. Basqosýǵa Qazaqstannyń eńbek sińirgen qaıratkeri, Astana Sýret­shiler odaǵynyń basqarma tóraǵasy T.Ermekov jáne ártúrli ult ókilderiniń basyn qos­qan Sýretshiler odaǵynyń beldi múshe­leri, mádenıet jáne bilim salasynyń qaırat­kerleri, professor­lar qatysyp, óner­degi birlik pen tatýlyq sııaqty asyl qa­sıetterdiń kó­ri­nis tabýy atap aıtylyp, yn­tymaǵy jaras­qan eldiń árqashanda búgin­gideı alǵy­sy araılana berýine tilek­tes­tik­terin bildirdi. Ákim QOJAULY. ASTANA.