Keshe Ortalyq saılaý komıssııasynyń otyrysy ótti. Kún tártibinde VI shaqyrylatyn Qazaqstan Respýblıkasy Parlamenti Májilisiniń depýtattaryn tirkeý máselesi qaraldy.
Sonymen qatar, otyrysta «Qazaqstan Respýblıkasyndaǵy Saılaý týraly» Konstıtýsııalyq zańnyń 12, 45, 46, 97-1 jáne 98-baptaryna sáıkes, Ortalyq Saılaý komıssııasynyń qaýlysy jarııalandy. Qaýlyny oqyǵan Komıssııa tóraǵasy Qýandyq Turǵanqulov: «Birinshiden, VI shaqyrylatyn Qazaqstan Respýblıkasy Parlamenti Májilisiniń depýtattary tirkelsin. «Nur Otan» partııasynyń partııalyq tizimi boıynsha – 84 depýtat, Qazaqstannyń «Aq jol» demokratııalyq partııasynyń partııalyq tizimi boıynsha – 7 depýtat, Qazaqstan Kommýnıstik halyq partııasynyń partııalyq tizimi boıynsha – 7 depýtat jáne Qazaqstan halqy Assambleıasy saılaǵan 9 depýtat. Ekinshiden, tirkelgen barlyq depýtattarǵa Ortalyq saılaý komıssııasynyń otyrysynda kýálikter men omyraýǵa taǵatyn belgiler tapsyrylsyn. Úshinshiden, osy aqparat buqaralyq aqparat quraldarynda jarııalansyn», – dedi. Osyǵan oraı, partııalyq tizim boıynsha tirkelgen jáne Qazaqstan halqy Assambleıasy saılaǵan barlyǵy 107 depýtatqa kýálikteri men omyraýǵa taǵatyn belgileri tapsyryldy. Jıyn sońynda Q.Turǵanqulov barlyq depýtatty quttyqtap, jumystaryna jemis tiledi.
Elaman QOŃYR,
«Egemen Qazaqstan»