jańa Qylmystyq, Qylmystyq-atqarý kodeksteri qaraldy
О́skemende Parlament Senaty Konstıtýsııalyq zańnama, sot júıesi jáne quqyq qorǵaý organdary komıtetiniń kóshpeli otyrysy ótti.
«Altaı» tehnoparkinde ótken jıynǵa elimiz Bas prokýrorynyń birinshi orynbasary I.Merkel, Ulttyq qaýipsizdik komıteti tóraǵasynyń birinshi orynbasary S.Ábish, Ishki ister mınıstriniń orynbasary R.Jaqypov, Ádilet mınıstriniń orynbasary Z.Baımoldına jáne basqa da memlekettik organdardyń ókilderi, sheteldik áriptester retinde IRZ jobalarynyń menedjeri A.Výker men Germanııanyń Drezden jáne Gambýrg qalalary prokýratýralarynyń qyzmetkerleri qatysty.
Alqaly jıynda jańa Qylmystyq, Qylmystyq-atqarý kodeksterin qoldaný máseleleri qaraldy. Otyrysty ashqan komıtet tóraǵasy Serik Aqylbaı 2014 jyly qabyldanǵan jańa kodekster jeke adam quqyqtaryn qorǵaýdyń konstıtýsııalyq kepildikterin kúsheıtý, ádiletti sot óndirisi men quqyqtyq jaýaptylyq sharalaryn qamtamasyz etý maqsatynda ázirlengenin atap ótti. Atalǵan kodekster arqyly qylmystyq jazany taǵaıyndaý barysyndaǵy qadamdar ózgertilip, bitistirý rásimderi, jolyn kesýdiń balama sharalaryn qoldaný múmkindigi qarastyryldy. Sondaı-aq, qylmystyq isti qozǵaý satysynan bastap adam quqyqtaryn qorǵaý úderisinde ozyq tetikter engizildi. Jańa Qylmystyq-atqarý kodeksimen sottalǵandardy túzelý dárejesine baılanysty ustaý jaǵdaıyn naqty jikteý belgilendi. Sottalǵandardyń negizgi quqyqtary men mekeme ákimshiliginiń mindetteri alǵash ret kodeks deńgeıinde bekitildi, dedi S.Aqylbaı.
Sondaı-aq, ol bastalǵan reformalardyń is júzinde durystyǵyn atap ótti. Jańarǵan qylmystyq zańnama jaǵdaıynda tergeý jáne sot organdaryna aýyrtpalyqty eleýli túrde azaıtatyn, proseske qatysýshylardyń quqyqtary men múddelerin qorǵaý kepildikterin qamtamasyz etýge múmkindik beretin jańa quqyqtyq jáne prosestik ınstıtýttar nátıjeli jumys istep keledi. Iаǵnı, qabyldanǵan ózgerister demokratııalyq, quqyqtyq memleketter sıpattaryna jaýap beretin qylmystyq júıeni qalyptastyrýǵa baǵyttalǵan, dedi senator.
Jıynda Bas prokýrordyń birinshi orynbasary Iogan Merkel, Ishki ister mınıstriniń orynbasary Rashıd Jaqypov, oblystyq sot tóraǵasy Dosjan Ámirov, oblys prokýrory Baǵban Táıimbetov, oblystyq ishki ister departamentiniń basshysy Janarbek Baqtybaev baıandama jasady. Olar qylmystyq sot óndirisi, prosestik kelisim, bes býyndy sot júıesinen úsh býynǵa kóshý aıasynda jáne basqa máseleler jónindegi tergeý sýdıasynyń, prosess prokýrorynyń rólin talqylaýǵa nazar aýdardy. Sondaı-aq, atalǵan salalar boıynsha zańnamany odan ári jetildirýge baǵyttalǵan birqatar usynystar ortaǵa salyndy.
Árıne, jańadan engizilgen jańalyqtardy birlese talqylaý quqyq qorǵaý tájirıbesinde jınaqtalǵan nátıjelerdi shynaıy taldaýǵa, qylmystyq zańnamany odan ári jetildirýdiń negizgi baǵyttaryn aıqyndaýǵa, sotqa deıingi óndiristi ońtaılandyrýǵa, onyń quqyq qorǵaý áleýetin kúsheıtýge múmkindik beredi.
Dýman ANASh,
«Egemen Qazaqstan».
О́SKEMEN.