Búgingi tańda «Nurly Jol» memlekettik baǵdarlamasy negizinde tabıǵı monopolııalar sýbektileriniń naqty atqarǵan jumys kólemi 36,8 mıllıard teńgeni quraıdy, ıaǵnı qarjynyń 61%-y ıgerildi.
Osylaı dep atap ótti Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ basqarma tóraǵasy Sergeı Shaıjúnisov. Memlekettiń qoldaýyna sáıkes turǵyn úı-kommýnaldyq sharýashylyǵy salasyn reformalaý men halyqaralyq qarjy ınstıtýttarymen yntymaqtastyq qurý máselesi talqy bolǵan jıynda S.Shaıjúnisov birqatar málimetterdi alǵa tartty. Bul rette ol memleket qazirgi kezde turǵyn úı-kommýnaldyq sharýashylyǵy salasyna erekshe mán berýde jáne osy salany jańǵyrtýǵa baǵyttalǵan baǵdarlamalardyń iske asyrylýyna qomaqty qarjy bólýde, dep atap ótti. Atalǵan baǵdarlamalardyń arasynda Memleket basshysy ótken jyly bekitken kommýnaldyq qurylymdardy jańǵyrtýǵa baǵyttalǵan «Nurly Jol» memlekettik baǵdarlamasy bar.
Búgingi tańda osy baǵdarlamanyń aralyq qorytyndysy boıynsha 2015-2016 jyly 259 shaqyrymdy quraıtyn jylýmen, sýmen jabdyqtaý jáne sý burý júıesin, 14 qazandyqqa qosa 3 sý stansasy qurylysyn salý jáne jańǵyrtý josparlanǵan bolatyn. Osy oraıda ústimizdegi jyldyń naýryzyndaǵy jaǵdaı boıynsha olardyń 211 shaqyrymy salynǵan. Onyń ishinde jylýmen jabdyqtaý jelisi 143 shaqyrymdy qurasa, jylýmen jabdyqtaý jáne sý burý boıynsha 67 shaqyrym jańǵyrtylǵan. Jergilikti atqarýshy organdardyń aǵymdaǵy jylǵy 1 qańtardaǵy esebi boıynsha 60 mıllıard teńge kóleminde qarjy ıgerilgen. Jáne de «Nurly Jol» baǵdarlamasynyń sheńberinde 2016 jylǵa 75 mıllıard teńgeni quraıtyn 99 joba irikteldi. Onyń ishinde sýmen jabdyqtaý boıynsha – 22,4 mlrd.teńgeni quraıtyn 48 joba, sý burý boıynsha – 10,4 mlrd.teńge bolatyn 20 joba men jylýmen jabdyqtaýǵa baǵyttalǵan 44,2 mlrd.teńge kólemindegi 31 jobany atap ótýge bolady.
Sonymen qatar, bıylǵy jyldan bastap memlekettik qoldaýdyń jańa tetigi – jylýmen, sýmen jabdyqtaý jáne sý burý júıesiniń qurylysyn jáne qaıta qurylymdaýdy nesıelendirý engizilgenin aıryqsha atap ótken abzal. Jáne de Memleket basshysynyń jylý energııasyn esepteıtin jalpyúılik aspaptardy ornatýǵa qatysty tapsyrmasyna oraı «TKSh damytý qory» AQ bıýdjetten bólingen 6 mıllıard teńge qarjyǵa sáıkes jalpyúılik jylý eseptegish aspaptardy ornatý boıynsha baǵdarlamany iske asyrý úshin úzdiksiz jumys júrgizýde. Búgingi tańda respýblıka boıynsha ótken jylǵy qyrkúıektegi málimetterdiń negizinde jalpy somasy 1,4 mıllıard teńgeni quraıtyn 2 235 birliktegi jylý eseptegish aspaptary naqty ornatylǵan. Aǵymdaǵy jyldyń sońyna deıin taǵy da 6015 birliktegi jylý eseptegish aspap ornatý josparlanýda, bul jalpy respýblıkalyq qajettiliktiń 43 paıyzdyq jıyntyǵyn quraıdy.
Elmıra MÁTIBAEVA,
«Egemen Qazaqstan».