Keshe Memlekettik hatshy Gúlshara Ábdiqalyqovanyń tóraıymdyǵymen 1941-1945 jyldardaǵy Uly Otan soǵysyndaǵy Jeńistiń 71 jyldyǵyn merekeleýge daıyndyq máselelerine arnalǵan keńes ótti. Jıynǵa Prezıdent Ákimshiliginiń Densaýlyq saqtaý jáne áleýmettik damý, Qorǵanys, Bilim jáne ǵylym, Mádenıet jáne sport, Investısııalar jáne damý mınıstrlikteri men «Qazaqstan Respýblıkasynyń Ardagerler uıymy» Respýblıkalyq qoǵamdyq birlestigi Ortalyq keńesiniń ókilderi qatysty.
G.Ábdiqalyqova Memleket basshysynyń «Ardagerler – bizdiń qazynamyz» degen sózine erekshe nazar aýdara kele, búgingi kúni elimizde 3 668 Uly Otan soǵysyna qatysýshy men Uly Otan soǵysynyń múgedegi, soǵysqa qatysýshylarǵa teńestirilgen áleýmettik kepildigi bar 22 867 adam turyp jatqandyǵyn jetkizdi. Memlekettik hatshy óz sózinde fashızmdi jeńý isine zor úles qosqan jáne tarıhı mıssııany oryndaǵan Uly Otan soǵysynyń ardagerlerine, tyl eńbekkerlerine, qazaqstandyqtarǵa qurmet kórsetý jalpymemlekettik aýqymdaǵy maqsat ekenin jetkizdi.
Jıynda, sondaı-aq, barlyq ortalyq memlekettik jáne jergilikti atqarýshy organdardyń nazary soǵysqa qatysýshylar men olarǵa teńestirilgen adamdarǵa jan-jaqty áleýmettik-ekonomıkalyq qoldaý kórsetýdi qamtamasyz etýge baǵyttalǵandyǵy, jergilikti bıýdjetterde 2016 jyly Jeńistiń 71 jyldyǵyna oraı ardagerlerge bir jolǵy materıaldyq kómek kórsetý úshin 2,6 mıllıard teńge qarastyrylǵany aıtyldy. Buǵan qosa, «Qazaqstan Respýblıkasynyń Ardagerler uıymy» Respýblıkalyq qoǵamdyq birlestigi Ortalyq keńesiniń bastamasymen ardagerler qozǵalysynyń odan ári damýyna jáne urpaqtar sabaqtastyǵyn qamtamasyz etýge baǵyttalǵan birqatar áleýmettik jobalar júzege asyrylyp jatyr eken.
Sóziniń sońynda Gúlshara Naýshaqyzy barlyq is-sharalar Qazaqstan Táýelsizdiginiń 25 jyldyǵy aıasynda ótip, eldegi qoǵamdyq-saıası turaqtylyqty qamtamasyz etýge, qoǵamdy Memleket basshysynyń saıasaty tóńireginde uıystyrýǵa, jas urpaqtyń patrıottyq sezimin nyǵaıtýǵa baǵyttalýy kerektigin atap ótti. Sondaı-aq, ol otyrys qorytyndysy boıynsha memlekettik organdarǵa birqatar tapsyrma júktedi.
Jıyn aıasynda jýrnalısterge bergen suhbatynda Densaýlyq saqtaý jáne áleýmettik damý mınıstri Tamara Dúısenova memleket tarapynan soǵys ardagerlerine aıryqsha kóńil bólinip kele jatqandyǵyn, máselen, bıylǵy jyly barlyq zeınetkerge beriletin áleýmettik tólemderdiń kóterilgendigin, jalpy, Uly Otan soǵysynyń negizgi qatysýshylary men ardargerleriniń memlekettik bıýdjetten alyp otyrǵan zeınetaqylary óskendigin jetkizdi.
«Biz aı saıyn ol qarajatty ýaqytynda berip otyrmyz. Ekinshi úlken kómek – medısınalyq kómek. Qazir 3 aıdyń kóleminde biz Uly Otan soǵysyna qatysýshylardy jáne oǵan teńestirilgen azamattardy medısınalyq tekserýden ótkizip, dıspanserlik kómek kórsetýdi bastadyq. Sonymen birge, 15 myńǵa jýyq Uly Otan soǵysyna qatysýshy men olarǵa teńestirilgen azamattarǵa 52 mln. teńgeniń kóleminde tegin dári-dármek jetkizip berdik. 700-ge jýyq soǵysqa qatysýshy men múgedekti shıpajaıǵa emdelýge jiberdik. 200-ge tarta azamatqa tis protezdeý, emdeý sharalaryn júrgizip jatyrmyz. Jeńistiń 71 jyldyǵyna oraı, soǵys ardagerleri men múgedekterine 2,6 mlrd. teńge kóleminde taǵy da qosymsha qarajat jumsaǵaly otyrmyz. Bulardyń barlyǵy olardyń áleýmettik, materıaldyq jaǵdaıyn durystaý úshin jasalyp jatyr», – dedi T.Dúısenova.
Al «Qazaqstan Respýblıkasynyń ardagerler uıymy» Respýblıkalyq qoǵamdyq birlestigi Ortalyq keńesiniń tóraǵasy О́mirzaq Ozǵanbaı ótken jyly Jeńistiń 70 jyldyǵynda úlken sharalar atqarylǵanyna, bıyl da mundaı sharalar jalǵasa beretinine toqtaldy.
«Árıne, qazirgi tańda soǵys ardagerleriniń qatary azaıyp barady. Biz sol jandardyń jáne tyl eńbekkerleriniń aldynda áli de qaryzdarmyz. Jalpy, TMD elderin óz memleketimizben salystyra qaraıtyn bolsaq, Qazaqstanda bir mezgil beriletin kómek, zeınetaqy, áleýmettik tólemaqynyń mólsheri anaǵurlym kóp. Bul jaǵynan alǵanda, elimiz ardagerleriniń jaǵdaıy jaqsy. Biz olardan kóshilgeri turmyz. Máselen, bir ǵana Almaty oblysyndaǵy 73 ardagerge baspana berildi. Mańǵystaý oblysyndaǵy 60 ardager de úımen qamtamasyz etildi. Buǵan qosa, soǵys ardagerleri men múgedekterdiń úılerine jóndeý jumystaryn júrgizý de memlekettiń nazarynda tur. Bul rette, Ońtústik Qazaqstan oblysy 300-deı ardagerdiń turyp jatqan baspanasyna jóndeý jumystaryn júrgizip berdi. Bıylǵy jyly da mundaı ıgi sharalar toqtap qalmaıdy. Sebebi, el úshin qar tósenip, muz jastanǵan qarttarymyzdyń aldyndaǵy perzenttik qaryzymyz ben paryzymyzdy eshqashan sanamyzdan shyǵaryp almaýymyz kerek», – dedi О́.Ozǵanbaı.
Láıla EDILQYZY,
«Egemen Qazaqstan».