Beıbit kúnde de erlikke oryn bar

Erlik – maıdan shebinde, urys dalasynda ǵana jasalmaıdy. Shyntýaıtynda, erliktiń túri kóp. Sonyń biri – beıbit ómirdegi erlik pen batyrlyqtyń úlgisine bas ımeý, qurmet tutpaý múmkin emes. Ásirese, kúndelikti ómiri táýekelmen tyǵyz baılanysty áskerı qyzmetshilerdiń árbir batyl áreketi, tabandy is-qımyly qoǵamnyń tikeleı nazarynda bolary daýsyz. Osydan birer jyl bu­ryn Oraldaǵy «Batys» óńir­lik qolbasshylyǵynyń aǵa ofıserleri, maıorlar Salaýat Qabdyqulov pen Rınat Juma­lıev tilsiz jaý – órtten bir­neshe adamdy qutqaryp, erlik jasady. Árıne, olardyń ózderi bul qadamdaryn erlik emes, Otan aldyndaǵy, halyq aldyndaǵy áskerı, azamattyq boryshymyz dep túsindiredi. Deıturǵanmen, syn saǵaty týǵanda kózdi jumyp kómekke umtylatyn erik-jiger, ba­tyldyq barshanyń boıyna berilmegen qasıet ekendigin de moıyndaýymyz qajet-aq. Endi qos sardardyń basynan ótken sol bir tótenshe oqıǵalardyń qalaı órbigendigine toqta­laıyq. Jer-Ana jasyl jelegin jamylyp, tirshilik ataýly túlep sala bergen mamyr aıynyń orta sheni bolatyn. Osy bir jaı­mashýaq, jaıdary qalypty aıaq astynan shyqqan ashy aıqaı buzyp jibergendeı boldy. «О́rt! О́rt! Úı órtenip jatyr!» degen jandármen daýystar tústik ishýge úıine kele jatqan Salaýat Qabdyqulovty da selt etkizdi. Oılanýǵa, tolǵanýǵa ýaqyt joq. Buǵan deıin de talaı oqys oqıǵalardyń ortasynda bolyp, ábden shynyqqan  áskerı ofıser dereý daýys shyqqan jaqqa júgirip jetti. Bes qabatty úıdiń besinshi qabatyndaǵy páterdiń terezesinen jalynnyń qyzyl tili sýmańdaıdy. Býdaqtaǵan tútinnen tynystary tarylǵan turǵyndar kóshege qashyp shyq­qan. – Úıde kim qaldy?! – Bárimiz shyqtyq...Joq, tura turyńyz, órtenip jatqan pá­terdiń ıesi úlken kisi edi. Sol kórinbeıdi. Shamasy ishte... Sońǵy sózdi júre tyńdaǵan maıor baspaldaq boıymen besinshi qabatqa umtyldy. Pá­ter­de shynymen de 77 jastaǵy egde kisi qalyp qoıǵan eken. Qol­qany qapqan ıiske ýlanyp, talyqsyp ketken úı ıesin Salaýat kóterip syrtqa alyp shyqty. Ile-shala jetken órt sóndirýshiler alapat­ty aýyzdyqtap, «jedel járdemniń» dárigerleri qutqarylǵan adam­nyń ómirin aman saqtap qaldy... Arada týra eki  aı ýaqyt ótkende dál osyǵan uqsas jaǵdaı taǵy qaıtalandy. «Batys» óńir­lik qolbasshylyǵyna qaras­ty 5517 áskerı bólimi shtabynyń bastyǵy, maıor Rınat Juma­lıev túzeý mekemesinen kele jatqan jolynda Chagano-Na­berejnaıa kóshesindegi úılerdiń biri otqa oranǵanyn baıqaıdy. Júrgizýshisine qyzmettik kóligin týra úı janyna toqtatýǵa buı­ryq bergen sardar tez arada jalyn sharpyǵan úıden 12 adam­nyń din aman shyǵýyn saýatty uıymdastyrdy. О́rt sóndirý bólimine shuǵyl habar berip, kórshi úılerden turǵyndardyń múlkin shyǵarýǵa járdemdesti. Qos ofıserdiń qysyl-taıań shaqta kórsetken erligi, aspaı-saspaı jasaǵan batyl áreketi memleket tarapynan joǵary baǵa­lanǵandyǵyn aıtýymyz kerek. Naqty aıtqanda, Sa­laýat Qabdyqulov pen Rınat Jumalıev órt kezinde adamdardy qutqarǵany úshin Qazaqstan Respýblıkasy Prezıdentiniń 2015 jylǵy 4 mamyrdaǵy №7 Jarlyǵy negizinde «Jaýyn­gerlik erligi úshin» medalimen nagradtaldy. Maıor S.Qabdyqulov jo­ǵary nagradany Aqordada Mem­leket basshysy Nursultan Nazarbaevtyń tikeleı óz qoly­nan alsa, R.Jumalıevke me­daldi Ulttyq ulannyń bas qol­basshysy, general-leıtenant Rýslan Jaqsylyqov tapsyrdy. Toqtar KENJEǴALIEV, jýrnalıst Batys Qazaqstan oblysy Sýrette (soldan ońǵa qa­raı): S.Qabdyqulov jáne R.Ju­malıev