Bizdiń ulan-baıtaq jerimizde jaıylym da, shabyndyq ta, sýarmaly alqap ta jetip-artylatyny barshaǵa málim. Bul jerdiń barlyǵyn aýyldyqtar ǵana ıgerip egin egip, túrli daqyldar seýip, tyńaıtyp, ónim alyp otbasylaryn asyraıtyny anyq emes. Qol kúshi jáne taǵy basqa qajettilikterdi kez kelgen turǵyn taýyp, qamtı ala ma? Sondyqtan da bolar fermerlik jáne sharýa qojalyǵy jumystaryn júrgizetin jerdiń basym bóligi bos jatyr, tipti turǵyn úı qurylysyn júrgizýge ótkizilip ketkeni de jasyryn emes. Jerdi óz maqsatynda paıdalaný problemasy baıaǵyda pisip-jetildi. Eger memleket osy máselege nazar aýdarmasa aýyl sharýashylyǵy salasy damýyn toqtata ma dep te kúdiktenemin. Munyń arty sheteldik azyq-túlik ónimderine bazarlarymyz ben dúkenderimiz tolyp, memlekettiń azyq-túlikpen qamtamasyz etý qaýipsizdigine tireıtin be edi.
Jer – bizdiń ata-babalarymyzdan mura bolyp qaldy. Jer – bizdiń baılyǵymyz, asyraýshymyz. Sondyqtan aýyl sharýashylyǵy qajettiligine paıdalaný úshin jerdi rynoktyq aınalymǵa túsirý jóninde qaralatyn zańnamany otandyq aýylsharýashylyq qurylymdary qoldar dep oılaımyn. Alańdaıtyn eshnárse joq. Zańǵa sáıkes, jerdi tek qazaqstandyqtar ǵana jekemenshigine alyp, paıdalanady. Jer kodeksine engiziletin ózgertýler aýyldyqtardyń ǵana emes, aýyl sharýashylyǵy salasyn damytýǵa nıet etken qalalyqtardyń da bıznesin órkendetetinine senemin. Semeı zootehnıkalyq-veterınarlyq ınstıtýtynyń 1995 jylǵy túlegi retinde ózimdi mysalǵa alsam, sporttaǵy jetistikterge jetken soń jattyqtyrýshylyq jumysty da toqtatyp aýyl sharýashylyǵy salasyn damytý maqsatymen Almaty oblysy, Balqash aýdanyna keldim. Alǵashynda shaǵyn ǵana jerde sharýa qojalyǵyn ashyp, ony keńeıtip, qosymsha jer telimderin satyp ala júrip 2000 jyly meniń menshigimde 5 myń gektar jer boldy. 2007 jyly Jambyl aýdany, Myńbaev aýylyna aýystym. Sol kezde aýyl tolyqtaı quldyrap, joly tozyp, durys ınfraqurylymy da bolmaǵan edi. О́z esebimnen elektr jelisin, gaz qubyryn tartyp, astyq saqtaý qoımasyn qalpyna keltirdim. Mal qoralaryn salyp, aýyl turǵyndaryn turaqty jumys ornymen qamtamasyz ettim. 2010 jyly 500 bas qazaqtyń asyl tuqymdy aq bas sıyryn jáne 500 bas áýlıekól asyl tuqymdy buzaýyn ákeldim. Búginde bizdiń sharýa qojalyǵymyzda 4500 bas iri qara, 1500 bas jylqy bar. Munyń syrtynda biz jasóspirimder sport mektebin saldyq. Búginde aýyl balalarynyń súıikti ornyna aınalǵan bul mektepte sambo, dzıý-do, bokspen 300-ge jýyq bala jattyǵady. Byltyrǵy jyly ýaqyt talabyna saı balabaqsha jáne otbasylyq jataqhana salyp, paıdalanýǵa berdik. Mine, bul aýyl bıznesiniń bir jemisi.
Jaqsylyq ÚShKEMPIROV,
Máskeý olımpıadasynyń
chempıony, «Jaqsylyq» sharýa qojalyǵynyń tóraǵasy
Almaty oblysy