ASTANA. 22 mamyr. Astanada bokstan áıelder arasyndaǵy álem chempıonaty ótip jatyr. Bul týraly egemen.kz tilshisi habarlady.
Álem chempıonatynyń alǵashqy kúnderi Qazaqstan quramasynan Nazym Qyzaıbaı (48 kg), Jaına Shekerbekova (51 kg), Rımma Volosenko (60 kg), Zarına Soloeva (64 kg) men Valentına Halzova (69 kg), Vıoletta Knıazeva (75 kg), sharshy alańǵa shyqty. Bul jekpe-jekterde Rımma Volosenko men Iýldýz Mamatkýlovadan basqalarynyń bári jeńiske jetti. Nazym Qyzaıbaı Polshanyń ókili Anjelıka Gronskany jeńdi. Kezdesýde eń jeńil salmaqqa qaıta aýysqan álem chempıonymyz qarsylasyn aıqyn basymdyqpen utty. Nazym 2014 jylǵy álem chempıonatynan keıin 51 kıloǵa deıingi salmaqta qolǵap túıistirip júrgen bolatyn.
Kelesi salmaqta Jaına Shekerbekova da argentınalyq Klara Leskýratty 3:0 esebimen tize búktirdi. 60 kılo salmaqta Rımma Volosenkonyń joly bolmady. Ol birinshi jekpe-jekte danııalyq Ivonna Rasmýssennen utyldy.
64 kılo salmaqtaǵy Zarına Soloeva vetnamdyq Ha Tı Lınnen, 69 kıloda Valentına Halzova koreıalyq Hımın Nodan basym tústi. 75 kıloǵa deınigi salmaqta Vıoletta Knıazeva kishigirim sensasııa jasady deýge bolady. Álemdik dodalar men halyqaralyq týrnırlerde kóp kózge túsi bermeıtin otandasymyz Sıngapýrde ótken Olımpıadanyń qola júldegeri avstralııalyq Keıtlın Parkerge eshqandaı múmkindik qaldyrmaı, aıqyn basymdyqpen utty. Iýldýz Mamatkýlova (-81 kg) reseılik Lıýbov Pashınamen kezdesip, jeńilip qaldy.
Endi rıngke taǵy úsh boksyshymyz shyǵady. 54 kılodaǵy Dına Jolaman jarysqa ekinshi aınalymnan bastap qatysady. Ol rýmynııalyq Nechıta men germanııalyq Vahnerdiń arasyndaǵy kezdesýdiń myqtysymen kezdesedi. Sol sııaqty 57 kılo salmaqtaǵy Aıjan Qojabekova ýkraınalyq Malovana men vengr boksshysy Ksombordyń arasynda ótetin jekpe-jektiń jeńimpazymen aıqasady. Al 81 kılodan asa salmaqtaǵy Lázzat Kúngeıbaeva ázerbaıjan Aınýr Rzaeva men úndi Sıma Pýnııanyń arasyndaǵy aıqastyń jeńimpazymen bokstasady.
Dastan Kenjalın.
Derek, foto: kfb.kz
