Qoǵam dertin qozǵaǵan qoıylym

Astana qalasy ákimdiginiń qol­daýy­men Jastar teatry dramatýrg Saıa Qasymbektiń «Teksizder» pesasynyń negizinde qoıylǵan «Lıft» psıhologııalyq dramasynyń premerasyn ótkizdi. Bizdiń zamanda adamnyń quny qansha turady? Túbi qaıdan shyq­qanyn bilmeıtin «teksizder armııasyn» ulǵaıtyp jatqan kimder? Búgingi qoǵamnyń eń úlken hám asa qasterli derti – jetim bala, tastandy urpaq pen tamyr teksizdenýiniń  negizgi túıtkilderine psıhologııalyq turǵydan tereń taldaý jasaıtyn qoıylym, kórermen kókeıindegi kezek kúttirmeıtin osyndaı ózekti máselelerge jaýap izdeıdi. О́mirdiń ashy aqıqatyn óner arqyly jas urpaq sanasyna sińirýge talpynady. Qoıylymdy tamashalaǵan adam avtor maqsatynyń dittegen mejesine jetkenin baıqaıdy. Tar lıftiń ishinde talaı taǵdyr men san túrli minezdiń beınesin beredi. Sabyrsyzdyq. Qorqynysh. Júıkesi tozǵan adamdar. Osynyń barlyǵy áleýmettik problemalardyń kóp­tiginen ekenin kórýge bolady. Al­ǵashynda sanamaq oınaǵan qyzdyń oıynynyń astarynda ne jatqanyn túsinbedik. Kóre kele ol oıyndy taǵdyrdyń ózi úıretkenine kózimiz jetti. «Biz kóbine kórermenge aıtar oıy bar dúnıelerdi izdeımiz. Sol turǵydan kelgende, Saıa Qasymbektiń osy týyndysy kópshiliktiń kó­ńilinen shyǵady dep oılaımyn. Sebebi, munda bala taǵdyry, onyń artynda turǵan urpaq taǵdyry keńinen keltirilgen. Osy qoıylym jahandaný kezeńinde ózimizdiń kim ekenimizdi joǵaltyp almaýǵa ún­deıdi», – dedi qoıylym rejısseri, Qazaqstannyń eńbek sińirgen qaı­ratkeri Bekbolat Qurmanǵojaev. Raýan QAIDAR, «Egemen Qazaqstan»