Bılikti kúshpen basyp alý joly kesildi

Keshe Bas prokýratýrada «Shymkent pıvo» jaýap­ker­shiligi shekteýli seriktestiginiń bas dırektory Toqtar Tóleshovke qatysty qylmystyq istiń tergelý barysy týraly brıfıng ótti. Oǵan Bas prokýratýranyń departament bastyǵy Qusaıyn Igembaev pen Ulttyq qaýipsizdik komıteti baspasóz qyzmetiniń ókili Rýslan Karasev qatysty. Gazetimizdiń 3-betinde olardyń sóılegen sózderiniń tolyq mátini berilip otyr. Qusaıyn Igembaev, Bas prokýratýranyń departament bastyǵy: Budan buryn habarlanǵandaı, arnaıy prokýrordyń basshy­ly­ǵymen vedomstvoaralyq ar­naıy tergeý toby trans­ulttyq qylmystyq topty qar­jy­landyrý, uıymdasqan qyl­mystyq topty basqarý, zańsyz esirtki zattaryn saqtaýǵa kú­dikti retinde «Shymkent pıvo» JShS bas dırektory Toq­tar Tóleshevke jáne onyń aınalasyndaǵy birneshe adamǵa qatysty qylmystyq is­ter­di tergeýde. Kórsetilgen árekettermen qatar, Tóleshevke aýyr jáne asa aýyr qylmystar, sonyń ishinde adam urlaýdy jáne óltirýdi uıymdastyrý, túrli dárejedegi dene jaraqatyn keltirý, bótenniń múlkin qasaqana joıý, reıderlik tárizdi qylmystar boıynsha aıyp taǵylýda. Sonymen birge, qazirgi kezde Tóleshevtiń jalpy qyl­mystyq qylmystarǵa ǵana emes, sony­men qatar konstı­tý­sııalyq qu­­ry­­lymnyń negizine qarsy qyl­­mys­tarǵa da qatystylyǵy anyq­taldy. Qylmystyń bul bóligin ter­geýdi quzyrettiligi boıynsha Qazaqstan Respýblıkasynyń Ult­­tyq qaýipsizdik komıteti júr­gizýde. Ulttyq qaýipsizdik komıteti qyzmetkerleri demalys kúnderi Astana, Almaty jáne Shymkent qalalarynda belgili kásipker T.Tóleshevtiń birqatar jaqtastaryn tutqyndaǵany belgili boldy. Bul jóninde keshe Qazaqstan Respýblıkasy Bas prokýratýrasynda ótken brıfıngte Ulttyq qaýipsizdik komıteti baspasóz qyzmetiniń ókili Rýslan Karasev málimdedi. Keltirilgen málimetterge qaraǵanda, tutqyndalǵandar qa­tarynda Bas prokýrordyń bu­rynǵy birinshi orynbasary, Konstıtýsııalyq Keńestiń buryn­ǵy múshesi, ekinshi synypty ádilet keńesshisi Ilııas Baqtybaev, Oń­tústik Qazaqstan oblysy Ish­ki ister departamentiniń buryn­ǵy basshysy, general-maıor Hıbratýlla Dosqalıev, Ońtús­tik Qazaqstan oblysy IID basty­ǵynyń burynǵy birinshi orynba­sary, polısııa polkovnıgi Sáken Aıtbekov, QR Qorǵanys mınıstr­ligi «Ońtústik» aımaq basshy­lyǵynyń 35748 jáne 55652 áskerı bólimderiniń komandırleri, polkovnıkter Bekzat Jumın jáne Qaırat Pernebaev bar. Olar ýaqytsha tergeý ızolıatoryna otyrǵyzylǵan. Qazirgi kezde tergeý amaldary júrgizilýde. Ulttyq qaýipsizdik komıteti baspasóz qyzmetiniń ókili R.Ka­ra­sev bul rette qamaýǵa alynǵan iri kásipker Toqtar Tóleshevtiń ózi bılikti kúshpen basyp alý­ǵa daıyndyq jumystaryn júr­gizgendigimen de bólisti. «Tóle­shev­tiń buryn bılikti kúshpen basyp alýǵa daıyndyq jumystaryn júrgizgendigi, al ótken jyldan beri belsendi de naqty áreketterge barǵandyǵy jóninde tolyq málimetter alynǵan. Onyń áreket jos­parynda jedel is-áreketter oshaqtaryn qurý arqyly eldegi jaǵdaıdy turaqsyzdandyrý, narazylyq aksııalary men jappaı tártipsizdikterdi uıym­das­tyrý, sonyń aıasynda balama úkimetti qalyptastyrýdy jos­par­laý jáne áreket etýshi bılik qurylymyn ózgertý qaras­tyrylǵan», – dedi Ulttyq qaýip­sizdik komıteti baspasóz qyz­metiniń ókili. Sondaı-aq, kásip­ker Tóleshev tarapynan Aty­raý, Astana, Almaty, Oral jáne Qy­zylorda qalalarynda «Jer reformasy» boıynsha narazylyq aksııalary ótken jyldyń jeltoq­sanynda daıyndalyp, qarjy­lan­dyrylǵandyǵy týraly naqty dálelder alynǵandyǵy da belgili bolyp otyr. R.Karasev málim etkendeı, nara­zylyq aksııalary budan da er­terek ótkizilýi tıis bolypty. Alaıda, Tóleshevtiń tut­qyn­­dalýyna baılanysty bul qar­sylyq aksııalaryn ótkizý ony uıymdastyrýshylar tarapy­nan keıinge qaldyrylǵan. So­lardyń keıbiri qazir ustalǵan. R.Ka­rasevtiń sózine qaraǵanda, qazirgi tańda tergeý organdary tarapynan elimizdiń ózge de óńirlerinde uıym­dastyrylǵan narazylyq aksııa­laryn qarjylandyrý fakti­leri jan-jaqty tekserilýde. Budan basqa, Tóleshev tergeý ızo­lıa­torynda otyryp, 2016 jyldyń mamyrynda Ońtústik Qazaq­stan oblysy Saryaǵash qala­synda jappaı tártipsizdikti uıym­dastyrýǵa árekettengeni de atalmaı qalmady. Ony kásipker eldegi jaǵdaıdy paıdalanyp júzege asyrmaq bolypty. «О́z josparlaryn júzege asyrý maqsatynda Tóleshev quqyq qorǵaý organdarynyń burynǵy jáne áreket etýshi joǵary laýyzymdy tulǵalaryn, sondaı-aq elimizdiń Qarýly Kúshteri bólimderiniń keıbir basshylary qatarynan maqsatty túrde óziniń jaqtastaryn izdestirgen», dedi R.Karasev. Onyń aıtýynsha, Tóleshev óziniń qylmystyq áreketterin iske asyrý maqsatynda paıdalanýǵa josparlanǵan jasyryn oryndardaǵy edáýir qarý-jaraq, oq-dáriler men jarylǵysh zattardy Ulttyq qaýipsizdik organdary tárkilegen. Al Tóleshevtiń ózi byltyr qańtar aıynda Shymkent qalasynda kúshtik qurylymdar tarapynan júrgizilgen arnaıy operasııa barysynda tut­qyn­dalǵan-dy. Sonyń barysynda qarý salynǵan birneshe paket tárkilengeni málim. Bul rette Astana qalasy Almaty aýdany­nyń №2 aýdandyq sotynda birinshi aqpannan bastap Tóle­shevti tutqyndaý týraly sank­sııa berilgendigin de aıta ketken oryndy. Oǵan qylmys­tyq istiń 297-babynyń 3-tarma­ǵy boıynsha «esirtki qural­daryn, psıhotroptyq zattardy jáne olardyń balamalaryn zańsyz satý, saqtaý, satyp alý, qaıta óndeý jáne ázir­leý», 266-babynyń 3-bólimi boıyn­sha «qylmystyq topty qarjy­landyrý, sonymen qatar, múlikti taratý, qarjylandyrý arnalaryn ázirleý» baby boıynsha aıyp taǵylýda.