Ekstremızmge oryn joq

Keshe Ortalyq kommýnıkasııalar qyzmetinde jeksenbide Aqtóbe qalasynda bolǵan lańkestik oqıǵaǵa qatysty qoǵamdyq uıymdar men saıası partııalar ókilderi ózderiniń úndeýin jarııalap, málimdemelerimen tanystyrdy. Qazaqstan halqy Assam­bleıa­synyń bir top múshesi ótken brıfıngke Qazaqstan halqy As­sam­­bleıasy Tóraǵasynyń oryn­basary – Qazaqstan halqy Assam­bleıasy Hatshylyǵynyń meńge­rý­shisi Era­ly Toǵjanov, Parla­ment Máji­lisiniń depýtattary Saýyt­bek Abdrahmanov, Ahmet Mýradov já­ne QHA Keńesiniń músheleri Ana­tolıı Bashmakov pen Aıgúl Sádýaqasova qatysty. Eraly Toǵjanov Aqtóbedegi eks­tremıstik sıpattaǵy keleńsiz oqıǵaǵa baılanysty Qazaqstan halqy Assambleıasynyń Keńesi óziniń otyrysyn ótkizip, úndeý qabyldaǵanyn, onda ekstremıstik sıpattaǵy áreketterdi aıyptaıtynyn jetkizdi. Qazaqstan halqy Assambleıasy Tóraǵasynyń orynbasary sóziniń sońynda qalyń jurtshylyqty qaýipsiz jáne turaqty Qazaqstandy nyǵaıtý jáne damytý jolyndaǵy Elbasynyń syndarly saıasatynyń aınalasyna uıysa túsýge, qyra­ǵylyq pen sabyrlylyq tanytyp, turaqtylyqty saqtaýǵa shaqyrdy. Parlament Májilisiniń depýtaty Saýytbek Abdrahmanov óz sózinde dinniń atyn jamylǵan lańkesterde qasıetti eshteńe joq ekendigin qadap aıtty. «Bul oqıǵa Orazaǵa bir kún qalǵanda oryn aldy. Osynyń ózi dindi betperde etip ustanǵan adamdar úshin qasıetti eshteńe joq ekenin kórsetip otyr. Sondyqtan, bul oqıǵalardan árbir qazaqstandyq sabaq alýǵa tıis. Eń aldymen, biz memleketimizdiń zaıyrly sıpatyn, Konstıtýsııada jazylǵan zaıyrly memleket degen atymyzdy tolyq qalpyna keltirý jóninde kóp jumystar atqarýymyz kerek. Aqtóbedegi oqıǵa osyny taǵy da eske salady. Qazaqstan halqy Assambleıasynyń úndeýi árbir qazaqstandyqty sabyrly, qyraǵy, yntymaqshyl bolýǵa, qashanda elimizdiń basty baılyǵy – dostyqty kózdiń qarashyǵyndaı saqtaýǵa shaqyrady. Osy úndeý úlken áńgimeniń basy dep oılaımyz», dedi. Parlament Májilisiniń depýtaty Ahmet Mýradov óz sózinde elimizdiń qaı túkpirinde bolǵan oqıǵanyń árbir qazaqstandyqqa qatysy bar ekenin aıta kele, radıkaldyq, ekstremıstik, lańkestik áreketterge tıisinshe jaýap berý qajet ekendigine toqtaldy. Oǵan eldiń myzǵymas birligi arqasynda myqty tosqaýyl qoıýǵa bolatyndyǵyn jetkizdi. «Atalǵan oqıǵaǵa qatysty quzyrly oryndar tarapynan qabyldanǵan sheshimder aldaǵy ýaqytta onyń qaıtalanýyna jol bermeıdi dep senemiz», dedi Májilis depýtaty. «Kez kelgen problema kons­tı­týsııalyq jáne beıbit jolmen, quqyqtyq tásilmen sheshilýi tıis. Aqtóbede oryn alǵan oqıǵany aıyptaı otyryp, aldaǵy ýaqytta qazaqstandyqtardy qyraǵy bolýǵa, patrıot bolýǵa shaqyramyn», dep túıindedi óz sózin Qazaqstan halqy Assambleıasynyń múshesi Anatolıı Bashmakov. Áleýmettanýshy Aıgúl Sádýa­qa­sovanyń aıtqany zertteý barysynda naqtylanǵan halyqtyń pikirimen astasyp jatty. «Jalpy, qazaqstandyqtar ózderiniń oı-pikirlerin bildirgende, elimizde birlik bolsyn, elimizde myzǵymas yntymaq bolsyn degendi kóbirek aıtady. Bul – áleýmettanýshylar tarapynan zertteý júrgizilgende jıi kezdesetin tujyrymdar. Son­dyq­tan Aqtóbede bolǵan oqıǵany sarapshy retinde qarastyrsaq, halyq mundaı lańkestik oqıǵalarǵa jol bermeýge, osyǵan bir halyq bolyp, bir el bolyp, bárimiz birge qarsy turaıyq degen pikirlerin aıtyp jatyr», dedi. * * * Qazaqstannyń Azamattyq alıansynyń prezıdenti Nurlan Erimbetov bul zulymdyq áreketti bir sheti urpaq tárbıesinde ketken kemshilikten ekendigimen, ata-analar jaýapkershiliginiń tómendep ketkendigimen túsindirdi. «Aqtóbede bolǵan jaǵdaı bárimizdi úlken ýaıymǵa saldy. Bul jaǵdaı bárimizdi biriktirý kerek dep esepteımin. Eń bastysy, biz qazir eldik múddemizdi, yntymaqtastyǵymyzdy kórsete bilýimiz kerek. Taǵy da bir aıtarym, urpaq tárbıesine aıryqsha mán berý qajet. Bul – birinshiden. Ekinshiden, biz ata-analardyń jaýapkershiligin óte joǵary deńgeıge kóterýimiz qajet. Barlyǵy ózderiniń tárbıe jumystaryna jaýap berýi tıis», dedi Nurlan Erimbetov. Isker áıelder qaýym­das­tyǵynyń prezıdenti Raýshan Sár­sem­baeva óz sózinde el basyna kún týǵan kezeńde birigý kerektigine basa nazar aýdardy. Elimizdegi beıbit ómirdi shaıqaltqysy keletinderge jol bermeı, sol úshin kúresýge, úreıge boı aldyrmaı, eldiń turaqtylyǵyn qorǵaýǵa shaqyrdy. * * * Ortalyq kommýnıkasııa­lar qyzmetiniń kelesi qonaǵy Qa­zaq­stan Kommýnıstik halyq par­tııasynyń qurmetti hatshysy, Parlament Májilisiniń depýtaty Vladıslav Kosarev ta QKHP Aqtóbedegi terrorıstik aktini aıyptaıtynyn jetkizdi. «Radıkaldyq aǵymdaǵylardyń terrorıstik áreketiniń kesirinen jazyqsyz azamattar, quqyq qorǵaý organdarynyń qyzmetkerleri qaza taýyp, birqatarlary aýyr jaralandy. Taǵylyq áreket qasıetti Ramazan aıynyń qarsańynda boldy. Kináliler kóp uzamaı ustalyp, jazalaryn alatynyna senimdimin. Aqtóbede oryn alǵan oqıǵa lańkestikke qarsy kópshilik bolyp kúresý kerek ekendigine kózimizdi jetkizdi», dedi V.Kosarev. * * * «Birlik» saıası partııasy tór­aǵa­synyń orynbasary Baýyrjan Bóri­bek «Birlik» partııasynyń 5 maý­symda Aqtóbede oryn alǵan jalǵan dinı aǵymnyń terror­lyq áreketin qatań túrde aıyp­taıtyndyǵyn jetkizdi. Qasıetti Ramazan aıynyń qarsańynda ja­sal­ǵan taǵylyq oqıǵa zulym­dyq­tyń shegine jetken áreket ekendigin kórsetedi, dedi ol. Sondaı-aq, Baýyrjan Bóribek partııa atynan qaza bolǵandardyń týǵan-týystaryna kóńil aıta otyryp, ári qaraı qoǵamda yntymaq men birliktiń saltanat qurýyna múd­delilik tanytatyndyqtaryn bildirdi. * * * Kezekti brıfıng «Aq jol» demo­kratııalyq partııasynyń ókil­derine tıdi. Áýeli sóz alǵan partııa tóraǵasy Azat Perýashev Aqtóbede oryn alǵan oqıǵaǵa baılanysty «Aq jol» partııasy Ortalyq keńe­siniń prezıdıýmy arnaıy málim­de­me qabyldaǵanyn aıta kelip, sóz­di Parlament Májilisiniń de­pý­taty Berik Dúısenbınovqa usyndy. Berik Dúısenbınov Aqtóbe qa­la­synda jantúrshigerlik lań­kes­tik shabýyldan jazyqsyz jan­dar­dyń opat bolǵandyǵyn, shabýyl jasaǵandar jurtshylyqty qorqytý, azamattardyń óz mem­leketine degen senimin buzý maq­satyn aldyna qoıǵanyn atap ótti. «Aq jol» partııasy bolǵan lań­­kestik shabýylǵa óziniń narazy­­lyǵyn bildiredi. Jáne ony uıym­­das­tyrýshylardy batyl túrde aıyp­taıdy. Qasıetti Oraza aıy­nyń qarsańynda jasal­ǵan qandy qyrǵyndy uıym­das­tyrýshylardyń shyn dinı senim­ge, ıslam bolsyn nemese basqa bolsyn, eshqandaı qatysy joq ekenin kórsetýde. Biz quqyq qorǵaý or­gandaryn konstıtýsııalyq tár­tipti qoldaýǵa jáne bizdiń azamat­tarymyzdyń quqyqtaryn kez kelgen jerde qorǵaýdy qamtamasyz etýge shaqyramyz. Biz barlyq qazaqstandyqtardy Aqtóbe óńiriniń turǵyndaryna yn­ty­maqtastyq bildirip, bizdiń táýel­sizdigimizdi baısaldy da senimdi túrde qoldaýǵa shaqyramyz», de­lin­gen «Aq jol» partııasynyń málim­demesinde. Ǵabıt ISKENDERULY, «Egemen Qazaqstan»