Gúlzarlarmen kómkerilgen kósheler

Kúni keshe Esil ózeniniń qos qaptalyndaǵy Qaraótkel atty sortańdaý jerge ornalasqan elordamyz – Astana qalasy Saryarqanyń bel ortasyndaǵy jasyl jelek jamylǵan gúlzar qalaǵa aınalatyndyǵyna bireý sense, endi bireýdiń kúdikpen qaraǵany haq. Alaıda, bultartpas aqıqat aıǵaǵy búginde álemniń órkenıetti qalalarynyń qatarynda qylań bergen Astananyń jasyl qalaǵa aınalǵandyǵy anyq. Elbasynyń bastamasymen Astana beldeýinde qoldan jasalǵan orman alqaby da kúnnen-kúnge keń qanat jaıyp barady. Sońǵy kezde Astananyń gúlzar­laryn qyzyldy-jasyldy gúlmen kómkerý dástúri keń óris aldy. Osy ıgi bastamany jal­ǵas­tyra otyryp bıylǵy jyly qala boıynsha 8 mıllıon túp­ke jýyq ártúrli gúlder otyr­ǵyzyl­maq. Qazirgi kúni «Astana Zelenstroı» aksıonerlik qoǵa­my­­nyń eńbekkerleri osy bir ke­shen­di jobany júzege asyrý jo­lyn­da jumyla eńbek etýde. Joba boıynsha bıyl qala kóshelerin jalpy aýmaǵy 147 myń sharshy metr kóz jaýyn alar gúlzarlar kómkermek. 147 myń sharshy metr alańǵa 7,9 mıllıon túp gúl óskinderi otyrǵyzyla bastady. Qalyptasqan tártip boıynsha bul gúl alqaptaryn ak­sıonerlik qoǵam eńbekkerleri kún qurǵatpaı baptaıdy. Sonyń nátıjesinde jaz aılarynda qaý­laı ósken san túrli gúl shoq­tary qala jurtshylyǵynyń jáne qonaqtarynyń kózaıymyna aına­lady. Sonymen qatar, qalada ósim­dik­ten jasalatyn jasandy jasyl músinder de kópshilik kóńilinen shyǵýda. Neshe túrli janýarlar beınelengen bul jasyl músinder qala kórkine shyraıly sán qosady. Táýelsiz elimizdiń bas qalasyn gúl qalaǵa aınaldyrý jolyndaǵy bastama baıandy jalǵasyn tabýda. Bıyl 3-5 maýsym aralyǵynda «Qazaqstan» sport saraıynyń mańyndaǵy Stýdenttik saıabaqta tuńǵysh ret «Gúldene ber, meniń Qazaqstanym» atty gúlder fes­tıvali ótkizildi. Osy ıgilikti shara barysynda gúlderdiń 32 myń­nan astam túri kópshilik naza­ryna usynyldy. Atap aıt­qanda, shyraıgúl, lobelııa, alıssým, sı­ne­rarııa, delfınıým jáne basqa adam qolymen jasal­ǵan jupar ıisti gúl túrlerin ósirý tájirıbesi jan-jaqty pash etildi. – Astanada alǵash ótkizilip otyr­ǵan gúlder festıvaliniń basty maqsaty gúl ósirý dástúrin jań­ǵyrtý, mádenı tanym múm­kin­­dik­terin keńeıtý, elorda tur­ǵyn­dary men qonaqtaryn qala­nyń eko­logııalyq tazalyǵyna keńi­nen ju­myldyrý bolyp taby­­lady. Bul bastamany biz jyl sa­ıyn jalǵastyryp, jas elor­da­myz úshin ıgilikti dástúr qalyp­tas­tyrýǵa nıettimiz, – deıdi «Astana-Zelenstroı» aksıo­ner­lik qoǵamynyń basqarma tóraǵa­sy Ádilhan Ábildınov. Gúlder festıvali barysynda ony uıymdastyrýshylar qala jurt­shylyǵyna qyzyqty baǵdar­lama usyndy. Shara barysynda «Gúlden sabyn jasaý» baǵdar­la­m­a­sy boıynsha eresekter men bala­l­arǵa óz qolymen gúldiń qosh ıisi sińgen sabyndar jasaý táji­­rı­­besi úıretildi. Gúl qala­nyń jasyl jelegin jaı­qaltý maqsatyndaǵy mundaı ıgi bas­ta­­malar elordamyzda laıyqty jal­ǵasyn tappaq. Ulan SANJAR