AQSh abaqtysynan bosatyldy

Muhıttyń arǵy jaǵyndaǵy Soltústik Amerıkada júrip, lańkestik áreketke qatysy bar degen aıyppen 3,5 jylǵa bas bostandyǵynan aıyrylǵan Azamat Tájaıaqov AQSh abaqtysynda jazasyn tolyq ótep, elge oraldy. Keshe ony Almaty aeroportynan kútip alýǵa ata-anasy, týǵan-týystary men dostary keldi. Ulyn kórip, baýyryna basqan ákesi qýa­nyshyna ortaqtasqan el-jurtqa sheksiz alǵysyn jetkizdi. – Otbasymyz úshin búgin – eń baqytty kún. Men Elbasyna, elimizdiń Bas prokýratýrasyna, Syrtqy ister mınıstrligine jáne tilekshi bolǵan halqyma rahmet aıtamyn. О́ıtkeni, ulym 25 jylǵa sottalýy múmkin edi. Alaıda, atalǵan tulǵalar men ókiletti organdar aralasyp, merzimin qysqartty. Meniń búgin baqyttan basym aınalyp tur, – dedi Ámir Ysmaǵulov. Al osynshama ýaqyttan keıin tabany týǵan jerge tıgen Azamat: «Qazir júregim toqtap qalardaı bolyp tur. Qatty soǵyp jatyr. Qýa­nyshymda shek joq. Kelip kútip alǵandaryńyzǵa rahmet. Ákem qo­ńyraý shalyp, jaǵdaıymdy bilip turdy. Ol kisige de alǵysym sheksiz. Úsh jarym jyl boldy Qazaqstanda bolmaǵanyma. Et jep demalyp, qymyz iship jatqym keledi», – dedi. Búginde Otanyna oralǵan qan­dasymyz AQSh túrmesinde til úı­rengenin aıtty. Ol aǵylshyn, ıspan, qytaı tilderin jetik meńgeripti. – Men endi Amerıkaǵa baryp, oqýymdy jalǵastyra almaımyn. Sondyqtan da endigi maqsatym – Qytaıda oqyp, bilim alý. Biraq eń áýeli týǵan mekenim – Atyraýǵa attanamyn. Ol jaqta tynyǵyp, demalyp, ata-anamnyń qasynda bolamyn, – deıdi ol. Esterińizge sala keteıik, AQSh túrmesinde jatqan taǵy bir otandasymyz Dıas Qydyrbaevtyń jazasyn tolyq óteýine áli 2 jyl bar. Talǵat RAIYMBEK, «Egemen Qazaqstan»